ସମୀକ୍ଷା ବ୍ୟୁରୋ
ରଥଯାତ୍ରା ପୂର୍ବରୁ ଶ୍ରୀମନ୍ଦିର ଏକ ନୂଆ ରୂପରେ ଦେଖିବାକୁ ମିଳିଛି। ଶ୍ରୀମନ୍ଦିର ସାରା ପ୍ରଥମ ଥର ପାଇଁ ବିଭିନ୍ନ ଫୁଲରେ ସଜାଯାଇଛି।ତେବେ ଏହା ଶ୍ରୀମନ୍ଦିର ପ୍ରଶାସନ କରି ନାହିଁ। ନୂଆଦିଲ୍ଲୀର ପ୍ରତିଷ୍ଠିତ ଫୁଲ ବ୍ୟବସାୟୀ ତଥା ଜଗନ୍ନାଥ ଭକ୍ତ କେକେ ଶର୍ମା ମନ୍ଦିର ପ୍ରଶାସନର ଅନୁମତି ନେଇ ଏହି କାର୍ଯ୍ୟ କରିଛନ୍ତି। ଏଥିପାଇଁ ସଂପୂକ୍ତ ଭକ୍ତ ନୂଆଦିଲ୍ଲୀରୁ ପ୍ରାୟ 200 ଜଣ କାରୀଗର ଆଣି ଦୁଇଦିନ ଧରି କାମରେ ଲଗାଇଛନ୍ତି। ଆଜି ଅର୍ଥାତ ରଥଯାତ୍ରା ପୂର୍ବରୁ ଏହି କାର୍ଯ୍ୟ ସଂପୁର୍ଣ୍ଣ ହୋଇଛି। ଶ୍ରୀମନ୍ଦିରକୁ ଫୁଲରେ ସଜାଇବା ପାଇଁ ପ୍ରାୟ 30 ଟ୍ରିପ ଫୁଲ ଲାଗିଛି ବୋଲି କୁହାଯାଇଛି। ଯାହାର ଆନୁମାନିକ ମୂଲ୍ୟ ପ୍ରାୟ 20 ଲକ୍ଷ ଟଙ୍କା ହେବ। ଏହି ଫୁଲସଜାରେ ସେ ପ୍ରାୟ 50 ପ୍ରକାରର ଫୁଲ ବ୍ୟବହାର କରିଛନ୍ତି ବୋଲି କହିଛନ୍ତି। କେବଳ ଶ୍ରୀମନ୍ଦିର ନୁହେଁ ଗୁଣ୍ଡିଚା ମନ୍ଦିରକୁ ମଧ୍ୟ ଫୁଲରେ ସଜାଯାଇଛି। ଠାକୁର ଗୁଣ୍ଡିଚା ମନ୍ଦିରରେ ଥିବା ପର୍ଯ୍ୟନ୍ତ ପ୍ରତ୍ୟେକ ଦିନ ନୂଆନୂଆ ରୂପରେ ଫୁଲ ସଜାଯିବ ବୋଲି ମନ୍ଦିର ପ୍ରଶାସନ ତରଫରୁ କୁହାଯାଇଛି। ଏହି କାର୍ଯ୍ୟ ସେହି ଭକ୍ତ କରିବେ। ପ୍ରଥମ ଥର ପାଇଁ ଭକ୍ତଜଣଙ୍କ ଏପରି କାମ କରି ଏକ ନୂଆ ଇତିହାସ ସୃଷ୍ଟି କରିଛନ୍ତି। ଶ୍ରୀମନ୍ଦିରକୁ ସଜାଇବା ପାଇଁ ଦୁଇ ଶହ କାରୀଗରଙ୍କୁ ପ୍ରାୟ ଦୁଇଦିନ ଲାଗିଗଲା। ବର୍ତ୍ତମାନ ରଥଯାତ୍ରା ପାଇଁ ପୁରୀରେ ଭକ୍ତଙ୍କ ଭିଡ ଥିବାରୁ ଫୁଲର ଶ୍ରୀମନ୍ଦିର ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।