ନୂଆଦିଲ୍ଲୀ: ବୁଧବାର ସାଉଦି ଆରବରେ ୭ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି। ଏହି ୭ ଜଣଙ୍କ ମଧ୍ୟରୁ ୫ ଜଣଙ୍କୁ ନିଶା କାରବାର ପାଇଁ ଦଣ୍ଡିତ କରାଯାଇଛି। ଅନ୍ୟ ଦୁଇ ଜଣଙ୍କୁ ଅନ୍ୟ ମାମଲାରେ ମୃତ୍ୟୁଦଣ୍ଡ ଦିଆଯାଇଛି। ଏହି ସୂଚନା ପ୍ରଦାନ କରି ସରକାରୀ ସାଉଦି ପ୍ରେସ ଏଜେନ୍ସି (ଏସପିଏ) କହିଛି ଯେ, ମୃତ୍ୟୁଦଣ୍ଡ ପାଇଥିବା ବ୍ୟକ୍ତିଙ୍କ ମଧ୍ୟରେ ଜଣେ ପାକିସ୍ତାନୀ ନାଗରିକ ଅଛନ୍ତି। ଏଥିରେ ଦୁଇ ସାଉଦି ନାଗରିକ ମଧ୍ୟ ଅନ୍ତର୍ଭୁକ୍ତ, ଏହା ସହିତ ଚାରି ଜଣ ୟେମେନ ନାଗରିକଙ୍କୁ ମଧ୍ୟ ଫାଶୀ ଦିଆଯାଇଛି।
ସୂଚନା ଅନୁଯାୟୀ ଚାରିଜଣ ୟେମେନ ନାଗରିକ ଚୋରା ଚାଲାଣ ପାଇଁ ଦକ୍ଷିଣ ଅସୀର ପ୍ରଦେଶରେ ଫାଶୀ ପାଇଛନ୍ତି। ଏଥି ସହିତ ବୁଧବାର ଦିନ ଜଣେ ପାକିସ୍ତାନୀ ନାଗରିକଙ୍କୁ ଡ୍ରଗ୍ ଚୋରା କାରବାରରେ ଦୋଷୀ ସାବ୍ୟସ୍ତ କରାଯାଇଥିଲା।
୨୦୨୪ ଆରମ୍ଭରୁ ବର୍ତ୍ତମାନ ପର୍ଯ୍ୟନ୍ତ ଅର୍ଥାତ୍ ଅକ୍ଟୋବର ପର୍ଯ୍ୟନ୍ତ ସାଉଦି ଆରବରେ ମୋଟ ୨୩୬ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି। ସେଥିମଧ୍ୟରୁ ୭୧ ଜଣଙ୍କୁ ନିଶା କାରବାର ଅଭିଯୋଗରେ ମୃତ୍ୟୁଦଣ୍ଡ ଦିଆଯାଇଛି। ପ୍ରକାଶ ଯେ, ସିରିଆ ଏବଂ ଲେବାନନରୁ ଆସୁଥିବା ଏକ ନିଶା ଔଷଧ କ୍ୟାପଟାଗନ୍ ପାଇଁ ସାଉଦି ଆରବ ମୁଖ୍ୟ ବଜାରରେ ପରିଣତ ହୋଇଛି। ଯାହା ବିରୋଧରେ ସାଉଦି ସରକାର ଏକ କଠୋର ଆଭିମୁଖ୍ୟ ଗ୍ରହଣ କରିଛନ୍ତି।
