ନୂଆଦିଲ୍ଲୀ: ରିଲାଏନ୍ସ ଜିଓ ଇଣ୍ଡିଆ ମୋବାଇଲ୍ କଂଗ୍ରେସ ୨୦୨୪ ରେ ଏକ ଟେକ୍ନୋଲୋଜି ପ୍ରଦର୍ଶନ କରିଛି ଯାହା ଘରର ସ୍ମାର୍ଟ ଟିଭିଗୁଡ଼ିକୁ ସହଜରେ କମ୍ପ୍ୟୁଟରରେ ପରିଣତ କରିପାରିବ। ଜିଓ କ୍ଲାଉଡ୍ ପିସି ନାମକ ଏହି ଟେକ୍ନୋଲୋଜି ଟିଭିକୁ ମାତ୍ର ଶହେ ଟଙ୍କା ଖର୍ଚ୍ଚରେ କମ୍ପ୍ୟୁଟରରେ ପରିଣତ କରିବ। ଏଥିପାଇଁ କେବଳ ଇଣ୍ଟରନେଟ୍ ସଂଯୋଗ, ସ୍ମାର୍ଟ ଟିଭି, ଟାଇପିଂ କିବୋର୍ଡ୍, ମାଉସ୍ ଏବଂ ଜିଓ କ୍ଲାଉଡ୍ ପିସି ଆପ୍ ଆବଶ୍ୟକ ହେବ। ଯେଉଁମାନଙ୍କ ଟିଭି ସ୍ମାର୍ଟ ନୁହେଁ, ସେମାନଙ୍କ ସାଧାରଣ ଟିଭି ମଧ୍ୟ ଜିଓ ଫାଇବର କିମ୍ବା ଜିଓ ଏୟାରଫାଇବର ସହିତ ଆସୁଥିବା ସେଟ୍-ଟପ୍ ବକ୍ସ ମାଧ୍ୟମରେ କମ୍ପ୍ୟୁଟର ହୋଇପାରିବ।
ବାସ୍ତବରେ ଜିଓ କ୍ଲାଉଡ୍ ପିସି ହେଉଛି ଏକ ଟେକ୍ନୋଲୋଜି ଯାହାଦ୍ବାରା ଯେକୌଣସି ଟିଭି ଇଣ୍ଟରନେଟ୍ ମାଧ୍ୟମରେ କ୍ଲାଉଡ୍ କମ୍ପ୍ୟୁଟିଙ୍ଗ ସହିତ ସଂଯୋଗ ହୋଇପାରିବ। ଏହା ବ୍ୟବହାର କରିବା ମଧ୍ୟ ସହଜ, ଗ୍ରାହକ କେବଳ ଆପରେ ଲଗଇନ୍ କରିବା ଆବଶ୍ୟକ ଏବଂ କ୍ଲାଉଡରେ ଗଚ୍ଛିତ ସମସ୍ତ ତଥ୍ୟ ଟିଭିରେ ଦୃଶ୍ୟମାନ ହେବ। ଇମେଲ, ମେସେଜିଂ, ସୋସିଆଲ୍ ନେଟୱାର୍କିଂ, ଇଣ୍ଟରନେଟ୍ ସର୍ଫିଂ, ସ୍କୁଲ୍ ପ୍ରୋଜେକ୍ଟ, ଅଫିସ ପ୍ରେଜେଣ୍ଟେଶନ ପରି କମ୍ପ୍ୟୁଟରରେ ସମସ୍ତ କାର୍ୟ୍ୟ ହୋମ ଟିଭିରେ କରାଯାଇପାରିବ। ସରଳ ଶବ୍ଦରେ, ସମସ୍ତ ତଥ୍ୟ କ୍ଲାଉଡ୍ ରେ ରହିବ ଏବଂ ସର୍ଭର, ଷ୍ଟୋରେଜ୍, ଡାଟାବେସ୍, ନେଟୱାର୍କିଂ, ସଫ୍ଟୱେର୍ ଏବଂ ଆନାଲିଟିକ୍ସ ଭଳି ସେବା ଟିଭି ମାଧ୍ୟମରେ ବ୍ୟବହାର କରାଯାଇପାରିବ।
ଆବଶ୍ୟକତା ଅନୁଯାୟୀ କ୍ଲାଉଡ୍ କମ୍ପ୍ୟୁଟିଙ୍ଗର କ୍ଷମତା ବୃଦ୍ଧି କିମ୍ବା ହ୍ରାସ କରାଯାଇପାରିବ। ଏହା ସୁରକ୍ଷିତ ହେବା ସହିତ, ସାଧାରଣ କମ୍ପ୍ୟୁଟର ବ୍ୟବହାର କରିବା ତୁଳନାରେ ଡାଟା ପୁନରୁଦ୍ଧାର ପାଇଁ ମଧ୍ୟ ସହଜ ଅଟେ। ଟିଭି ସହିତ ଏହାକୁ ମୋବାଇଲରେ ମଧ୍ୟ ବ୍ୟବହାର କରାଯାଇପାରିବ। ଯଦିଓ କମ୍ପାନୀ ଏହି ଆପର ବଜାରରେ ଉପଲବ୍ଧ ହେବା ତାରିଖ ଘୋଷଣା କରିନାହିଁ, ତଥାପି ଏହା ଆଗାମୀ କିଛି ମାସ ମଧ୍ୟରେ ବଜାରରେ ଉପଲବ୍ଧ ହେବାର ଆଶା କରାଯାଉଛି।
