ଚଳିତ ଲୋକସଭା ନିର୍ବାଚନର ଫଳାଫଳ ଗୋଟିଏ ଦିନ ପରେ ପ୍ରକାଶ ପାଇବାକୁ ଯାଉଛି । ଏହାର ଗୋଟିଏ ଦିନ ପୂର୍ବରୁ ଇଭିଏମ୍କୁ ଦୋଷ ଦେଉଥିବା ବିପକ୍ଷ ନେତାଙ୍କୁ କଡା ଜବାବ ଦେଇଛନ୍ତି ବିଜେପି ନେତା ରବିଶଙ୍କର ପ୍ରସାଦ । ପ୍ରସାଦ କହିଛନ୍ତି ଜନତା ମୋଦିଙ୍କୁ ଭୋଟ କରିବାରୁ ସେ ବିଜୟୀ ହେବାକୁ ଯାଉଛନ୍ତି ତେଣୁ ବିରୋଧୀ ଦଳ ପରାଜୟକୁ ସମ୍ମାନର ସହିତ ଗ୍ରହଣ କରିବା ଉଚିତ୍ । ସେ ଆହୁରି ମଧ୍ୟ କହିଛନ୍ତି, ବିପକ୍ଷର ଯେ କୌଣସି ନେତା ନିର୍ବାଚନରେ ବିଜୟୀ ହେଲେ ଏହା ଜନ ସାଧାରଣଙ୍କ ସମର୍ଥନରେ ବିଜୟୀ ହେଉଛନ୍ତି ମାତ୍ର କୌଣସି ବିଜେପି ନେତା ବିଜୟୀ ହେଲେ ବିପକ୍ଷ ଦଳ ସର୍ବଦା ଇଭିଏମ୍କୁ ନେଇ ରାଜନୀତି କରୁଛନ୍ତି । ପଶ୍ଚିମବଙ୍ଗରେ ମମତା ବାନାର୍ଜୀ, ଆନ୍ଧ୍ର ପ୍ରଦେଶରେ ଏନ୍ ଚନ୍ଦ୍ରବାବୁ ନାଇଡୁ ଏବଂ ପଞ୍ଜାବରେ ଅମରିନ୍ଦର ସିଂ ବିଜୟୀ ହେବା ବେଳେ ସମାନ ନେତା ମାନେ ଇଭିଏମ୍ର ସତ୍ୟତା ନେଇ ଆଦୌ ପ୍ରଶ୍ନ କରି ନାହାନ୍ତି । ମାତ୍ର ଯେତେବେଳେ ଜନମତ ସମାନ ନେତାଙ୍କ ବିରୋଧରେ ଯାଉଛି ସେମାନେ ଇଭିଏମ୍ର ଦୋଷ ଦେଉଛନ୍ତି । ଜନମତକୁ ସମ୍ମାନ ଜଣାଇ ବିପକ୍ଷ ଦଳ ପରାଜୟକୁ ସମ୍ମାନର ସହିତ ଗ୍ରହଣ କରନ୍ତୁ ବୋଲି ପ୍ରସାଦ କହିଛନ୍ତି ।
