କନ୍ଦର୍ପ ବେହେରା
ରେଢାଖୋଲ: ସମ୍ବଲପୁର ଜିଲ୍ଲା ରେଢାଖୋଲ ଉପଖଣ୍ଡ ନାକଟିଦେଉଳ ବ୍ଲକ୍ ଡଇଁଚା ପଂଚାୟତରେ ଜଣେ ମହିଳା କରୋନା ରୋଗୀ ଚିହ୍ନଟ ହୋଇଥିବା ଖବର ହସ୍ତଗତ ହୋଇଛି।
ପ୍ରକାଶ ଯେ, ନାକଟିଦେଉଳ ବ୍ଲକର ଡଇଁଚା ପଂଚାୟତ ଅନ୍ତର୍ଗତ ତେରବେଡା ଗ୍ରାମର ନୂଆଁସାହିରେ ଦିଲ୍ଲୀ ଫେରନ୍ତା ଜନୈକା ଜଣେ ମହିଳା ଠାରେ କରୋନା ପଜିଟିଭ୍ ରହିଥିବା ଗତକାଲି ଚିହ୍ନଟ ହୋଇଥିବା ଜଣାପଡିଛି ଯା ଫଳରେ ଏ ଅଂଚଳରେ ଲୋକମାନଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି। ତେରବେଡା ନୂଆଁସାହିର ମହିଳା ଜଣଙ୍କ ଦିଲ୍ଲୀରେ ଶ୍ରମିକ ଭାବରେ କାମ କରୁଥିଲେ। କିଛି ଦିନ ତଳେ ଦିଲ୍ଲୀରୁ ଟ୍ରେନରେ ଭୂବନେଶ୍ୱର ଦେଇ ନିଜ ଘରକୁ ଫେରିଥିଲେ। କିନ୍ତୁ ମହିଳା ଜଣଙ୍କ ପଂଚାୟତ କତୃପକ୍ଷଙ୍କୁ କିଛି ବି ନ ଜଣାଇ ଘରକୁ ରେଢାଖୋଲରୁ ଏକ ଟେମ୍ପୁ ସାହାଯ୍ୟରେ ଫେରିଥିଲେ। ସେ ସିଧାସଳଖ କ୍ଵାରେଣ୍ଟିନ ସେଣ୍ଟରକୁ ନ ଯାଇ ନିଜ ଘରେ ଦିନ ୧୨ ଟାରୁ ତା ପରଦିନ ୧୨ ଟା ପର୍ଯ୍ୟନ୍ତ ରହିଥିଲେ। ତେରବେଡା ଗ୍ରାମର କିଛି ବ୍ୟକ୍ତି ଜାଣିବା ପରେ ପ୍ରଶାସନକୁ ଖବର ଦେଇଥିଲେ। ସେ ଘରେ ୨୪ ଘଂଟା ରହିବା ପରେ ହିଁ ସରାପାଲି କ୍ଵାରେଣ୍ଟିନ ସେଣ୍ଟରକୁ ଯାଇଥିଲେ। ତାଙ୍କ ସ୍ୱାବ୍ ପରୀକ୍ଷାରୁ ସେ କରୋନା ପଜିଟିଭ୍ ଥିବା ଗତକାଲି ଜଣାପଡିବା ପରେ ତାକୁ ସମ୍ବଲପୁର କୋଭିଡ ହସପିଟାଲ କୁ ପଠାଯାଇଥିବା ନାକଟିଦେଉଳ ମେଡିକାଲ ଅଫିସର ଡା. ଅମୂଲ୍ୟରତ୍ନ ମହନ୍ତ ଆମ ପ୍ରତିନିଧୀଙ୍କ ଠାରେ ପ୍ରକାଶ କରିଛନ୍ତି।