ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଶୁକ୍ରବାର ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀ ଏବଂ ମୁରଲୀ ମନୋହର ଯୋଶୀଙ୍କୁ ଭେଟିଛନ୍ତି । ଗୁରୁବାର ନିର୍ବାଚନୀ ଫଳାଫଳ ପ୍ରକାଶ ପାଇବା ପରେ ସ୍ପଷ୍ଟ ବହୁମତ ସହିତ କ୍ଷମତାକୁ ପ୍ରତ୍ୟାବର୍ତ୍ତନ କରିବା ପରେ ଦୁଇ ବରିଷ୍ଠ ନେତାଙ୍କୁ ଭେଟିଛନ୍ତି ମୋଦି-ଶାହା । ଉଭୟ ନେତାଙ୍କ ପ୍ରତି ନିଜର ସମ୍ମାନ ପ୍ରଦର୍ଶନ କରି ମୋଦି ଏକ ଟ୍ବିଟ୍ କରିଛନ୍ତି । ଉଭୟ ନେତାଙ୍କୁ ଭେଟି ସରକାର ଗଠନ ପାଇଁ ଆଶୀର୍ବାଦ ନେଇଛି ବୋଲି କହିଛନ୍ତି ମୋଦି । ଉଭୟ ନେତା ଦୁଇ ଦଶନ୍ଧିରୁ ଅଧିକ ସମୟ ଧରି ଦଳର ସେବା କରିବା ସହିତ ଦଳକୁ ଏକ ନୂତନ ଦିଶା ପ୍ରଦାନ କରିଛନ୍ତି । ଦଳ ଆଜି ଯେଉଁ ସ୍ଥାନରେ ରହିଛି ଏହା ପଛରେ ଉଭୟ ବରିଷ୍ଠ ନେତାଙ୍କର ବୃହତ ଅବଦାନ ରହିଛି ବୋଲି ମୋଦି ଟ୍ବିଟ୍ କରିଛନ୍ତି । ଏହି ଟ୍ବିଟ୍ ସହିତ ଉଭୟ ଆଡଭାନୀଙ୍କୁ ଭେଟୁଥିବାର ଏକ ଫଟୋ ଟ୍ବିଟ୍ଟରରେ ସେୟାର କରିଥିଲେ ମୋଦି । ସେହିପରି ଅନ୍ୟ ଏକ ଟ୍ବିଟ୍ରେ ମୋଦି ମୁରଲୀ ମନୋହର ଯୋଶୀଙ୍କୁ ଭେଟିଥିବା ନେଇ ଟ୍ବିଟ୍ କରିଛନ୍ତି । ମୁରଲୀ ମନୋହର ଯୋଶୀ ଜଣେ ବିଜ୍ଞ ବ୍ୟକ୍ତି ଏବଂ ଭାରତୀୟ ଶିକ୍ଷା ବ୍ୟବସ୍ଥାର ଉତ୍ଥାନ ନେଇ ତାଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି । ବିଜେପି ଏବଂ ଦଳୀୟ କାର୍ଯ୍ୟକର୍ତ୍ତାଙ୍କୁ ସଙ୍ଗଠିତ କରିବା ପାଇଁ ଯୋଶୀ ସର୍ବଦା କାର୍ଯ୍ୟରତ ବୋଲି ମୋଦି କହିଛନ୍ତି ।
Modi shah met Advani and joshi