ବାଣପୁର: ଆଜି ହେଉଛି ଆନ୍ତର୍ଜାତୀୟ ଯୋଗଦିବସ। ଯୋଗ ଦିବସରେ ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ଭେଟେଶ୍ୱର ପଞ୍ଚାୟତର ଭାପୁର ବହୁମୁଖୀ ବାତ୍ୟା ଆଶ୍ରୟସ୍ଥଳୀରେ ଥିବା ଅସ୍ଥାୟୀ ସ୍ୱାସ୍ଥ୍ୟ ଶିବିରରେ ଅନ୍ତର୍ଜାତୀୟ ଯୋଗ ଦିବସ ଅନୁଷ୍ଠିତ ହୋଇଯାଇଛି। ଏହି ଶିବିରରେ ରହୁଥିବା ୪୧ ଜଣ ପ୍ରବାସୀ ଶ୍ରମିକମାନେ ସକାଳୁ ଯୋଗ ଶିକ୍ଷା ଲାଭ କରିଥିଲେ। ଉକ୍ତ କାର୍ଯ୍ୟକ୍ରମକୁ ଭେଟେଶ୍ୱର ଗ୍ରାମପଞ୍ଚାୟତ ସରପଞ୍ଚ ଜିତେନ୍ଦ୍ର କୁମାର ଭୋଳ ଉଦଘାଟନ କରିଥିବା ବେଳେ ଯୋଗଗୁରୁ ପ୍ରସନ୍ନ ମିଶ୍ର ସଂଚାଳନ କରିଥିଲେ। ଅନ୍ୟମାନଙ୍କ ମଧ୍ୟରେ ଅସ୍ଥାୟୀ ସ୍ୱାସ୍ଥ୍ୟ ଶିବିର ପ୍ରବନ୍ଧକ ରମେଶ ଭୋଳ ଉପସ୍ଥିତ ଥିଲେ। ସରପଞ୍ଚଙ୍କ ଉକ୍ତ ପ୍ରୟାସକୁ ପ୍ରବାସୀ ମାନେ ପ୍ରଶଂସା କରିଥିଲେ।
