ଇଭିଏମ୍ ନେଇ ଦେଶର ବିଭିନ୍ନ ପ୍ରାନ୍ତରେ ବିବାଦ ଦେଖା ଦେବା ପରେ ଏନେଇ ନିର୍ବାଚନ କମିଶନ ସ୍ପଷ୍ଟୀକରଣ ଦେଇଛନ୍ତି। ମଙ୍ଗଳବାର ଦିନ ନିର୍ବାଚନ କମିଶନଙ୍କ ପକ୍ଷରୁ ଏନେଇ ସ୍ପଷ୍ଟୀକରଣ ଦେଇ କୁହାଯାଇଛି ଯେ, ଇଭିଏମ୍କୁ ନେଇ କୌଣସି ମନୁଷ୍ୟକୃତ ତ୍ରୁଟି ହୋଇନାହିଁ। ଆସନ୍ତା ମେ ୨୩ରେ ନିର୍ବାଚନୀ ଫଳାଫଳ ପ୍ରକାଶ ପାଇବାର ଥିବା ବେଳେ ବିଭିନ୍ନ ସ୍ଥାନରେ ଇଭିଏମ୍ ସ୍ଥାନାନ୍ତରଣ ବିନା ସୁରକ୍ଷା ଅଧିକାରୀଙ୍କ ସହାୟତାରେ ହେଉଛି ବୋଲି ଭିଡିଓମାନ ସୋସିଆଲ ନେଟଓ୍ବର୍କରେ ପ୍ରସାରିତ ହୋଇଥିଲା। ଘାଜିପୁର, ଚନ୍ଦୌଲି, ଡୋମାରିଆଗଞ୍ଜ ଏବଂ ଝାନ୍ସୀରେ ଏଭଳି କାଣ୍ଡ ହୋଇଥିବାର ସୂଚନା ମିଳିଥିଲା। ନିର୍ବାଚନ କମିଶନ କହିଥିଲେ, ଘାଜିପୁରରେ ଷ୍ଟ୍ରଙ୍ଗରୁମ୍ ସୁରକ୍ଷା ବ୍ୟବସ୍ଥା ମଧ୍ୟରେ ରହିଥିବା ବେଳେ ବିଭିନ୍ନ ଦଳର ପ୍ରାର୍ଥୀମାନେ ଏହାକୁ ଜଗି ରହିଛନ୍ତି ତେଣୁ ଏପରି ଅଭିଯୋଗ ଅମୂଳକ ବୋଲି କହିଛନ୍ତି। ସେହିପରି ଚନ୍ଦୌଲୀରେ ମଧ୍ୟ ସମାନ ଭାବରେ ଇଭିଏମ୍ ଗୁଡିକ ଷ୍ଟ୍ରଙ୍ଗରୁମ୍ରେ ସୁରକ୍ଷିତ ଭାବରେ ରହିଛି ବୋଲି କମିଶନ ପ୍ରକାଶ କରିଥିଲେ। ଝାନ୍ସୀରେ ମଧ୍ୟ ସମାନ ସୁରକ୍ଷା ବ୍ୟବସ୍ଥା ମଧ୍ୟରେ ଷ୍ଟ୍ରଙ୍ଗ ରୁମ୍ରେ ସୁରକ୍ଷିତ ରହିଥିବା ବେଳେ ଡୋମାରିଆଗଞ୍ଜରେ ଜିଲ୍ଲା ମାଜିଷ୍ଟ୍ରେଟ୍ ଏବଂ ପୋଲିସ୍ କମିଶନର ଏହାର ସୁରକ୍ଷା ଦାୟିତ୍ବରେ ରହିଛନ୍ତି। ଇଭିଏମ୍ ଏବଂ ଭିଭିପାଟ୍ ସମସ୍ତ ରାଜନୈତିକ ଦଳର କର୍ମୀଙ୍କ ସମ୍ମୁଖରେ ଭିଡିଓଗ୍ରାଫି ଜରିଆରେ ରଖାଯାଇଛି ତେଣୁ ଏଥିରେ ମଧ୍ୟ ହେରଫେର ହେବାର କୌଣସି ସମ୍ଭାବନା ନଥିବା କମିଶନଙ୍କ ପକ୍ଷରୁ କୁହାଯାଇଛି।
