ମୁମ୍ବାଇ: ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଗୁରୁବାର ଦିନ ଏକ ଆଶ୍ଚର୍ଯ୍ୟଜନକ ଦାବି କରିଛନ୍ତି। ସେ କହିଛନ୍ତି ଯେ, ଆମ୍ ଆଦମୀ ପାର୍ଟି (ଏଏପି) ର କିଛି ବିଧାୟକ ଦିଲ୍ଲୀ ବିଧାନସଭା ନିର୍ବାଚନ ପାଇଁ ଶିବସେନା ସହ ସମ୍ପର୍କରେ ଅଛନ୍ତି। ତେବେ ଭୋଟ୍ ବିଭାଜନକୁ ଏଡାଇବା ପାଇଁ ଭାରତୀୟ ଜନତା ପାର୍ଟି (ବିଜେପି) କୁ ଶିବସେନା ସମର୍ଥନ ଘୋଷଣା କରିଥିବାରୁ ସେମାନେ ପ୍ରାର୍ଥୀ ଦେଇନାହାନ୍ତି।
ଏକନାଥ ସିନ୍ଦେ କହିଛନ୍ତି ଯେ, ସେ ଖୁବ ଶୀଘ୍ର ଦିଲ୍ଲୀ ଆସି ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିବେ। ଡେପୁଟି ସିଏମ୍ କହିଛନ୍ତି ଯେ, “ଆମ୍ ଆଦମୀ ପାର୍ଟିର ବର୍ତ୍ତମାନର ବିଧାୟକମାନେ ଆମ ସହ ଯୋଗାଯୋଗ କରିଥିଲେ। କିନ୍ତୁ ଆମେ ବିଜେପି ସହ ମେଣ୍ଟ କରୁଛୁ। ଆମର ଉଭୟ ଦଳ (ବିଜେପି ଏବଂ ଶିବସେନା) ସମାନ ଚିନ୍ତାଧାରା ରଖନ୍ତି।
ମହାରାଷ୍ଟ୍ରର ଡେପୁଟି ସିଏମ୍ ଆହୁରି ମଧ୍ୟ କହିଛନ୍ତି ଯେ, “ଭୋଟ୍ ବିଭାଜନକୁ ଏଡାଇବା ପାଇଁ ଆମେ ପ୍ରାର୍ଥୀ କରିନାହୁଁ କାରଣ ଏହା ବିରୋଧୀଙ୍କୁ ଉପକୃତ କରିପାରେ। ଆମେ ଦିଲ୍ଲୀରେ ବିଜେପିକୁ ସମ୍ପୂର୍ଣ୍ଣ ସମର୍ଥନ କରିଛୁ।”
ଅନ୍ୟ ରାଜ୍ୟରେ ପରିଚୟ ସୃଷ୍ଟି କରିବା ପ୍ରଶ୍ନରେ ଏକନାଥ ସିନ୍ଦେ କହିଛନ୍ତି ଯେ, ରାଜସ୍ଥାନରେ ଶିବସେନାର ତିନିଜଣ ବିଧାୟକ ଅଛନ୍ତି ଏବଂ ଦଳ ଅନ୍ୟ ରାଜ୍ୟରେ ମଧ୍ୟ ଏହାର ସ୍ଥିତି ବୃଦ୍ଧି କରିବାକୁ ଚାହୁଁଛି।
ସୂଚନାଯୋଗ୍ୟ ଯେ, ପ୍ରାୟ ଏକ ସପ୍ତାହ ପୂର୍ବରୁ ଅସନ୍ତୋଷ ଖବର ମଧ୍ୟରେ ଶିବସେନା ମୁଖ୍ୟ ଏକନାଥ ସିନ୍ଦେ ଦିଲ୍ଲୀ ନିର୍ବାଚନରେ ବିଜେପିକୁ ସମର୍ଥନ ଘୋଷଣା କରିଥିଲେ। ଏଥିପାଇଁ ସେ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କୁ ଏକ ଚିଠି ଲେଖି ପ୍ରତିଶୃତି ଦେଇଛନ୍ତି ଯେ, ଦିଲ୍ଲୀ ନିର୍ବାଚନରେ ଶିବସେନା ବିଜେପିକୁ ସମ୍ପୂର୍ଣ୍ଣ ସମର୍ଥନ କରିବ ଏବଂ ଶିବସେନା ଦିଲ୍ଲୀ ପ୍ରଦେଶ ବିଜେପି ସହଯୋଗରେ ନିର୍ବାଚନ ପ୍ରଚାରରେ ସମ୍ପୂର୍ଣ୍ଣ ସକ୍ରିୟ ରହିବ।
ଉଲ୍ଲେଖ ଯୋଗ୍ୟ ଯେ, ମହାରାଷ୍ଟ୍ର ଡେପୁଟି ସିଏମ୍ ଅଜିତ ପାୱାରଙ୍କ ଏନସିପି ଦିଲ୍ଲୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛି। ଏନସିପି ଦ୍ୱାରା ପ୍ରାୟ 30 ଜଣ ପ୍ରାର୍ଥୀଙ୍କ ତାଲିକା ପ୍ରକାଶ ପାଇଛି। ଏହା ବ୍ୟତୀତ ମହାୟୁତି ସହଯୋଗୀ ରାମଦାସ ଅଠାୱାଲେଙ୍କ ଦଳ ମଧ୍ୟ ଦିଲ୍ଲୀର କିଛି ବିଧାନସଭା ଆସନରେ ନିର୍ବାଚନ ଲଢୁଛି।
