ସାଉଥମ୍ପଟନ ଠାରେ ଶନିବାର ଆଫଗାନିସ୍ତାନକୁ ଏକ କଡ଼ା ମୁକାବିଲାରେ ୧୧ ରନରେ ପରାସ୍ତ କରିଛି ଭାରତ। ମହମ୍ମଦ ସାମି ଦ୍ବିତୀୟ ଭାରତୀୟ ଭାବରେ ବିଶ୍ବକପ୍ ହ୍ୟାଟ୍ରିକ୍ ଅର୍ଜନ କରିବା ସହିତ ଏହି ମ୍ୟାଚ୍ର ହିରୋ ଭାବରେ ଉଭା ହୋଇଛନ୍ତି। ଏହା ପୂର୍ବରୁ ଚେତନ ଶର୍ମା ପ୍ରଥମ ଭାରତୀୟ ଭାବରେ ଏହି ମାଇଲଖୁଣ୍ଟ ହାସଲ କରିଥିଲେ। ସାମିଙ୍କୁ ହ୍ୟାଟ୍ରିକ ସମେତ ୪ଟି ୱିକେଟ ମିଳିଛି। ଦ୍ୱୀତିୟ ଇନିଂସରେ ଆଫଗାନିସ୍ତାନ ୨୨୫ ରନ ବିଜୟ ଲକ୍ଷ୍ୟ ନେଇ ବ୍ୟାଟିଂ କରିଥିଲା ଏବଂ ଗୋଟିଏ ବଲ୍ ପୂର୍ବରୁ ସମସ୍ତ ୱିକେଟ ହରାଇ ୨୧୩ ରନ ସଂଗ୍ରହ କରିବାକୁ ସମର୍ଥ ହୋଇଥିଲା। ମହମ୍ମଦ ସାମି ଇନିଂସର ଶେଷ ଓଭରରେ ହ୍ୟାଟ୍ରିକ୍ ସହିତ ତିନୋଟି ୱିକେଟ ନେଇ ବିଜୟର ମୁଣ୍ଡି ମାରିଥିଲେ। ଏହା ପୂର୍ବରୁ ଯଶପ୍ରୀତ ବୁମରା କ୍ରମାଗତ ୨ଟି ୱିକେଟ ନେଇ ଆଫଗାନିସ୍ତାନର ରନ ହାରକୁ ହ୍ରାସ କରିଥିଲେ।
ଏହି ବିଜୟ ସହିତ ଭାରତ ଏବେ ୯ ପଏଣ୍ଟ ପାଇ ତାଲିକାରେ ୩ୟ ସ୍ଥାନରେ ରହିଛି। ୧୧ ପଏଣ୍ଟ ସହ ନ୍ୟୁଜିଲାଣ୍ଡ ଶୀର୍ଷରେ ଥିବା ବେଳେ ୧୦ ପଏଣ୍ଟ ପାଇ ଅଷ୍ଟ୍ରେଲିଆ ୨ୟ ସ୍ଥାନରେ ରହିଛି।
ମ୍ୟାଚରେ ଆଫଗାନିସ୍ତାନ ପ୍ରଥମେ ଭଲ ବୋଲିଂ କରି ୨ଥର ବିଶ୍ୱ ଚାମ୍ପିଅନ ଭାରତୀୟ ଦଳକୁ ୨୨୪ ରନରେ ଅଟକାଇଥିଲା। ଏହା ପରେ ବିଶ୍ୱକପରେ ଆଫଗାନିସ୍ତାନ ବଡ଼ ଧରଣର ଅଦଳବଦଳ କରିବା ପାଇଁ ଅଗ୍ରସର ହୋଇଥିଲ। ମାତ୍ର ଶେଷ ୨ ଓଭରରେ ମ୍ୟାନ ଅଫ ଦ ମ୍ୟାଚ ଯଶପ୍ରୀତ ବୁମରା ଓ ସାମି ଘାତକ ବୋଲିଂ କରିଥିଲେ। ମହମ୍ମଦ ନବୀ ଟିମ ପାଇଁ ୫୫ ବଲ ଖେଳି ୫୨ ରନ କରିଥିଲେ ମଧ୍ୟ ଦଳକୁ ବିଜୟ ରେଖା ପାର କରାଇ ପାରି ନଥିଲେ। ଶେଷ ତିନି ଓଭରରୁ ବିଜୟ ଭାଇଁ ୨୪ ରନ୍ ଆବଶ୍ୟକ ଥିବା ବେଳେ ୪୮ ତମ ଓଭରରେ ସାମି ମାତ୍ର ୩ ରନ୍ ଏବଂ ୪୯ ତମ ଓଭରରେ ବୁମ୍ରା ମାତ୍ର ୫ ରନ୍ ପ୍ରଦାନ କରିଥିଲେ। ଶେଷ ଓଭରରେ ୧୬ ରନ୍ ଆବଶ୍ୟକ ଥିବା ବେଳେ ନବୀ ପ୍ରଥମ ବଲ୍ରୁ ୪ ରନ୍ ହାସଲ କରିଥିଲେ। ଦ୍ବିତୀୟ ବଲ୍ରେ କୌଣସି ରନ୍ ନେଇନଥିବା ବେଳେ ବଡ ସଟ୍ ଖେଳିବା ଆଶାରେ ତୃତୀୟ ବଲ୍ରେ ଆଉଟ୍ ହୋଇଥିଲେ ନବୀ। ଏହାର ପରବର୍ତ୍ତୀ ଦୁଇଟି ବଲ୍ରେ ଆଫତାବ ଆଲାମ୍ ଏବଂ ମୁଜିବ୍ ଉର୍ ରେହମାନଙ୍କୁ ବୋଲ୍ଡ କରି ବିଶ୍ବକପ୍ ଇତିହାସରେ ପ୍ରଥମ ଭାରତୀୟ ଖେଳାଳି ଭାବରେ ନିଜ ନାମ ଲିପିବଦ୍ଧ କରିଥିଲେ ସାମି।
ପୂର୍ବରୁ ଭାରତ ଟସ୍ ଜିତି ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୮ ଓ୍ବିକେଟ୍ ହରାଇ ୨୨୪ ରନ୍ ସଂଗ୍ରହ କରିଥିଲା। ଭାରତ ପକ୍ଷରୁ ଅଧିନାୟକ ବିରାଟ କୋହଲି ସର୍ବାଧିକ ୬୭ ରନ୍ ସଂଗ୍ରହ କରିଥିଲେ। ପିଚ୍ରେ ବଲ୍ ତଳୁଆ ଏବଂ ଅସମାନ ବାଉନ୍ସ ରହିଥିବାରୁ ବ୍ୟାଟିଂ ସହଜ ନଥିଲା। ଅନ୍ୟମାନଙ୍କ ମଧ୍ୟରେ କେଦାର ଜାଦବ ୫୨ ରନ୍ ସଂଗ୍ରହ କରିଥିଲେ। ଯଶ୍ବପ୍ରୀତ୍ ବୁମ୍ରାଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ଘୋଷିତ କରାଯାଇଥିଲା।