ନୂଆଦିଲ୍ଲୀ, ବହୁ ପ୍ରତିକ୍ଷିତ କରୋନା ଟୀକା ବର୍ତ୍ତମାନ ଆସିଗଲା। ସଂପୂର୍ଣ୍ଣ ଦେଶୀୟ ଜ୍ଞାନକୌଶଳରେ ତିଆରି କରୋନା ଟୀକାକୁ ଡ୍ରଗ କଣ୍ଟ୍ରୋଲର ଜେନେରାଲ ଅଫ ଇଣ୍ଡିଆ ଅନୁମତି ପ୍ରଦାନ କରିଛନ୍ତି। ଏ ନେଇ ଡିସିଜିଆଇ ଭି.ଜି ସୋମାନୀ ଘୋଷଣା କରିଛନ୍ତି। ଏହି ଦୁଇଟି ଟୀକା ହେଲା କୋଭାକ୍ସିନ ଏବଂ କୋଭାସିଲ୍ଡ। ସେରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ କୋଭିସିଲ୍ଡ ଏବଂ ଭାରତ ବୟୋଟେକ୍ର କୋଭାକ୍ସିନ ବାହାର କରିଛନ୍ତି। ଏହି ଦୁଇ ପ୍ରକାରର ଟୀକା ଲୋକଙ୍କୁ ଦୁଇଟି ଡୋଜ ଦିଆଯିବ।
ପ୍ରଥମେ ଆସନ୍ତୁ ଜାଣିବା ଭାରତରେ ଏହି ଟୀକା କିପରି ବଣ୍ଟନ କରାଯିବ। ଏଭଳି ଟିକା ଦେଶରେ ବଣ୍ଟନ ପାଇଁ ଭାରତ ସରକାର ଏକ ଭିନ୍ନ ପଦ୍ଧତି ମନୋନିତ କରିଛନ୍ତି। ତାହା ହେଲା ବିଶ୍ୱର ସର୍ବବୃହତ ଗଣତନ୍ତ୍ରରେ ନିର୍ବାଚନ ସମୟରେ ଯେଉଁ ଭଳି ଭାବେ ମତଦାନ ବୁଥଗୁଡ଼ିକ ସ୍ଥାପିତ ହୋଇଛି, ଏହି ଟୀକା ପାଇଁ ମଧ୍ୟ ସେହିପରି ବୁଥ୍ ତିଆରି କରିବାକୁ ଭାରତ ସରକାର ଯୋଜନା କରିଛନ୍ତି। ନିର୍ବାଚନ ବୁଥ ପରି ଦଳ ଗଠନ ହେବ। ବ୍ଲକ ସ୍ତରରେ ଏକ ରଣନୀତି ପ୍ରସ୍ତୁତ ହେବ।
ଏହି ଅଭିଯାନ ପାଇଁ ସରକାରୀ ଏବଂ ବେସରକାରୀ ଡାକ୍ତରମାନଙ୍କୁ ବିଶେଷ ଦାୟିତ୍ବ ଦିଆଯିବ। ଜନସାଧାରଣଙ୍କ ଅଂଶଗ୍ରହଣ ପାଇଁ ସେମାନଙ୍କୁ ଆବଶ୍ୟକ ତାଲିମ ମଧ୍ୟ ଦିଆଯିବ। ଟୀକାକରଣ ସମ୍ବନ୍ଧରେ ବିଭିନ୍ନ ବିଭାଗରେ ବିଭିନ୍ନ ପ୍ରକାରର ଭୁଲ ଧାରଣା ଅଛି। ତେଣୁ କେନ୍ଦ୍ର ସରକାର ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳଗୁଡିକୁ ଏହି ଦିଗରେ ସଚେତନତା ଅଭିଯାନ କରିବାକୁ କହିଛନ୍ତି। ଏହା ବ୍ୟତୀତ ଟୀକାକରଣର କୈଣସି ପାର୍ଶ୍ୱ ପ୍ରତିକ୍ରିୟାର ମୁକାବିଲା ପାଇଁ ରାଜ୍ୟମାନଙ୍କୁ ମଧ୍ୟ ପ୍ରସ୍ତୁତ ହେବାକୁ କୁହାଯାଇଛି। ଆଲର୍ଜି ପ୍ରତିକ୍ରିୟାର ପରିସ୍ଥିତିର ମୁକାବିଲା ପାଇଁ ରାଜ୍ୟମାନଙ୍କୁ ଚିକିତ୍ସା ବ୍ୟବସ୍ଥା ବଜାୟ ରଖିବାକୁ କୁହାଯାଇଛି।
