ନୂଆଦିଲ୍ଲୀ: ୫୫ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫ୍ଏଫ୍ଆଇ) ରେ କ୍ରିଏଟିଭ୍ ମାଇଣ୍ଡସ୍ ଅଫ୍ ଟୁମୋରୋ (ସିଏମ୍ଓଟି)ର ଚତୁର୍ଥ ସଂସ୍କରଣ ଉଦଘାଟିତ ହୋଇଛି, ଯାହା ପରବର୍ତ୍ତୀ ପିଢ଼ିର ଚଳଚ୍ଚିତ୍ର ନିର୍ମାତାଙ୍କୁ ପ୍ରୋତ୍ସାହନ ଦେବା ଏବଂ ସଶକ୍ତୀକରଣ କରିବା ଦିଗରେ ଭାରତର ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ। ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଆଜାଦୀ କା ଅମୃତ ମହୋତ୍ସବ ଆନୁକୂଲ୍ୟରେ ଆରମ୍ଭ ହୋଇଥିବା ସିଏମଓଟି କାର୍ଯ୍ୟକ୍ରମ ଗଣମାଧ୍ୟମ ଓ ମନୋରଞ୍ଜନ ଶିଳ୍ପରେ ଉଦୀୟମାନ ପ୍ରତିଭାଙ୍କ ପାଇଁ ଦେଶର ଅନ୍ୟତମ ଅଗ୍ରଣୀ ମଞ୍ଚ ଭାବେ ଦ୍ରୁତ ଗତିରେ ସ୍ୱୀକୃତି ଲାଭ କରୁଛି।
ସୂଚନା ଓ ପ୍ରସାରଣ ମନ୍ତ୍ରଣାଳୟର ସଚିବ ସଞ୍ଜୟ ଜାଜୁ ତାଙ୍କ ଉଦଘାଟନୀ ଭାଷଣରେ ଚଳିତ ବର୍ଷ ସିଏମଓଟିର ବ୍ୟାପକ ପରିସର ଉପରେ ଆଲୋକପାତ କରିଥିଲେ, ଯେଉଁଥିରେ ୧୩ଟି ଚଳଚ୍ଚିତ୍ର ନିର୍ମାଣ ଶିଳ୍ପମଧ୍ୟରୁ ୧୦୦ ଜଣ ଦକ୍ଷ ଯୁବ ପ୍ରତିଭାଙ୍କୁ ଚୟନ କରାଯାଇଥିଲା। ଏହା ଗତ ବର୍ଷର ୧୦ଟି ବିଭାଗର ୭୫ ଜଣ ଯୁବ ପ୍ରତିଭାଙ୍କ ଠାରୁ ଅଧିକ। ଚଳିତ ବର୍ଷ ସିଏମଓଟି ଯୁବ ନିର୍ମାତାମାନଙ୍କୁ ସେମାନଙ୍କର ଦକ୍ଷତା ପ୍ରଦର୍ଶନ ଏବଂ ବିଭିନ୍ନ କ୍ଷେତ୍ରରେ ସହଯୋଗ କରିବାର ଏକ ଅନନ୍ୟ ସୁଯୋଗ ପ୍ରଦାନ କରୁଛି । ଏହା ଫିଲ୍ମ ବଜାର ଦିଗରେ ଏକ ପଦକ୍ଷେପ, ଯାହା କି ବିଶ୍ୱସ୍ତରୀୟ ସହଯୋଗ ଏବଂ ଅଭିବୃଦ୍ଧି ପାଇଁ ନୂଆ ଦ୍ୱାର ଖୋଲିବ।
