ନୂଆଦିଲ୍ଲୀ: ପଶ୍ଚିମବଙ୍ଗରେ ତୃଣମୁଲ କଂଗ୍ରେସ ଏବଂ କଂଗ୍ରେସ ମଧ୍ୟରେ ସିଟ୍ ବାଣ୍ଟିବା ସୂତ୍ର ପ୍ରାୟ ଚୂଡାନ୍ତ ହୋଇଛି। ସୂଚନାନୁସାରେ, ମମତା ବାନାର୍ଜୀ ପଶ୍ଚିମବଙ୍ଗର ୪୨ ଟି ସିଟ୍ ମଧ୍ୟରୁ ୫ ଟି କଂଗ୍ରେସକୁ ଦେବାକୁ ପ୍ରସ୍ତୁତ ଅଛନ୍ତି। ପ୍ରକାଶ ଯେ ପୂର୍ବରୁ ମମତା ବାନାର୍ଜୀ କଂଗ୍ରେସକୁ ମାତ୍ର ୨ ଟି ଆସନ ପ୍ରସ୍ତାବ ଦେଇଥିଲେ। ସୂଚନାନୁସାରେ, ପଶ୍ଚିମବଙ୍ଗରେ କଂଗ୍ରେସ ମାଲଦାରୁ ୨ ଟି ଆସନ, ମୁର୍ସିଦାବାଦ, ରାଇଗଞ୍ଜ, ଦାର୍ଜିଲିଂ ଏବଂ ପୁରୂଲିଆରୁ ଗୋଟିଏ ଲେଖାଏଁ ଆସନ ଦାବି କରିଛି।
ତେବେ କଂଗ୍ରେସ ଆଉ ଗୋଟିଏ ସିଟ୍ ବୃଦ୍ଧି କରିବାକୁ ଦାବି କରୁଛି ଏବଂ ମୋଟ ୬ ଟି ସିଟ୍ ଚାହୁଁଛି। କଂଗ୍ରେସ ହାଇକମାଣ୍ଡ ନିଜେ ମମତା ବାନାର୍ଜୀଙ୍କ ସହ ଆସନ ବଣ୍ଟନ ସମ୍ପର୍କରେ କଥାବାର୍ତ୍ତା କରୁଛନ୍ତି। ପଶ୍ଚିମବଙ୍ଗରେ ଆସନ ବଦଳରେ ମମତା ବାନାର୍ଜୀ ଆସାମରେ ୨ ଟି ଏବଂ ମେଘାଳୟରେ ୧ ଟି ଆସନ ଦାବି କରୁଛନ୍ତି। ସହମତି ପ୍ରକାଶ ପାଇବା ମାତ୍ରେ ଆସନ ଘୋଷଣା କରାଯିବ ବୋଲି ସୂତ୍ରରୁ ପ୍ରକାଶ।
ମମତା ବାନାର୍ଜୀ ଚଳିତ ମାସ ଆରମ୍ଭରେ ମାଲଦାଠାରେ ଅନୁଷ୍ଠିତ ଏକ ବୈଠକରେ କହିଛନ୍ତି ଯେ ମୁଁ କଂଗ୍ରେସକୁ କହିଥିଲି, ଏଠାରେ ଆପଣଙ୍କର ଜଣେ ବି ବିଧାୟକ ନାହାଁନ୍ତି, ମୁଁ ଦୁଇଟି ସାଂସଦ ଆସନ ପ୍ରଦାନ କରୁଛି ଏବଂ ଆମେ ଉଭୟ ଆସନରେ ଆପଣଙ୍କ ବିଜୟ ନିଶ୍ଚିତ କରିବୁ। କିନ୍ତୁ ସେମାନେ ଏହି ପ୍ରସ୍ତାବକୁ ପ୍ରତ୍ୟାଖାନ କରିଦେଇଥିଲେ ଏବଂ “ ଆମେ ଅଧିକ ଆସନ ଚାହୁଁ ” ବୋଲି କହିଥିଲେ। ଏହା ପରେ ମୁଁ କହିଥିଲି, ”ଏବେ ମୁଁ ଆପଣଙ୍କୁ ଗୋଟିଏ ଆସନ ମଧ୍ୟ ଦେବି ନାହିଁ।”
