ଦୁବାଇ: କରୋନା ମହାମାରୀ ସମଗ୍ର ବିଶ୍ଵକୁ ପ୍ରଭାବିତ କରିଛି। ଏହି ମହାମାରୀ ଯୋଗୁଁ ଲକ୍ଷ ଲକ୍ଷ ଲୋକ ମୃତ୍ୟୁବରଣ କରିଛନ୍ତି। ଏହା ଦ୍ଵାରା ବିଶ୍ଵର ସମସ୍ତ ଦେଶରେ ଆର୍ଥିକ ସ୍ଥିତି ଖରାପ ହେବାରେ ଲାଗିଛି। କରୋନା ସଂକ୍ରମଣ ହ୍ରାସ ପାଉଥିବାରୁ ଏବଂ କରୋନା ଟିକା ଯୋଗୁଁ ଲୋକଙ୍କ ମନରେ ନୂଆ ଆଶା ସଂଚାର ସୃଷ୍ଟି ହେଉଛି।
କୋରୋନା ଟିକା ଯୋଗୁଁ ନିଜର ଜୀବନକୁ ସୁରକ୍ଷିତ ରଖିବା ସହ ଜୀବିକାକୁ ପୁନଶ୍ଚ କ୍ରିୟାଶୀଳ କରିବା ପାଇଁ ଲୋକେ ଅଣ୍ଟା ସଳଖ କରୁଛନ୍ତି। ହେଲେ ଏହା ଭିତରେ ଆଜି ଏକ ଚିନ୍ତାଜନକ ଖବର ସାଉଦି ଆରବ ଦେଶରୁ ଆସିଛି। ସାଉଦି ଆରବ କରୋନା ମହାମାରୀକୁ ଦୃଷ୍ଟିରେ ରଖି ସାଉଦି ଆରବ ଭାରତ ଓ ଆମେରିକା ସମେତ ୨୦ ଟି ଦେଶରୁ ବିମାନ ଚଳାଚଳ ଉପରେ ପ୍ରତିବନ୍ଧକ ଲଗାଇଛି। ସାଉଦି ଆରବ ଆଗାମୀ କିଛିଦିନ ପାଇଁ ଏହି କଟକଣା ଲଗାଇଥିବାବେଳେ ଆଜି ରାତି ୯ଟାରୁ ଏହା ଲାଗୁ ହେବ।
ଏହି କଟକଣା ଭାରତ, ପାକିସ୍ତାନ, ୟୁଏଇ, ଲେବାନନ୍, ଜର୍ମାନୀ, ବ୍ରିଟେନ, ଆୟର୍ଲାଣ୍ଡ, ଇଟାଲୀ, ଆମେରିକା ସମେତ ମୋଟ ୨୦ ଟି ଦେଶ ଉପରେ ଲାଗୁ କରାଯାଇଛି। ଏହା ଦ୍ବାରା ଭାରତ ଏବଂ ପାକିସ୍ତାନ ସବୁଠୁ ବେଶୀ ପ୍ରଭାବିତ ହେବେ, ଯେଉଁଠୁ ରୋଜଗାର ପାଇଁ ଅଧିକ ଲୋକ ସାଉଦି ଆରବ ଯାଇଥାନ୍ତି।