୨୦୨୫ ଫେବୃଆରୀରେ ହେବାକୁ ଥିବା ଆଗାମୀ ବିଶ୍ୱ ଅଡିଓ ଭିଜୁଆଲ୍ ଆଣ୍ଡ ଏଣ୍ଟରଟେନମେଣ୍ଟ ଶିଖର ସମ୍ମିଳନୀ (ୱେଭ୍ସ) ବିଷୟରେ ମଧ୍ୟ ସେ କହିଥିଲେ , ଯାହା ବିଶ୍ୱ ଗଣମାଧ୍ୟମ କ୍ଷେତ୍ରରେ ଭାରତର ସ୍ଥିତିକୁ ସୁଦୃଢ଼ କରିବାକୁ ଲକ୍ଷ୍ୟ ରଖିଛି। ‘‘ମୁଁ ଆପଣଙ୍କୁ କ୍ରିଏଟ୍ ଇନ୍ ଇଣ୍ଡିଆ ଚ୍ୟାଲେଞ୍ଜ୍ – ସିଜିନ୍ ୧ (ସିଆଇସି)ରେ ନିୟୋଜିତ ହେବାକୁ ଉତ୍ସାହିତ କରୁଛି, ଯାହା ଅଧିକ ଅନ୍ତର୍ଜାତୀୟ ପ୍ରଦର୍ଶନ ପାଇଁ ଏକ ସୁଯୋଗ ମଞ୍ଚ ଭାବେ କାମ କରିବ’’, ସେ କହିଥିଲେ।
ସୂଚନା ଓ ପ୍ରସାରଣ ମନ୍ତ୍ରଣାଳୟର ସ୍ୱତନ୍ତ୍ର ସଚିବ ନୀରଜା ଶେଖର ସିଏମଓଟିର କ୍ରମାଗତ ଅଭିବୃଦ୍ଧି ପାଇଁ ଗର୍ବ ପ୍ରକାଶ କରିଛନ୍ତି। ‘‘ଗତ ୪ ବର୍ଷ ମଧ୍ୟରେ ସିଏମଓଟି ଯୁବ ଚଳଚ୍ଚିତ୍ର ନିର୍ମାତାଙ୍କ ପାଇଁ ଏକ ଆକାଂକ୍ଷୀ ମଞ୍ଚ ପରିଣତ ହୋଇଛି। ଚଳିତ ବର୍ଷ ଆମେ ୧୩ଟି ଭିନ୍ନ ଭିନ୍ନ ଶିଳ୍ପକୁ ପ୍ରୋତ୍ସାହିତ କରି ଗର୍ବ ଅନୁଭବ କରୁଛୁ, ଯାହା ଏହି କାର୍ଯ୍ୟକ୍ରମର ସମ୍ପ୍ରସାରଣ ଏବଂ ସୃଜନଶୀଳ କ୍ୟାରିୟର ପାଇଁ ଭାରତର ଯୁବବର୍ଗଙ୍କ ମଧ୍ୟରେ ବଢୁଥିବା ଉତ୍ସାହକୁ ପ୍ରତିଫଳିତ କରୁଛି,” ସେ ଦେଶରେ ଅର୍ଥନୈତିକ ଅଭିବୃଦ୍ଧି ଏବଂ ସୃଜନଶୀଳ ଉଦ୍ଭାବନକୁ ପ୍ରୋତ୍ସାହିତ କରିବାରେ ଏହି ପଦକ୍ଷେପର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଜୋର ଦେଇ କହିଥିଲେ।
ସୂଚନା ଓ ପ୍ରସାରଣ ମନ୍ତ୍ରଣାଳୟର ପୂର୍ବତନ ସଚିବ ଅପୂର୍ବ ଚନ୍ଦ୍ରା ସିଏମଓଟିର ମୁଖ୍ୟ ବୈଶିଷ୍ଟ୍ୟ ୪୮ ଘଣ୍ଟିଆ ଚଳଚ୍ଚିତ୍ର ନିର୍ମାଣ ଆହ୍ୱାନର ମହତ୍ତ୍ୱ ବିଷୟରେ କହିଥିଲେ। ଏହି ଚ୍ୟାଲେଞ୍ଜ କେବଳ ଆପଣଙ୍କର ସୃଜନଶୀଳତା ନୁହେଁ ବରଂ ଏକ ଗୋଷ୍ଠୀ ଭାବରେ ଏକାଠି କାମ କରିବାର ଦକ୍ଷତାକୁ ମଧ୍ୟ ପରୀକ୍ଷା କରେ। ଏହି ଉଦ୍ୟୋଗରେ ସଫଳତାର ଚାବିକାଠି କେବଳ ପ୍ରତିଭା ନୁହେଁ, ବରଂ ଆପଣଙ୍କ ଚିନ୍ତାଧାରାର ବିପଣନ। ସେ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ ଏସଆରଏଫଟିଆଇ ଏବଂ ଏଫଟିଆଇଆଇ ପରି ଅନୁଷ୍ଠାନ ଗୁଡିକର ବର୍ଦ୍ଧିତ ସ୍ୱୀକୃତି, ଯାହା ଭାରତର ସୃଜନଶୀଳ ପ୍ରତିଭା ଭଣ୍ଡାରକୁ ଆକାର ଦେବା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଅଟେ।
ନେଟଫ୍ଲିକ୍ସର ପବ୍ଲିକ ପଲିସିର ନିର୍ଦ୍ଦେଶିକା ମହିମା କୌଲ ସିଏମଓଟିକୁ ନେଟଫ୍ଲିକ୍ସର ସମର୍ଥନ ବ୍ୟକ୍ତ କରି କହିଛନ୍ତି ଯେ ଉଦୀୟମାନ ପ୍ରତିଭାଙ୍କୁ ପ୍ରୋତ୍ସାହିତ କରିବା ପାଇଁ ନେଟଫ୍ଲିକ୍ସର ନିଜସ୍ୱ ପ୍ରତିବଦ୍ଧତା ଏବଂ ଏହି ପଦକ୍ଷେପ ମଧ୍ୟରେ ସମନ୍ୱୟ ରହିଛି। ଭଏସ୍ ବକ୍ସ କାର୍ଯ୍ୟକ୍ରମ ଅଧୀନରେ ସମଗ୍ର ଭାରତରେ ଭଏସ୍ ଓଭର କଳାକାରମାନଙ୍କୁ ପ୍ରଶିକ୍ଷଣ ଦେବାରେ ସିଏମଓଟି ସହିତ ସହଯୋଗ କରି ଆମେ ଗର୍ବ ଅନୁଭବ କରୁଛୁ। ଆମର ଅଂଶଗ୍ରହଣକାରୀଙ୍କ ମଧ୍ୟରୁ ୫୦% ରୁ ଅଧିକ ହେଉଛନ୍ତି ମହିଳା, ଯାହା ବିବିଧ ସ୍ୱରକୁ ସଶକ୍ତ କରିବାର ଆମର ଲକ୍ଷ୍ୟକୁ ପ୍ରତିଫଳିତ କରେ। ଏହାବ୍ୟତୀତ ସିଏମଓଟିର ଶ୍ରେଷ୍ଠ କଳାକାରମାନେ ନେଟଫ୍ଲିକ୍ସର ସ୍ୱତନ୍ତ୍ର ପ୍ରୋଜେକ୍ଟ ଆଜାଦି କି ଅମୃତ କାହାନୀ୍ୟାଁରେ ଯୋଗଦାନ କରିବେ, ଯେଉଁଠାରେ ସେମାନେ ଭାରତର ସ୍ୱାଧୀନତା ଆନ୍ଦୋଳନ ସହ ଜଡିତ କାହାଣୀ ବର୍ଣ୍ଣନା କରିବେ ବୋଲି ମହିମା ଦୃଢ଼ୋକ୍ତି ପ୍ରକାଶ କରିଛନ୍ତି।
