ବାଣପୁର: ଓଡିଶା ଆଇନଜୀବୀ କଲ୍ୟାଣ ପାଣ୍ଠି ୧୦ କୋଟିକୁ ବଢିଛି। ପୂର୍ବରୁ ଆଇନଜୀବୀ କଲ୍ୟାଣ ପାଣ୍ଠି ୫ କୋଟି ଥିଲା। ଏନେଇ ରାଜ୍ୟ ସରକାରଙ୍କ ପକ୍ଷରୁ ନିକଟରେ ମଞ୍ଜୁରୀ ମିଳିଛି। ଆଇନଜୀବୀଙ୍କ ମୃତ୍ୟୁ ଓ ଅବସରକାଳୀନ ସହାୟତା ରାଶି ୨ ଗୁଣ ବଢିଛି। ପୁର୍ବରୁ ତାହା ସାଢେ ୪ ଲକ୍ଷ ଟଙ୍କା ଥିବାବେଳେ ଏବେ ତାହା ୯ ଲକ୍ଷ ହୋଇଛି। ଏଥି ନିମନ୍ତେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କୁ ସମ୍ବର୍ଦ୍ଧିତ କରିଛି ବାଣପୁର ଓକିଲ ସଂଘ।
ଆଜି ଓକିଲ ସଂଘ ସମ୍ପାଦକ ରଞ୍ଜନ କୁମାର ବେଦମତ୍ତାଙ୍କ ନେତୃତ୍ୱରେ ଉପସଭାପତି ରାମଚନ୍ଦ୍ର ପଲାଇ, କାର୍ଯ୍ୟକାରୀ ସମିତି ସଭ୍ୟ ସନ୍ତୋଷ କୁମାର ମହାପାତ୍ର, ବରିଷ୍ଠ ଆଇନଜୀବୀ ବିନୋଦ ବିହାରୀ ସ୍ୱାଇଁ, ସୀତାରାମ ଅଗ୍ରୱାଲ, ପଦ୍ମଜା ପଟ୍ଟନାୟକ, ପ୍ରଦୋଷ ପ୍ରଧାନ, କାମେଶ୍ୱର ଆଚାରୀ ଆଦି ମନ୍ତ୍ରୀ ଶ୍ରୀ ହରିଚନ୍ଦନଙ୍କୁ ଭେଟି ସମ୍ବର୍ଦ୍ଧିତ କରିବା ସହ ଧନ୍ୟବାଦ ଜ୍ଞାପନ କରିଥିଲେ।
ଆଇନଜୀବୀ କଲ୍ୟାଣ ପାଣ୍ଠି ୧୦ କୋଟିକୁ ବଢିଥିବାରୁ ଏହା ନିଶ୍ଚିତ ଏକ ବଳିଷ୍ଠ ଓ ସ୍ୱାଗତଯୋଗ୍ୟ ପଦକ୍ଷେପ ବୋଲି ଓକିଲମାନେ କହିଥିଲେ। ଏଥି ନିମନ୍ତେ ବାଣପୁର ଓକିଲ ସଂଘ କର୍ମକର୍ତ୍ତା ମାନେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଆଡଭୋକେଟ ଜେନେରାଲ ପିତାମ୍ବର ଆଚାର୍ଯ୍ୟଙ୍କୁ ମଧ୍ୟ କୃତଜ୍ଞତା ଜଣାଇଛନ୍ତି।
ଏହି ଅବସରରେ ଖୁବଶୀଘ୍ର ବାଣପୁରରେ ବହୁ ପ୍ରତିକ୍ଷିତ ଏଡ଼ିଜେ କୋର୍ଟ ଖୋଲିବାକୁ ଯାଉଅଛି ବୋଲି ମନ୍ତ୍ରୀ ଉପସ୍ଥିତ ଓକିଲମାନଙ୍କୁ ସୂଚନା ଦେଇଥିଲେ।
