ଭିଡ଼ହିଂସାକୁ ନେଇ ବହୁଜନ ସମାଜ ପାର୍ଟି ଅଧ୍ୟକ୍ଷ ମାୟାବତୀ ଶନିବାର ଭିଡ ହିଂସାକୁ ନେଇ ପ୍ରତିକ୍ରିୟା ରଖିଛନ୍ତି । ଏହି ଭିଡହିଂସା କବଳରେ କେବଳ ଦଳିତ, ଆଦିବାସୀ ତଥା ସଂଖ୍ୟାଲଘୁ ସମ୍ପ୍ରଦାୟର ଲୋକ ଏଥିରେ ଶିକାର ହେଉନାହାନ୍ତି, ବରଂ ଏଥିରୁ ପୋଲିସ କର୍ମଚାରୀ ମଧ୍ୟ ନିସ୍ତାର ପାଉ ନାହାନ୍ତି। ଏବେ ରକ୍ଷକଙ୍କୁ ଭିଡ଼ହିଂସାର ସମ୍ମୁଖୀନ ହେବାକୁ ପଡୁଛି ବୋଲି ବିଏସ୍ପି ଅଧ୍ୟକ୍ଷା ମାୟାବତୀ ଶନିବାର ଟୁଇଟ୍ କରି ଜଣାଇଛନ୍ତି। ଏଭଳି ଘଟଣାକୁ ରୋକିବାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ବିଫଳ ହୋଇଥିବା ସେ କହିଛନ୍ତି। ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ପରେ କେନ୍ଦ୍ର ସରକାର ଶୀଘ୍ର ଏନେଇ ଆଇନ ପ୍ରଣୟନ କରିବାର ଆବଶ୍ୟକତା ରହିଛି। ମାତ୍ର ସରକାର ଏଭଳି ସମ୍ବେଦନଶୀଳ ଘଟଣା ପ୍ରତି ଉଦାସୀନ ରହିବା ଅତି କ୍ଷୋଭର ବିଷୟ ବୋଲି ମାୟାବତୀ କହିଛନ୍ତି। ଏପରି ସମୟରେ ଉତ୍ତରପ୍ରଦେଶ ରାଜ୍ୟ ବିଧି ଆୟୋଗ ଭିଡ ହିଂସା ଉପରେ ଅଙ୍କୁଶ ଲଗାଇବା ପାଇଁ ନୂଆ ଶକ୍ତ ଆଇନ୍ କରିବା ପ୍ରଚେଷ୍ଟାକୁ ସ୍ବାଗତ କରିଛନ୍ତି ମାୟାବତୀ । ଏହା ପୂର୍ବରୁ ଆୟୋଗ ଏହି ସମ୍ବନ୍ଧୀୟ ଏକ ବିଧେୟକ ପାରିତ୍ କରିଥିଲେ । ଏଥିରେ ଦୋଷୀଙ୍କୁ ଆଜୀବନ ଦଣ୍ଡ ଦିଆଯିବାର ପ୍ରସ୍ତାବ ରହିଛି । ତେବେ ବର୍ତ୍ତମାନ ଆଇନର ପ୍ରୟୋଗ ଫଳରେ ଏପରି ଘଟଣା ଉପରେ ନିୟନ୍ତ୍ରଣ ଆଣାଯାଇପାରିବ । କିନ୍ତୁ ଯେଉଁପରି ଭାବରେ ଏହି ରୋଗ ବଢି ଚାଲିଛି, ଭିଡହିଂସା ବିରୋଧୀ ଆଇନ୍ ଆଣିବା ଜରୁରୀ ହୋଇପଡିଲାଣି । ସରକାରଙ୍କୁ ଏହି ସମ୍ବନ୍ଧୀୟ ପଦକ୍ଷେପ ନେବା ଉଚିତ୍ ବୋଲି କହିଛନ୍ତି ମାୟାବତୀ ।