ସେଣ୍ଟ୍ରାଲ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍ (ସିବିଏଫସି)ର ଅଧ୍ୟକ୍ଷ ତଥା ଜଣାଶୁଣା ଗୀତିକାର ପ୍ରସୂନ ଯୋଶୀ ଗଭୀର ଉଦବୋଧନ ଦେଇ ସମଗ୍ର ଭାରତରେ ସୃଜନଶୀଳ ପ୍ରତିଭାକୁ ପ୍ରୋତ୍ସାହିତ କରିବାର ଗୁରୁତ୍ୱ ବିଷୟରେ କହିଥିଲେ। ଆମ ଦେଶରେ କାହାଣୀ ଓ ପ୍ରତିଭାର ଅଭାବ ନାହିଁ, କିନ୍ତୁ ଆମକୁ ସୃଜନଶୀଳ ପ୍ରକ୍ରିୟାକୁ ସୁଦୃଢ଼ କରିବା ଏବଂ ଏହି ସ୍ୱରଗୁଡ଼ିକ ପାଇଁ ଏକ ମଂଚ ପ୍ରଦାନ କରିବାର ଆବଶ୍ୟକତା ରହିଛି ବୋଲି ସେ କହିଥିଲେ। ଯଦି ଆମେ କାହାଣୀକୁ କେବଳ ବଡ଼ ସହରରେ ସୀମିତ ରଖିବୁ, ତେବେ ଆମ ଦେଶରେ ଯେଉଁ ଅବିଶ୍ୱସନୀୟ ବିବିଧତା ରହିଛି ତାହାକୁ ଆମେ ଭୁଲି ଯାଉଛୁ । ସିଏମଓଟି ଭାରତର କୋଣ ଅନୁକୋଣରୁ ପ୍ରସ୍ତୁତକାରୀମାନଙ୍କୁ ଏକ ମଞ୍ଚ ଦେଇ ଏହି ବ୍ୟବଧାନକୁ ପୂରଣ କରିବାରେ ସାହାଯ୍ୟ କରେ ବୋଲି ଯୋଶୀ କହିଛନ୍ତି।
ସର୍ଟସ ଇଣ୍ଟରନ୍ୟାସନାଲର ପ୍ରତିଷ୍ଠାତା ତଥା ସିଇଓ କାର୍ଟର ପିଲଚର୍ ଭାରତୀୟ ସିନେମାର ଆଶାଜନକ ଭବିଷ୍ୟତ ଉପରେ ଗୁରୁତ୍ୱାରୋପ କରିଥିଲେ। ହଜାର ହଜାର ଆବେଦନକାରୀଙ୍କ ମଧ୍ୟରୁ ସିଏମଓଟି ପ୍ରତିଯୋଗୀଙ୍କୁ ଚୟନ କରାଯାଇଛି ଏବଂ ଆଗାମୀ ୪୮ ଘଣ୍ଟା ସେମାନଙ୍କୁ ସହଯୋଗ କରିବା, ଉଦ୍ଭାବନ କରିବା ଏବଂ ଅବିଶ୍ୱସନୀୟ ଚଳଚ୍ଚିତ୍ର ନିର୍ମାଣ କରିବାକୁ ପ୍ରେରଣା ଦେବ। ଏହା ଭାରତର ଯୁବଗୋଷ୍ଠୀଙ୍କ ସୃଜନଶୀଳ ସାମର୍ଥ୍ୟର ପ୍ରମାଣ ବୋଲି ପିଲଚର କହିଛନ୍ତି ଏବଂ ଏହି ରୋମାଞ୍ଚକର ଚ୍ୟାଲେଞ୍ଜ ଆରମ୍ଭ କରିବାକୁ ପାଞ୍ଚଟି ଦଳ ପ୍ରସ୍ତୁତ ଅଛନ୍ତି ବୋଲି ଘୋଷଣା କରିଛନ୍ତି।
