ନୂଆଦିଲ୍ଲୀ: ଦେଶରେ ଗ୍ରୀଷ୍ମ ପ୍ରବାହରେ ପୀଡିତ ଲୋକମାନେ ଆଗାମୀ ଦିନରେ ଆରାମ ପାଇବାକୁ ଯାଉଛନ୍ତି। ପାଣିପାଗ ବିଭାଗ କହିଛି ଯେ, ପ୍ରଚଣ୍ଡ ଗ୍ରୀଷ୍ମ ପ୍ରବାହର ପ୍ରକୋପ ଧୀରେ ଧୀରେ କମିବାକୁ ଯାଉଛି ଏବଂ କେରଳର ମୌସୁମୀ ପାଇଁ ସ୍ଥିତି ଅନୁକୂଳ ହେବାରେ ଲାଗିଛି।
ପାଣିପାଗ ବିଭାଗ ଅନୁଯାୟୀ ହରିୟାଣା, ଚଣ୍ଡିଗଡ଼-ଦିଲ୍ଲୀ ଏବଂ ପଞ୍ଜାବର ଅଧିକାଂଶ ଅଞ୍ଚଳରେ ଭୀଷଣ ଲୁ ପ୍ରବାହିତ ହେଉଥିବାବେଳେ ପଶ୍ଚିମ ଉତ୍ତରପ୍ରଦେଶ, ପୂର୍ବ ମଧ୍ୟପ୍ରଦେଶ, ହିମାଚଳ ପ୍ରଦେଶ, ପଶ୍ଚିମ ମଧ୍ୟପ୍ରଦେଶ, ପୂର୍ବ ଉତ୍ତରପ୍ରଦେଶ, ରାଜସ୍ଥାନ, ଜମ୍ମୁ, ବିଦର୍ଭ ଏବଂ ଛତିଶଗଡର ବିଭିନ୍ନ ଅଞ୍ଚଳରେ ଲୁ ସ୍ଥିତି ଜାରି ରହିଛି।
ମୌସୁମୀ ସମ୍ବନ୍ଧରେ ପାଣିପାଗ ବିଭାଗର ପୂର୍ବାନୁମାନ:
ଆସନ୍ତା ୨୪ ଘଣ୍ଟା ମଧ୍ୟରେ କେରଳରେ ମୌସୁମୀ ଆସିବା ପାଇଁ ପାଗ ଅନୁକୂଳ ରହିଛି ବୋଲି ପାଣିପାଗ ବିଭାଗ କହିଛି। ଏହି ସମୟରେ, ଦକ୍ଷିଣ ଆରବ ସାଗରର କିଛି ଅଂଶରେ, ମାଲଦ୍ୱୀପ ଏବଂ କୋମରିନ୍ ଅଞ୍ଚଳର ଅବଶିଷ୍ଟ ଅଂଶ, ଲାକ୍ଷଦୀପ ଅଞ୍ଚଳର କିଛି ଅଂଶ, ଦକ୍ଷିଣ-ପଶ୍ଚିମ ଏବଂ ବଙ୍ଗୋପସାଗରର କିଛି ଅଂଶ, ଉତ୍ତର-ପୂର୍ବ ବଙ୍ଗୋପସାଗର ଏବଂ ଉତ୍ତର-ପୂର୍ବ ରାଜ୍ୟଗୁଡିକର କିଛି ଅଂଶକୁ ଦକ୍ଷିଣ-ପଶ୍ଚିମ ମୌସୁମୀ ଛୁଇଁବା ପାଇଁ ପାଗ ଅନୁକୂଳ ହେବାକୁ ଯାଉଛି।
କେଉଁଠାରେ ବର୍ଷା ହେବ?:
ପାଣିପାଗ ବିଭାଗ ଅନୁଯାୟୀ, ଆସନ୍ତା ୫ ଦିନ ମଧ୍ୟରେ ବିହାର, ଝାଡଖଣ୍ଡ, ପଶ୍ଚିମବଙ୍ଗର ସମତଳ ଅଞ୍ଚଳ, ଓଡ଼ିଶାରେ ହାଲୁକା କିମ୍ବା ମଧ୍ୟମ ଧରଣର ବର୍ଷା ହେବା ସମ୍ଭାବନା ଏବଂ ମେ ୩୧ ରୁ ଜୁନ୍ ୨ ତାରିଖମଧ୍ୟରେ କାଳ ବୈଶାଖୀ, ବଜ୍ରପାତ ଏବଂ ଘଣ୍ଟା ପ୍ରତି ୩୦-୪୦ କିଲୋମିଟର ପବନ ହେବାର ସମ୍ଭାବନା ଅଛି।
ଏହାପୂର୍ବରୁ ଜୁନ୍ ମାସରେ ଦେଶର ଅଧିକାଂଶ ରାଜ୍ୟରେ ତାପମାତ୍ରା ବଢିବ ବୋଲି ପାଣିପାଗ ବିଭାଗ କହିଛି। ଆଇଏମଡି କହିଛି ଯେ, ମାସର ସର୍ବାଧିକ ତାପମାତ୍ରା ଜୁନ୍ ମାସରେ ଦେଶର ଅଧିକାଂଶ ଅନାଚଳରେ ସ୍ୱାଭାବିକଠାରୁ ଅଧିକ ହେବାର ସମ୍ଭାବନା ରହିଛି।
