ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାୟୋପିକ୍ର ପୋଷ୍ଟର ସୋମବାର ଲଞ୍ଚ କରାଯାଇଛି। କେନ୍ଦ୍ରମନ୍ତ୍ରୀ ନିତିନ ଗଡକରୀ ଓ ଅଭିନେତା ବିବେକ ଓବରଏ ମହାରାଷ୍ଟ୍ରର ନାଗପୁରରେ ଏହି ପୋଷ୍ଟର ଲଞ୍ଚ କରିଛନ୍ତି। ଏହି ପୋଷ୍ଟରରେ ‘ପୁଣିଥରେ ଆସୁଛନ୍ତି ପିଏମ୍ ନରେନ୍ଦ୍ର ମୋଦି, ଏବେ କେହି ଅଟକାଇ ପାରିବେ ନାହିଁ’ ବୋଲି ଏକ ବାର୍ତ୍ତା ରହିଛି । ଏହି ପୋଷ୍ଟରରେ ନରେନ୍ଦ୍ର ମୋଦିଙ୍କ ଭୂମିକାରେ ଅବତୀର୍ଣ୍ଣ ହୋଇଥିବା ଅଭିନେତା ବିବେକ ଓବରୟ ଶଙ୍ଖ ଫୁଙ୍ଗୁଥିବାର ନଜର ଆସିଛନ୍ତି । ଏହି ପୋଷ୍ଟରକୁ ନିର୍ଦ୍ଦେଶକ ଟୁଇଟର୍ରେ ସେୟାର କରି ଲେଖିଛନ୍ତି ଯେ, ଭାରତର କିଛି ବଡ଼ କାମ କରିବା ପୂର୍ବରୁ ଶଙ୍ଖ ବଜାଯାଇଥାଏ । ଲୋକ ସଭା ନିର୍ବାଚନର ଏକ୍ଜିଟ୍ ପୋଲ୍କୁ ଦେଖି ଫିଲ୍ମର ନିର୍ମାତା ଉତ୍ସାହିତ ହୋଇ ସୋମବାର ଏହି ପୋଷ୍ଟର ଲଞ୍ଚ କରିଥିବା କୁହାଯାଉଛି। ଫିଲ୍ମର ଏକ ସ୍ପେଶାଲ ସ୍କ୍ରିନିଂ ସୋମବାର ସନ୍ଧ୍ୟାରେ ଦିଲ୍ଲୀରେ ହେବାର କାର୍ଯ୍ୟକ୍ରମ ରହିଛି। ଯେଉଁଥିରେ ଭାଜପାର ବହୁ ନେତାଙ୍କୁ ନିମନ୍ତ୍ରଣ କରାଯାଇଛି। ସୂଚନା ଅନୁଯାୟୀ, ଆସନ୍ତା ଶୁକ୍ରବାର ଫିଲ୍ମ ରିଲିଜ୍ ହେବ। ମୋଦିଙ୍କ ଜୀବନୀକୁ ନେଇ ଏହି ଫିଲ୍ମଟି ଏପ୍ରିଲ୍ ୧୧ରେ ରିଲିଜ୍ ହେବାକୁ ରହିଥିବାବେଳେ ଦେଶରେ ନିର୍ବାଚନ ଆଚାର ସଂହିତା ଲାଗୁ ହୋଇଥିବାରୁ ନିର୍ବାଚନ ଆୟୋଗ ତରଫରୁ ଏହାର ରିଲିଜ୍କୁ ବନ୍ଦ କରାଯାଇଥିଲା । ଏହି ଫିଲ୍ମରେ ମୁଖ୍ୟ ଭୂମିକାରେ ବିବେକ ଓବରୟ ଅଭିନୟ କରୁଥିବାବେଳେ ଏଥିରେ ବର୍ଖା ବିଷ୍ଟି, ବୋମନ ଇରାନୀ ପ୍ରମୁଖ ଅଭିନୟ କରିଛନ୍ତି । ଏହି ଫିଲ୍ମକୁ ଓମଙ୍ଗ କୁମାର ନିର୍ଦ୍ଦେଶନା ଦେଇଛନ୍ତି ।