ତେବେ ଏହି ଟୀକା ଆସିବା ପରେ ଏହାକୁ ସଂରକ୍ଷଣ କରି ରଖିବା ହେଉଛି ବଡ ଦାୟିତ୍ବ। କାରଣ ଟୀକା ଯଦି ଠିକ ଭାବେ ସଂରକ୍ଷଣ ହୋଇ ରହିଲା ନାହିଁ ତେବେ ତାହା କାମ କରିବ ନାହିଁ। ଟୀକା ସଂରକ୍ଷଣ କରି ରଖିବା ଏବଂ ବିଭିନ୍ନ ସ୍ଥାନକୁ ପରିବହନ କରିବା ବ୍ୟୟ ବହୁଳ ହୋଇପାରେ। କାରଣ ଏଥିପାଇଁ ଫ୍ରିଜର ବା ରେଫ୍ରିଜରେଟର ଆବଶ୍ୟକତା ଥାଏ।
ତେବେ ଆଉ କେତେକଙ୍କ ମନରେ ସନ୍ଦେହ ଥାଏ ଯେ ଏହି ଟୀକା ଆସିବା ପରେ ପ୍ରଥମେ କାହାକୁ ଦିଆଯିବ। ମୋଦୀ ସରକାରଙ୍କ ମିଶନ ଟୀକା ଅନୁଯାୟୀ ପ୍ରଥମେ ଭାରତରେ 30 କୋଟି ଲୋକଙ୍କୁ ଟୀକା ଲଗାଇବାକୁ ଯୋଜନା ରହିଛି। ପ୍ରାଥମିକତା ଭିତ୍ତିରେ ସ୍ୱାସ୍ଥ୍ୟ କର୍ମୀ, କରୋନା ଯୋଦ୍ଧା ଏବଂ ବରିଷ୍ଠ ନାଗରିକମାନଙ୍କୁ ଟୀକାକରଣ ପାଇଁ ପ୍ରସ୍ତୁତି ଚାଲିଛି। ପ୍ରଥମ ପର୍ଯ୍ୟାୟରେ ଏସଏମଏସ ମାଧ୍ୟମରେ ଟୀକାକରଣର ତାରିଖ, ସମୟ ଏବଂ ସ୍ଥାନ ଦିଆଯିବ। ଏହି ବାର୍ତ୍ତାରେ ଟିକା ପ୍ରଦାନ କରୁଥିବା ଅନୁଷ୍ଠାନ ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ନାମ ମଧ୍ୟ ରହିବ।
ସେହିପରି କେତେକଙ୍କ ମନରେ ପ୍ରଶ୍ନ ରହିଛି ଯେ, ମଣିଷଙ୍କୁ ଏହି ଟୀକା କେତେ ଡୋଜ ଦିଆଯିବ। ବର୍ତ୍ତମାନ ଟୀକା ବାହାର କରିଥିବା ଦୁଇ ସଂସ୍ଥାର ତଥ୍ୟ ଅନୁସାରେ ଲୋକଙ୍କୁ ଦୁଇଟି ଡୋଜ ଟୀକା ପ୍ରଦାନ କରାଯିବ। ଉଭୟ ଡୋଜକୁ ଠିକ୍ ସମୟରେ ରଖିବା ପାଇଁ ମନ୍ତ୍ରଣାଳୟ ଏକ କରୋନା ଭ୍ୟାକ୍ସିନ୍ ଇଣ୍ଟେଲିଜେନ୍ସ ନେଟୱାର୍କ ପ୍ରସ୍ତୁତ କରିଛି। ପ୍ରଥମ ଡୋଜ ଦିଆଯିବା ପରେ ଦ୍ୱିତୀୟ ଡୋଜ ପାଇଁ SMS ପଠାଯିବ। ଯେତେବେଳେ ଟୀକାକରଣ ସମ୍ପୂର୍ଣ୍ଣ ହେବ, ଏକ ଡିଜିଟାଲ୍ QR ଆଧାରିତ ପ୍ରମାଣପତ୍ର ମଧ୍ୟ ସୃଷ୍ଟି ହେବ। ଏହି ସାର୍ଟିଫିକେଟ୍ ଟିକା ପରିଚୟର ପ୍ରମାଣ ହେବ।
ତେବେ ସମସ୍ତେ ଜାଣିବା ଆବଶ୍ୟକ ଯେ, ଭ୍ୟାକସିନ ଆସିଗଲେ କରୋନା ଭୂତାଣୁ ପୃଥିବୀରୁ ଉଭେଇ ଯିବ ନାହିଁ। ଏହା ବାୟୁ ମଣ୍ଡଳରେ ରହିବ। କେବଳ ଆପଣଙ୍କ ଶରୀରରେ ସେହି ଭୂତାଣୁ ପ୍ରବେଶ କଲେ କିଛି ହେବ ନାହିଁ। ସେଥିପାଇଁ ଏହି ଟୀକା ଦିଆଯିବ।
