ଗୁରୁବାର ବିଜେପିର ସାଂସଦ ପ୍ରାର୍ଥୀ ପ୍ରଜ୍ଞା ସିଂ ଠାକୁରଙ୍କ ବିବାଦୀୟ ବୟାନ ଉପରେ ନିଜର ରିପୋର୍ଟ ଦାଖଲ କରିଛନ୍ତି ମଧ୍ୟପ୍ରଦେଶ ସିଇଓ । ଉଲ୍ଲେଖଯୋଗ୍ୟ ଯେ, ଗୁରୁବାର ଗାନ୍ଧିଜୀଙ୍କ ହତ୍ୟାକାରୀ ନାଥୁରାମ ଗଡ୍ସେଙ୍କୁ ଜଣେ ଦେଶଭକ୍ତ ଭାବରେ ସାଧ୍ବୀ ବର୍ଣ୍ଣନା କରିଥିଲେ । ଭୋପାଳରୁ ବିଜେପିର ସାଂସଦ ପ୍ରାର୍ଥୀଙ୍କ ଏହି ବିବାଦୀୟ ମନ୍ତବ୍ୟର ରିପୋର୍ଟ ମଧ୍ୟପ୍ରଦେଶ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭି ଏଲ୍ କାନ୍ତରାଓଶୁକ୍ରବାର ଦିନ ନିର୍ବାଚନ କମିଶନଙ୍କୁ ପ୍ରଦାନ କରିଛନ୍ତି । ଗତକାଲି ଏହି ମାମଲାର ବିସ୍ତୃତ ରିପୋର୍ଟ ପ୍ରଦାନ କରିବା ନିମନ୍ତେ, ଅଗର ମଲଓ୍ବା ଜିଲ୍ଲାର ମୁଖ୍ୟ ନିର୍ବାଚନ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ସିଇଓ । ନିର୍ବାଚନ ଅଧିକାରୀଙ୍କ ରିପୋର୍ଟ ପରେ ଆଜି ସିଇଓ ନିଜର ରିପୋର୍ଟ ପ୍ରଦାନ କରିଛନ୍ତି । ଘଟଣାକ୍ରମରେ ଏହି ମନ୍ତବ୍ୟକୁ ନିଜର ବ୍ୟକ୍ତିଗତ ମନ୍ତବ୍ୟ ବୋଲି ଅଭିହିତ କରିବା ସହିତ ଏନେଇ କ୍ଷମା ପ୍ରାର୍ଥନା କରିଥିଲେ ସାଧ୍ବୀ । ଏହି ଘଟଣା ଉପରେ ନିର୍ବାଚନ କମିଶନ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବା ନେଇ ଆଶା କରା ଯାଉଛି । ପୂର୍ବରୁ ସାଧ୍ବୀଙ୍କୁ ବିବାଦୀୟ ବୟାନ ନେଇ ତାଙ୍କୁ ତିନି ଦିନ ପାଇଁ ପ୍ରଚାର କରିବାରୁ ବାସନ୍ଦ କରିଥିଲେ ନିର୍ବାଚନ କମିଶନ ।
