ଓ୍ବାଇଏସ୍ଆର୍ କଂଗ୍ରେସ ପ୍ରମୁଖ ଓ୍ବାଇ.ଏସ୍. ଜଗନମୋହନ ରେଡ୍ଡି ଆନ୍ଧପ୍ରଦେଶର ବିଭାଜନ ପରେ ରାଜ୍ୟର ଦ୍ବିତୀୟ ମୁଖ୍ୟମନ୍ତ୍ରୀ ରୂପେ ଗୁରୁବାର ଦିନ ଶପଥ ଗ୍ରହଣ କରିଛନ୍ତି । ରାଜ୍ୟପାଳ ଇ.ଏସ୍ ପଲ୍ ନରସିହ୍ମା ବିଜୟଓ୍ବାଡା ନିକଟସ୍ଥ ଆଇଜିଏମସି ଷ୍ଟାଡିୟମ୍ଠାରେ ଏକ ଭବ୍ୟ ସମାରୋହରେ ୧୨ଘଟିକା.୨୩ମିନିଟ୍ ସମୟରେ ୪୬ ବର୍ଷୀୟ ଜଗନେମାହନଙ୍କୁ ପଦ ଏବଂ ଗୋପନୀୟତାର ଶପଥ ପାଠ କରାଇଛନ୍ତି । ରେଡ୍ଡିଙ୍କ ଦଳ ଚଳିତ ବିଧାନସଭା ଓ ଲୋକସଭାରେ ବିପୁଳ ଭୋଟ୍ରେ ବାଜିମାତ୍ କରିଛି । ରାଜ୍ୟ ବିଧାନସଭାରେ ୧୭୫ଟି ଆସନରୁ ୧୫୧ଟି ଆସନ ପାଇଥିବାବେଳେ ୨୫ ଲୋକସଭା ଆସନରୁ ୨୨ଟି ବାଜିମାତ୍ କରିଛି । ତେବେ ଜଗନମୋହନ ଏକାକୀ ଶପଥ ନେଇଛନ୍ତି । ତାଙ୍କ ମନ୍ତ୍ରିପରିଷଦର ଗଠନ ଜୁନ୍ ୭କୁ କରାଯିବା ନେଇ ସୂଚନା ରହିଛି । ପ୍ରଥମଥର ପାଇଁ ନୂଆଦିଲ୍ଲୀସ୍ଥିତ ଆନ୍ଧ୍ରପ୍ରଦେଶ ଭବନରେ ଶପଥ ଗ୍ରହଣ ସମାରୋହ ଦେଖିବା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି । ଏହି ଭବ୍ୟ ସମାରୋହରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଓ ଡିଏମ୍କେ ଦଳର ସଭାପତି ଏମ୍ କେ ଷ୍ଟାଲିନ୍ ପ୍ରମୁଖ ଯୋଗ ଦେଇଛନ୍ତି । ଏହି ସମାରୋହରେ ପ୍ରାୟ ୪୦ ହଜାର ଜନତା ଏକାଠି ହୋଇଥିଲେ । ଜଗନ୍ମୋହନ ଆଜି ପ୍ରଧାନମନ୍ତ୍ରୀଙ୍କ ଶପଥ ସମାରୋହ ଉତ୍ସବରେ ସାମିଲ୍ ମଧ୍ୟ ହେବେ ।
