ନିର୍ବାଚନ ଫଳ ବାହାରିବାକୁ ଆଉ ଗୋଟିଏ ଦିନ । ତେବେ ଚଳିତ ଥର ନିର୍ବାଚନ ପୂର୍ବବର୍ତ୍ତୀ ଓ ପରବର୍ତ୍ତୀ ରାଜନୀତି ବେଶ୍ ସରଗରମ ରହିଛି । ୨୦୧୯ ଲୋକସଭା ନିର୍ବାଚନରେ ଇଭିଏମ୍ ଓ ଭିଭିପାଟ ଦ୍ବାରା ନିର୍ବାଚନ ପ୍ରକ୍ରିୟା ସମ୍ପନ୍ନ ହୋଇଛି । ତେବେ ଏହାକୁ ବିରୋଧୀ ଦଳ ସ୍ବର ଉଠାଇଛି । ଏହାକୁ ନେଇ ଭାରତୀୟ ରାଜନୀତିରେ ହଲଚଲ୍ ସୃଷ୍ଟି ହୋଇଛି । ଭୋଟ ଗଣତି ବେଳେ ସବୁ ବୁଥ୍ର ଇଭିଏମ ଭୋଟ ସହିତ ଭିଭିପାଟ ସ୍ଲିପ ମିଳାଇ ଭୋଟ ଗଣତି କରିବା ଲାଗି ବିରୋଧୀମାନେ କରୁଥିବା ଦାବି ଏବେ ବିବାଦୀୟ ପରିସ୍ଥିତି ସୃଷ୍ଟି କରିଛି। ସୁପ୍ରିମକୋର୍ଟ ବିରୋଧୀ ଦଳଗୁଡ଼ିକର ଆବେଦନକୁ ଖାରଜ କରି ଗୋଟିଏ ବିଧାନସଭା କ୍ଷେତ୍ରର କେବଳ ୫ଟି ବୁଥର ଇଭିଏମ ସହ ଭିଭିପାଟ ସ୍ଲିପ ମିଳାଇ ଭୋଟ ଗଣନା କରିବାକୁ ନିର୍ଦେଶ ଦେଇଥିବାରୁ ଏହା ଉପରେ ପ୍ରଶ୍ନ ଉଠାଇଛନ୍ତି କଂଗ୍ରେସ ନେତା ଉଦିତ୍ ରାଜ। ସୁପ୍ରିମ କୋର୍ଟ ବି ଏହି ନିର୍ବାଚନୀ କାରସାଦିରେ ସମ୍ପୃକ୍ତ ଅଛନ୍ତି ବୋଲି ବିଜେପି ଛାଡ଼ି କଂଗ୍ରେସରେ ଯୋଗ ଦେଇଥିବା ଡାକ୍ତର ଉଦିତ ରାଜ ଅଭିଯୋଗ କରି ବିବାଦ ଘେରକୁ ଚାଲିଆସିଛନ୍ତି। ଏପରି କି ସେ ସୁପ୍ରିମକୋର୍ଟଙ୍କ ବିଶ୍ଵସନୀୟତା ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସୁପ୍ରିମକୋର୍ଟ କାହିଁକି ଶତ ପ୍ରତିଶତ ଭିଭିପାଟ୍ର ଗଣତି ଚାହୁଁ ନାହାଁନ୍ତି । କ’ଣ ସିଏ ବି ଏହି ଠକାମୀରେ ସାମିଲ ଅଛନ୍ତି ବୋଲି ଉଦିତ ରାଜ ପ୍ରଶ୍ନ କରିଛନ୍ତି । ସେ ଆହୁରି ମଧ୍ୟ କହିଛନ୍ତି କି ନିର୍ବାଚନ ପ୍ରକ୍ରିୟାରେ ପ୍ରାୟ ତିନି ମାସ ସମସ୍ତ ସରକାରୀ କାମ ମାନ୍ଦା ପଡ଼ି ଯାଇଛି । ଯଦି ଭୋଟ ଗଣତି ପାଇଁ ଦୁଇ ଦିନ ସମୟ ଲାଗେ ତାହା ହେଲେ କ’ଣ ଫରକ୍ ପଡ଼ିବ । ସେ କୋର୍ଟଙ୍କ ସମେତ ନିର୍ବାଚନ ଆୟୋଗଙ୍କ ଉପରେ ମଧ୍ୟ ଅଭିଯୋଗ କରିଛନ୍ତି । ନିର୍ବାଚନ ଆୟୋଗ ମଧ୍ୟ ବିକ୍ରି ହୋଇ ସାରିଛନ୍ତି ବୋଲି କହିଛନ୍ତି ଉଦିତ୍ । ସେଥିପାଇଁ ଦେଶରେ ୭ଟି ପର୍ଯ୍ୟାୟ ନିର୍ବାଚନ ଅନୁଷ୍ଠିତ କରାଗଲା । ଦେଶକୁ ବଞ୍ଚାଇବାକୁ ହେଲେ ଆନ୍ଦୋଳନ କରିବାକୁ ପଡ଼ିବ ବୋଲି କହିଛନ୍ତି ଉଦିତ୍ ।
