ମହିଳାଙ୍କ ପାଇଁ ଅସୁରକ୍ଷିତ ହୋଇପଡ଼ିଛି କୋଲକାତା। ଗତ ସପ୍ତାହରେ ଜଣେ ପୂର୍ବତନ ମିସ୍ ଇଣ୍ଡିଆ ୟୁନିଭର୍ସଙ୍କୁ କେତେଜଣ ଦୁର୍ବୃତ୍ତ ପିଛା କରି ଆକ୍ରମଣ କରିଥିଲେ। ଶୁକ୍ରବାର ଅନ୍ତର୍ଜାତୀୟ ମହିଳା ବକ୍ସର ସୁମନ କୁମାରୀ ମଧ୍ୟ ସମାନ ଘଟଣା ସମ୍ପର୍କରେ ଫେସବୁକରେ ପୋଷ୍ଟ କରିଛନ୍ତି। ସୁମନ କୁମାରୀ କହିଛନ୍ତି, ଶୁକ୍ରବାର ପୂର୍ବାହ୍ନ ପ୍ରାୟ ୧୧ଟାରେ ଅଫିସ ଯିବାକୁ ବାହାରୁଥିବାବେଳେ ମୋମିନପୁର ଅଞ୍ଚଳରେ ଥିବା ତାଙ୍କ ଘର ନିକଟରେ ତାଙ୍କୁ ଜଣେ ବ୍ୟକ୍ତି ଆକ୍ରମଣ କରିଥିଲେ। କିନ୍ତୁ ସେ ତାଙ୍କୁ ଧକ୍କା ଦେଇ ଫିଙ୍ଗି ଦେଇଥିଲେ। ଫଳରେ ଅଭିଯୁକ୍ତ ଜଣକ ବସ୍ରେ ଉଠି ଚାଲିଯାଇଥିଲେ। ପରେ ସୁମନ ବସ୍କୁ ପିଛା କରିଥିଲେ। ପରବର୍ତ୍ତୀ ବସ୍ ଷ୍ଟପରେ ସମ୍ପୃକ୍ତ ବ୍ୟକ୍ତି ଓହ୍ଲାଇବା ପରେ ସୁମନ ତାଙ୍କୁ ଅଟକାଇ କାହିଁକି ଆକ୍ରମଣ କଲ ବୋଲି ପଚାରିଥିଲେ। ତେବେ ଅଭିଯୁକ୍ତ ପୁଣି ଥରେ ତାଙ୍କ ତଣ୍ଟି ଚିପି ଧରି ଆକ୍ରମଣ କରିଥିଲେ। ପରେ ପୁଲିସ ଏହି ଘଟଣାରେ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସୁମନ କୁମାରୀ ନିକଟରେ ତାଇୱାନ ପ୍ରଫେଶନାଲ୍ସ ବକ୍ସିଂ ଚାମ୍ପିୟନଶିପ୍ ଜିତିଥିଲେ।
