ଭୁବନେଶ୍ବର/ସମ୍ବଲପୁର, ଏକ ବଡ ଟ୍ରେନ ଦୁର୍ଘଟଣାରୁ ଅଳ୍ପକେ ବଞ୍ଚିଗଲା ପୁରୀ ସୁରଟ ଏକ୍ସପ୍ରେସ। ଆଜି ରାତି 2ଟାରେ ଏହି ଟ୍ରେନଟି ସମ୍ବଲପୁର ରେଲୱେ ଡିଭିଜନର ହାତୀବାରି ଓ ମାନେଶ୍ବର ଷ୍ଟେସନ ମଧ୍ୟରେ ଏକ ହାତୀ ଧକ୍କା ଦେଇଛି। ଫଳରେ ଟ୍ରେନର ଇଂଜିନରେ ଥିବା ଚକା ମଧ୍ୟରୁ ଛଅଟି ଚକା ଲାଇନଚ୍ୟୁତ ହୋଇଛି। ତେବେ ଏଥିରେ କୌଣସି କ୍ଷୟକ୍ଷତି ଘଟି ନାହିଁ। ଟ୍ରେନର ଡ୍ରାଇଭର ଏବଂ ଅନ୍ୟ କର୍ମଚାରୀ ସୁରକ୍ଷିତ ଅଛନ୍ତି।
ଘଟଣାରୁ ଜଣାପଡିଛି ଯେ, ସମ୍ବଲପୁର ଡିଭିଜନର ହାତୀବାରି ଓ ମାନେଶ୍ବର ଷ୍ଟେସନ ଅଞ୍ଚଳଟି ହାତୀଙ୍କ ଚଳପ୍ରଚଳ ହୋଇଥିବାରୁ ଟ୍ରେନର ଗତି ଧୀର କରାଯାଇଛି। ସେହି ଅନୁସାରେ ଟ୍ରେନଟି ହାତୀବାରୀ ଷ୍ଟେସନରୁ ରାତି 1 ଟା 55 ମିନିଟରେ ଛାଡିଥିଲା। ସେତେବେଳେ ଟ୍ରେନର ଗତି ଘଣ୍ଟାକୁ 50 କିଲୋମିଟର ଥିଲା। ଶୀତରାତି ହୋଇଥିବାରୁ ହାତୀଙ୍କ ଚଳପ୍ରଚଳ ଟ୍ରେନ ଡ୍ରାଇଭର ବୋଧହୁଏ ଅବଗତ ହୋଇ ପାରିଲେ ନାହିଁ। ଫଳରେ ଏହି ଦୁର୍ଘଟଣା ହୋଇଥିବାର ଜଣାପଡିଛି।
ଏହି ଖବର ଜଣାପଡିବା ପରେ ପୂର୍ବତଟ ରେଳବାଇର ରେଢାଖୋଲରୁ ଏକ ରିଲିଫ ଟ୍ରେନ ଆସି ଉଦ୍ଧାର କାର୍ଯ୍ୟରେ ଲାଗିଥିଲା। ସମସ୍ତ ବଗିଗୁଡିକକୁ ପୁଣି ହାତୀବାରୀ ଷ୍ଟେସନ ଅଣାଯାଇଥିଲା। ଅଳ୍ପ ସମୟ ପରେ ଏକ ନୂଆ ଇଂଜିନି ଲଗାଯାଇ ଟ୍ରେନଟି ଗନ୍ତବ୍ୟସ୍ଥଳକୁ ଯାତ୍ରା କରିଥିଲା। ଏହି ଦୁର୍ଘଟଣା ଯୋଗୁଁ ପୁରୀ ଦୁର୍ଗ ସ୍ପେଶାଲ ଏକ୍ସପ୍ରେସ, କୋରାପୁଟ ଭୁବନେଶ୍ବର ସ୍ପେଶାଲ ଟ୍ରେନ ବିଳମ୍ବରେ ଯାତ୍ରା କରିଥିଲା। ଏହି ଖବର ପରେ ସମ୍ବଲପୁର ବନ ବିଭାଗ ଅଧିକାରୀ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଥିବାର ଜଣାପଡିଛି।