ଭୁବନେଶ୍ବର: ରାଜ୍ୟ ସରକାର ଫେବୃୟାରୀ ମାସ ପାଇଁ ନୂଆ ଗାଇଡ ଲାଇନ ଆଣିଛନ୍ତି। ଏ ନେଇ ସ୍ବତନ୍ତ୍ର ରିଲିଫ କମିଶନର ତଥା ଉନ୍ନୟନ କମିଶନର ପ୍ରଦୀପ ଜେନା ବିଶେଷ ସୂଚନା ଦେଇଛନ୍ତି। ସେହି ଅନୁସାରେ ଏଣିକି ରାଜ୍ୟରେ ସମସ୍ତ ଦୋକାନ ବଜାର ଖୋଲା ରହିବ। ହେଲେ ଏହା ରାତି 10 ଟା ବେଳକୁ ବନ୍ଦ ରହିବ ବୋଲି ନିର୍ଦ୍ଦେଶ ଜାରୀ ରହିଛି।
ସୂଚନା ଅନୁସାରେ ସହରାଞ୍ଚଳରେ ନାଇଟ କର୍ଫୁକୁ କୋହଳ କରାଯାଇଛି। ଏଣିକି ରାତି 9ଟା ନୁହେଁ ରାତି 10ଟାରୁ ଏହା ଲାଗୁ ହେବ। ସକାଳ 5ଟାରୁ ରାତି 10ଟା ପର୍ଯ୍ୟନ୍ତ ଏହି ନାଇଟ କର୍ଫ୍ୟୁ ବଳବତ୍ତର ରହିବ। ଏଥିରେ ସମସ୍ତ ସିନେମା ହଲ, ଦୋକାନ ବଜାର, ସପିଂ ମଲ, ହାଟ, ସୁଇମିଂ ପୁଲ, ଥିଏଟର ହଲ, ମନୋରଂଜନ ପ୍ରେକ୍ଷାଳୟ, ସାଂସ୍କୃତିକ ହଲ ସବୁ ଖୋଲାଯିବ। ଏଗୁଡିକ କେବଳ ସକାଳ 5 ଟାରୁ ରାତି 10 ପର୍ଯ୍ୟନ୍ତ ଖୋଲା ରହିବ।
ସେହିପରି ଫେବୃୟାରୀରେ ସମସ୍ତ ପୂଜାପାଠ କଟକଣା ଭିତରେ କରାଯିବ ବୋଲି ଘୋଷଣା କରାଯାଇଛି। ଯେପରିକି ସରସ୍ବତୀ ପୂଜା, ମାଘ ସପ୍ତମୀ, ମାଘ ପୂର୍ଣ୍ଣିମା ପାଳନ କରାଯିବ। ତେବେ ସରସ୍ବତୀ ପୂଜା କମ ଛାତ୍ରଛାତ୍ରୀଙ୍କୁ ନେଇ ସ୍କୁଲରେ କରିବାକୁ କୁହାଯାଇଛି। ସେହିପରି ବାହାରେ ମଧ୍ୟ ମଣ୍ଡପ କରି ଏହା କରାଯାଇପାରିବ। ମନ୍ଦିରରେ ସରସ୍ବତୀ ପୂଜା ବିନା ଭକ୍ତରେ କରିବାକୁ କୁହାଯାଇଛି।
ସେହିପରି ମାଘ ବୁଡରେ କୌଣସି ହ୍ରଦ କିମ୍ବା ଜଳାଶୟ କିମ୍ବା ସମୁଦ୍ରରେ ଏକାଠି ହେବାକୁ ବାରଣ କରାଯାଇଛି। ହେଲେ ଏ ସଂପର୍କିତ ପୂଜା ମନ୍ଦିର ଭିତରେ କରାଯିବାକୁ ରାଜ୍ୟ ସରକାର ଅନୁମତି ପ୍ରଦାନ କରିଛନ୍ତି।
ରାଜ୍ୟର ସମସ୍ତ ସରକାରୀ ଏବଂ ଘରୋଇ ଅଫିସ ଶତପ୍ରତିଶତ କର୍ମଚାରୀଙ୍କୁ ନେଇ କାମ କରିବା ପାଇଁ ଅନୁମତି ପ୍ରଦାନ କରିଛନ୍ତି। ପୂର୍ବରୁ ଏଥିରେ କଟକଣା କରାଯାଇ ପଚାଶ ପ୍ରତିଶକୁ ହ୍ରାସ କରାଯାଇଥିଲା। ହେଲେ ପୂର୍ବରୁ ଜାରୀ ଥିବା କୋଭିଡ କଟକଣାକୁ ପୂର୍ଣ୍ଣମାତ୍ରାରେ ଲାଗୁ କରି ଅଫିସ ପରିଚାଳିତ କରିବେ ବୋଲି କୁହାଯାଇଛି।