ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଅୱାମୀ ଲିଗ୍ ସହ ମେଣ୍ଟରେ ଥିବା ଜାତୀୟା ପାର୍ଟି ଶୁକ୍ରବାର କହିଛି ଯେ, ବିକ୍ଷୋଭକାରୀମାନେ ଏହାର କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି। ହୁସେନ୍ ମହମ୍ମଦ ଇରଶାଦ ଜାତୀୟା ପାର୍ଟି ପ୍ରତିଷ୍ଠା କରିଥିଲେ। ଏହି ଦଳ ଅୱାମୀ ଲିଗ୍ ନେତୃତ୍ୱାଧୀନ ଗ୍ରାଣ୍ଡ ଆଲାଇନ୍ସର ଏକ ଅଂଶ ଥିଲା ଏବଂ ଗତ ତିନୋଟି ସାଧାରଣ ନିର୍ବାଚନରେ ଅଂଶଗ୍ରହଣ କରିଥିବାବେଳେ ଅନ୍ୟ ଦଳ ଏହାକୁ ବହିଷ୍କାର କରିଥିଲେ।
ଗଣମାଧ୍ୟମ ଅନୁଯାୟୀ ଶନିବାର ଢାକାରେ ପ୍ରସ୍ତାବିତ ରାଲିକୁ ନେଇ ବିକ୍ଷୋଭକାରୀଙ୍କ ମଧ୍ୟରେ କ୍ରୋଧ ଥିଲା। ରାଜଧାନୀ ଢାକାର କାକରେଲ ଅଞ୍ଚଳରେ ଗୁରୁବାର ଦିନ ଛାତ୍ର, ଶ୍ରମିକ ଏବଂ ଜନସାଧାରଣଙ୍କ ପତାକା ତଳେ ବିକ୍ଷୋଭକାରୀମାନେ ଜାତୀୟା ପାର୍ଟିର କେନ୍ଦ୍ରୀୟ କାର୍ଯ୍ୟାଳୟ ସମ୍ମୁଖରେ ଏକ ମଶାଲ ଶୋଭାଯାତ୍ରା କରିଥିଲେ, ଯାହା ପରେ ହିଂସାତ୍ମକ ସଂଘର୍ଷ ହୋଇଥିଲା। ବିକ୍ଷୋଭକାରୀମାନେ ପାର୍ଟି କାର୍ଯ୍ୟାଳୟକୁ ଭଙ୍ଗାରୁଜା କରିଥିଲେ, ସାଇନବୋର୍ଡ ଟାଣି ପାର୍ଟି ପ୍ରତିଷ୍ଠାତା ଇରଶାଦଙ୍କ ଫଟୋ ଉପରେ କାଳି ଫିଙ୍ଗିଥିଲେ।
ପରିସ୍ଥିତିକୁ ଦେଖି ଜାତୀୟା ପାର୍ଟି କାର୍ଯ୍ୟାଳୟ ସମ୍ମୁଖରେ ପୋଲିସ ଓ ସେନା ନିୟୋଜିତ ହୋଇଥିଲେ। ଜାତୀୟା ପାର୍ଟି ମୁଖ୍ୟ ଗୁଲାମ ମହମ୍ମଦ କାଦର କହିଛନ୍ତି ଯେ, ବିକ୍ଷୋଭକାରୀମାନେ ଦେଶ ବିଭାଜନ କରୁଛନ୍ତି। କାଦରଙ୍କ କହିବାନୁସାରେ, “ସେମାନେ ଅନ୍ୟ ସମସ୍ତଙ୍କୁ ଅଣଦେଖା କରୁଛନ୍ତି, ଦେଶକୁ ‘ଶୁଦ୍ଧ’ ଏବଂ ‘ଅଶୁଦ୍ଧ’ ଗୋଷ୍ଠୀରେ ବିଭକ୍ତ କରୁଛନ୍ତି। ସେମାନେ ସ୍ଥିର କରନ୍ତି ଯେ, କିଏ ଦୋଷୀ ଏବଂ କିଏ ନୁହେଁ। ଥରେ ଯାହାକୁ ସେମାନେ ଦୋଷୀ ବୋଲି ମାନନ୍ତି, ତାକୁ ସ୍ପଷ୍ଟୀକରଣ ଦେବା ପାଇଁ କୌଣସି ସୁଯୋଗ ଦିଅନ୍ତି ନାହିଁ।”
ଅନ୍ୟପକ୍ଷରେ, ବିକ୍ଷୋଭକାରୀମାନେ ଅଭିଯୋଗ କରିଛନ୍ତି ଯେ, ଗୁରୁବାର ଦିନ ଯେତେବେଳେ ଜାତୀୟା ପାର୍ଟିର ସଦସ୍ୟମାନେ ସେମାନଙ୍କ ଶୋଭାଯାତ୍ରା ଉପରେ ଆକ୍ରମଣ କରିଥିଲେ। ଗୋନୋ ଅଧିକାର ପରିଷଦର ନେତା ଶକିଲୁଜାମାନ୍ କହିଛନ୍ତି ଯେ, “ଯେତେବେଳେ ଆମେ ଜାତୀୟ ପାର୍ଟି କାର୍ଯ୍ୟାଳୟ ସମ୍ମୁଖରେ ଏକ ମଶାଲ ଶୋଭାଯାତ୍ରା କରୁଥିଲୁ, ସେତେବେଳେ ଜାତୀୟା ପାର୍ଟି ଆତଙ୍କବାଦୀମାନେ ଛାତ ଉପରୁ ଆମ ଉପରକୁ ଇଟା ଫିଙ୍ଗିଥିଲେ।”
ବିକ୍ଷୋଭକାରୀଙ୍କ କହିବାନୁସାରେ, “ଜାତୀୟା ପାର୍ଟି ଆତଙ୍କବାଦୀମାନେ ନିଜ ଅଫିସରେ ନିଆଁ ଲଗାଇ ପଳାୟନ କରିଥିଲେ। ୨୦୧୪, ୨୦୧୮ ଏବଂ ୨୦୨୪ ନିର୍ବାଚନରେ ଜାତୀୟା ପାର୍ଟି ଫାସିଷ୍ଟ ଆୱାମୀ ଲିଗର ସହଯୋଗୀ ଭାବରେ କାର୍ଯ୍ୟ କରିଥିଲା।”