ଗତ ସଂସ୍କରଣର ସଫଳତାକୁ ସ୍ମରଣୀୟ କରିବା ଉଦ୍ଦେଶ୍ୟରେ ଶିଳ୍ପ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଗତ ବର୍ଷର ୫ ଜଣ ସିଏମ୍ଓଟି ଚାମ୍ପିୟନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ପୂର୍ବତନ ପ୍ରତିଯୋଗୀମାନେ ୪୮ ଘଣ୍ଟିଆ ଚଳଚ୍ଚିତ୍ର ନିର୍ମାଣ ଚ୍ୟାଲେଞ୍ଜରେ ଅଂଶଗ୍ରହଣକାରୀଙ୍କ ବର୍ତ୍ତମାନର ବ୍ୟାଚ୍କୁ ପରାମର୍ଶ ଦେବେ ଏବଂ ନୂତନ ପିଢ଼ିର ନିର୍ମାତାମାନଙ୍କୁ ମାର୍ଗଦର୍ଶନ କରିବା ପାଇଁ ସେମାନଙ୍କର ମୂଲ୍ୟବାନ ଜ୍ଞାନ ଏବଂ ଅଭିଜ୍ଞତା ବାଣ୍ଟିବେ।
କ୍ରିଏଟିଭ୍ ମାଇଣ୍ଡସ୍ ଅଫ୍ ଟୁମୋରୋ (ସିଏମ୍ଓଟି) ବିଷୟରେ :
କ୍ରିଏଟିଭ୍ ମାଇଣ୍ଡସ ଅଫ୍ ଟୁମୋରୋ (ସିଏମଓଟି) ପଦକ୍ଷେପ ହେଉଛି ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ଏକ ପ୍ରମୁଖ କାର୍ଯ୍ୟକ୍ରମ, ଯାହା ଭାରତର ସବୁଠାରୁ ପ୍ରତିଭାଶାଳୀ ଯୁବ ଚଳଚ୍ଚିତ୍ର ନିର୍ମାତାଙ୍କୁ ଚିହ୍ନଟ କରିବା, ପରିପୁଷ୍ଟ କରିବା ଏବଂ ପ୍ରୋତ୍ସାହିତ କରିବା ପାଇଁ ପ୍ରସ୍ତୁତ କରାଯାଇଛି । ଏହାର ପ୍ରତିଷ୍ଠା ପରଠାରୁ, ସିଏମଓଟି ଭାରତୀୟ ଚଳଚ୍ଚିତ୍ର ଏବଂ ଗଣମାଧ୍ୟମ ଶିଳ୍ପରେ ଆଶାୟୀ ନିର୍ମାତାମାନଙ୍କ ପାଇଁ ସର୍ବବୃହତ ସମ୍ପୂର୍ଣ୍ଣ ସମର୍ଥିତ ମଂଚ ଭାବରେ ଉଭା ହୋଇଛି, ସହଯୋଗ, ଦକ୍ଷତା ନିର୍ମାଣ ଏବଂ ପରାମର୍ଶକୁ ପ୍ରୋତ୍ସାହିତ କରୁଛି । ସିଏମଓଟିର ୨୦୨୪ ସଂସ୍କରଣ ନଭେମ୍ବର ୨୦ ରୁ ୨୮ ପର୍ଯ୍ୟନ୍ତ ଗୋଆରେ ଆୟୋଜିତ ୫୫ତମ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫ୍ଏଫ୍ଆଇ)ରେ ଅନୁଷ୍ଠିତ ହେଉଛି।
ନେଟଫ୍ଲିକ୍ସ ଏବଂ ପର୍ଲ ଏକାଡେମୀ ଭଳି ପ୍ରସିଦ୍ଧ ଶିଳ୍ପ ସଂସ୍ଥାର ସମର୍ଥନରେ ସିଏମଓଟି ଏକ ଭବିଷ୍ୟତ ସୃଷ୍ଟି କରିବାକୁ ଲକ୍ଷ୍ୟ ରଖିଛି ଯେଉଁଠାରେ ଭାରତୀୟ ସିନେମା ବିଶ୍ୱ ସ୍ତରରେ ଆଗକୁ ବଢିପାରିବ।
