ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ହତ୍ୟା କରିବାର ଧମକ ଦେଇ କର୍ଣ୍ଣାଟକର ଜଣେ ବ୍ୟକ୍ତିଙ୍କ ବିରୋଧରେ ଏଫଆଇଆର ଦାଖଲ କରାଯାଇଛି। ମହମ୍ମଦ ରସୁଲ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଅପଲୋଡ୍ ହୋଇଥିବା ଏକ ଭିଡିଓ ମାଧ୍ୟମରେ ଏହି ଧମକ ଦେଇଛନ୍ତି, ଯେଉଁଥିରେ ସେ ଖଣ୍ଡା ବୁଲାଉଥିବାର ନଜର ଆସିଛନ୍ତି ଏବଂ କହିଛନ୍ତି ଯେ, ଯଦି କେନ୍ଦ୍ରରେ କଂଗ୍ରେସ କ୍ଷମତାକୁ ଆସେ, ତେବେ ସେ ପିଏମ ମୋଦୀଙ୍କୁ ହତ୍ୟା କରିବେ। ନ୍ୟୁଜ୍ ଏଜେନ୍ସି ANI କର୍ଣ୍ଣାଟକର ୟଦାଗିରି ପୋଲିସର ବିବୃତ୍ତିକୁ ଦର୍ଶାଇ କହିଛି ଯେ, ସୁରପୁର ପୋଲିସ ଷ୍ଟେସନରେ ମହମ୍ମଦ ରସୁଲ କଦରେଙ୍କ ବିରୋଧରେ ଏଫ୍ଆଇଆର୍ ପଞ୍ଜିକୃତ ହୋଇଛି।
ପୋଲିସର ସୂଚନାନୁସାରେ ଅଭିଯୁକ୍ତ ସୋସିଆଲ ମିଡିଆ ଆକାଉଣ୍ଟରେ ଏକ ଭିଡିଓ ଅପଲୋଡ୍ କରିଥିଲେ, ଯେଉଁଥିରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ହତ୍ୟା କରିବେ ବୋଲି ଧମକ ଦେଇଥିଲେ। ଭାରତୀୟ ଦଣ୍ଡ ସଂହିତା (ଆଇପିସି) ଧାରା ୫୦୫ (୧) (ବି) ଅନୁଯାୟୀ FIR ପଞ୍ଜିକୃତ ହୋଇଛି। ଏହା ବ୍ୟତୀତ ସୁରପୁର ପୋଲିସ ଅଭିଯୁକ୍ତକୁ ଖୋଜିବାରେ ନିୟୋଜିତ ଅଛି ଏବଂ ଏ ସମ୍ପର୍କରେ ହାଇଦ୍ରାବାଦ ସମେତ ଅନେକ ଅଞ୍ଚଳରେ ଚଢାଉ କରାଯାଉଛି।
ANI ମହମ୍ମଦ ରସୁଲଙ୍କ ପ୍ରୋଫାଇଲର ବିବରଣୀ ପ୍ରଦାନ କରିଛି, ଯେଉଁଥିରେ ସେ ଫେସବୁକ୍ ରେ ଧମକପୂର୍ଣ୍ଣ ଭିଡିଓ ଅପଲୋଡ୍ କରିଥିଲେ। ତାଙ୍କର ଜେଡି ରସୁଲ ନାମ ସହିତ ଫେସବୁକରେ ଏକ ଆକାଉଣ୍ଟ ଅଛି, ଯାହା ଅନୁଯାୟୀ ସେ ହାଇଦ୍ରାବାଦର ବାସିନ୍ଦା ଏବଂ ବର୍ତ୍ତମାନ ସେଠାରେ ରୁହନ୍ତି। ସେ ରସୁଲ ନଗରର ସରକାରୀ ଉଚ୍ଚ ବିଦ୍ୟାଳୟରୁ ଅଧ୍ୟୟନ କରିଥିଲେ।