ନୂଆଦିଲ୍ଲୀ: ନୂଆ ବର୍ଷର ପ୍ରଥମ ଦିନରେ ତୃତୀୟ ଥର ପାଇଁ ସନ୍ଧ୍ୟା ୬.୩୦ ରେ ପୁଣି ଏକ ଭୂମିକମ୍ପ ହୋଇଛି। ଏଥର ଲଦାଖରେ ଭୂମିକମ୍ପ ଅନୁଭୂତ ହୋଇଛି। ନ୍ୟାସନାଲ ସେଣ୍ଟର ଫର ସେସମୋଲୋଜି ଦ୍ୱାରା ଏହି ଭୂମିକମ୍ପ ହୋଇଥିବା ସ୍ପଷ୍ଟ କରାଯାଇଛି। ରିକ୍ଟର ସ୍କେଲରେ ଭୂକମ୍ପର ତୀବ୍ରତା ୪.୬ ଥିଲା।
ଲଦାଖର ଅଧିକାଂଶ ଅଞ୍ଚଳ ପାର୍ବତ୍ୟ, ତେଣୁ ବିପଦ ହେବାର ସମ୍ଭାବନା ମଧ୍ୟ ଅଧିକ। ତେବେ କମ୍ପନ ହେତୁ ଜୀବନ କିମ୍ବା ସମ୍ପତ୍ତି ନଷ୍ଟ ହେବାର କୌଣସି ଖବର ନାହିଁ। କୁହାଯାଉଛି ଯେ, ଯେଉଁଠାରେ ଭୂକମ୍ପର କେନ୍ଦ୍ରସ୍ଥଳ ଥିଲା, ତାହା କାର୍ଗିଲଠାରୁ ୨୫୦ କିଲୋମିଟର ଦୂରରେ।
ନ୍ୟାସନାଲ ସେଣ୍ଟର ଫର ସେସମୋଲୋଜି ଅନୁଯାୟୀ ଭୂକମ୍ପର ଗଭୀରତା ଭୂମିଠାରୁ ୧୫୦ କିଲୋମିଟର ତଳେ ଥିଲା। କେନ୍ଦ୍ରର ସୂଚନାରେ କୁହାଯାଇଛି ଯେ ଜାନୁଆରୀ ୧ ତାରିଖ ରବିବାର ଦିନ ଲଦାଖରେ ରାତି ୬:୩୨:୫୭ ରେ ଭୂମିକମ୍ପ ଅନୁଭୂତ ହୋଇଛି। କାର୍ଗିଲର ସ୍ଥାନୀୟ ବାସିନ୍ଦା ଏହାର କମ୍ପନ ଅନୁଭବ କରିଥିଲେ।
ଏହା ପୂର୍ବରୁ ଦିଲ୍ଲୀ-ଏନସିଆରରେ ଭୂମିକମ୍ପ ଅନୁଭୂତ ହୋଇଥିଲା, ଯାହାର ତୀବ୍ରତା ରିକ୍ଟରର ସ୍କେଲରେ ୩.୮ ଥିଲା। ଏହା ପରେ ବଙ୍ଗୋପସାଗରରେ ସକାଳ ପ୍ରାୟ ୧୧ ଟା ସମୟରେ ଭୂମିକମ୍ପ ହୋଇଥିଲା। ଏହାର ତୀବ୍ରତା ରିକ୍ଟର ସ୍କେଲରେ ୪.୫ ରେ ମାପ କରାଯାଇଥିଲା।
