ଭୁବନେଶ୍ବର: କାର୍ତ୍ତିକ ବ୍ରତ ପାଳନ ପାଇଁ ପୁରୀକୁ ଆସିଥିବା ହବିଷ୍ୟାଳୀ ମା’ମାନଙ୍କ ସୁବିଧା ଏବଂ ସହଯୋଗ ନିମନ୍ତେ ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ତିନି କୋଟି କୋଡ଼ିଏ ଲକ୍ଷ ଟଙ୍କାର ଅର୍ଥରାଶି ଅନୁମୋଦିତ ହୋଇଛି। ଚଳିତ ବର୍ଷ ପବିତ୍ର କାର୍ତ୍ତିକ ମାସରେ ଶ୍ରୀକ୍ଷେତ୍ରରେ ମହାପ୍ରଭୁଙ୍କ ଦର୍ଶନ ଓ ବ୍ରତ ପାଳନ କରିବା ପାଇଁ ବହୁସଂଖ୍ୟାରେ ମା’ମାନେ ଏକତ୍ରିତ ହୋଇଛନ୍ତି। ସେମାନଙ୍କର ଏହି ଏକମାସିଆ ବ୍ରତ ଯେପରି ଅତ୍ୟନ୍ତ ଶୃଙ୍ଖଳିତ, ସୁରକ୍ଷିତ ଏବଂ ଆଧ୍ୟାତ୍ମିକ ପରିବେଶରେ ସମ୍ପନ୍ନ ହୋଇପାରିବ, ସେଥିପାଇଁ ପ୍ରଶାସନ ତରଫରୁ ବ୍ୟାପକ ପ୍ରସ୍ତୁତି କରାଯାଇଛି।
ପୁରୀର ବିଭିନ୍ନ ନିର୍ଦ୍ଦିଷ୍ଟ କେନ୍ଦ୍ରରେ ହବିଷ୍ୟାଳୀ ମା’ମାନଙ୍କ ପାଇଁ ସ୍ୱତନ୍ତ୍ର ଓ ସୁରକ୍ଷିତ ରହଣିର ବ୍ୟବସ୍ଥା କରାଯିବା ସହିତ ସେମାନଙ୍କୁ ନିୟମିତ ମହାପ୍ରସାଦ ସେବନ ଏବଂ ଶ୍ରୀଜୀଉଙ୍କ ଦର୍ଶନର ସୁବନ୍ଦୋବସ୍ତ କରାଯାଇଛି। ଏହା ସହିତ ସେମାନଙ୍କ ଆଧ୍ୟାତ୍ମିକ ଅଭିଜ୍ଞତାକୁ ଆହୁରି ସମୃଦ୍ଧ କରିବା ନିମନ୍ତେ ପ୍ରତିଦିନ ସନ୍ଧ୍ୟାରେ ଭଜନ, କୀର୍ତ୍ତନ ଏବଂ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଉଛି। କାର୍ତ୍ତିକ ମାସରେ ଶ୍ରୀକ୍ଷେତ୍ରରେ ପ୍ରବଳ ଜନଗହଳି ଓ ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ମା’ମାନେ ଯେପରି ବିନା କୌଣସି ଅସୁବିଧାରେ ମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିପାରିବେ, ସେଥିପାଇଁ ସ୍ୱତନ୍ତ୍ର ଯାନବାହନ ବ୍ୟବସ୍ଥା ଏବଂ ସ୍ୱେଚ୍ଛାସେବୀଙ୍କୁ ମୁତୟନ କରାଯାଇଛି।
ମା’ମାନଙ୍କ ସ୍ୱାସ୍ଥ୍ୟ, ନିରାପତ୍ତା ଏବଂ ସ୍ୱଚ୍ଛତାକୁ ସର୍ବାଧିକ ଗୁରୁତ୍ୱ ଦିଆଯାଇ ପରିମଳ ବ୍ୟବସ୍ଥା, ବିଶୁଦ୍ଧ ପାନୀୟ ଜଳ ଯୋଗାଣ, ନିରବଚ୍ଛିନ୍ନ ବିଦ୍ୟୁତ ସେବା ଏବଂ ଅନ୍ୟାନ୍ୟ ସମସ୍ତ ଆନୁଷଙ୍ଗିକ ସୁବିଧାକୁ କଡ଼ାକଡ଼ି ଭାବେ ତଦାରଖ କରାଯାଉଛି। ସରକାରଙ୍କ ଏହି ସହାୟତା ଓ ସୁପରିଚାଳନା ଯୋଗୁଁ ହବିଷ୍ୟାଳୀ ମା’ମାନେ କୌଣସି ପ୍ରକାର ସମସ୍ୟାର ସମ୍ମୁଖୀନ ନ ହୋଇ ଅତି ଆନନ୍ଦ ଏବଂ ନିଷ୍ଠାର ସହିତ ନିଜର ପବିତ୍ର କାର୍ତ୍ତିକ ବ୍ରତ ପାଳନ କରିପାରୁଛନ୍ତି।