ନୂଆଦିଲ୍ଲୀ: ସମାଜବାଦୀ ପାର୍ଟିର ପୂର୍ବତନ ଏମ୍.ଏଲ.ସି. ଆୟ ବହିର୍ଭୂତ ସମ୍ପତ୍ତି ମାମଲାରେ ବାରାଣାସୀ ପୋଲିସ ଦ୍ୱାରା ଗିରଫ କରାଯାଇଛି। ପ୍ରୟାଗରାଜ ସହରର ଜର୍ଜ ଟାଉନ୍ ଅଞ୍ଚଳରେ ଥିବା ତାଙ୍କ ବାସଭବନରେ ଚଢାଉ କରିବା ପରେ ପୂର୍ବତନ ଏମଏଲସିଙ୍କୁ ଗିରଫ କରାଯାଇଛି।
ଭିଜିଲାନ୍ସ ଅଖିଳେଶ ଯାଦବଙ୍କ ଘନିଷ୍ଠ ବାସୁଦେବ ଯାଦବଙ୍କ ବିରୋଧରେ ମାମଲା ଦାୟର କରିଥିଲା। ଏହି ମାମଲାରେ ବାରାଣାସୀ କୋର୍ଟ ପୂର୍ବତନ ଏମଏଲସି ବାସୁଦେବ ଯାଦବଙ୍କୁ ସମନ କରିଥିଲେ। ଅନେକ ଥର ସମନ ଜାରି କରାଯିବା ସତ୍ତ୍ୱେ ସେ କୋର୍ଟରେ ହାଜର ହୋଇନଥିବା ବେଳେ ତାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରାଯାଇଥିଲା। ଏହି ଜାମିନ ବିହୀନ ୱାରେଣ୍ଟ ଆଧାରରେ ବାରାଣାସୀ ପୋଲିସ ମଙ୍ଗଳବାର ଦିନ ପ୍ରୟାଗରାଜରେ ଚଢାଉ କରିଥିଲା।
ବାସ୍ତବରେ ବାସୁଦେବ ଯାଦବ ଶିକ୍ଷା ବିଭାଗରେ ଗୁରୁତ୍ୱପୂର୍ଣ୍ଣ ପଦବୀରେ ଅବସ୍ଥାପିତ ହୋଇଥିବାବେଳେ ଆୟ ବହିର୍ଭୂତ ସମ୍ପତ୍ତି ଜମା କରିଥିବା ଅଭିଯୋଗ ହୋଇଥିଲା। ସେ ୟୁପି ବୋର୍ଡର ସଚିବ ଏବଂ ୟୁପି ମାଧ୍ୟମିକ ଶିକ୍ଷା ବିଭାଗରେ ନିର୍ଦ୍ଦେଶକ ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ୨୦୧୭ ରେ ୟୁପିରେ ଯୋଗୀ ଆଦିତ୍ୟନାଥ ସରକାର ଗଠନ ପରେ ସେପ୍ଟେମ୍ବର ୧୨ ତାରିଖରେ ବାସୁଦେବ ଯାଦବଙ୍କ ବିରୋଧରେ ଭିଜିଲାନ୍ସ ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଥିଲା।
ପ୍ରକାଶ ଥାଉ କି ବାସୁଦେବ ଯାଦବଙ୍କ ଝିଅ ନିଧି ଯାଦବ ସମାଜବାଦୀ ପାର୍ଟିର ମୁଖପାତ୍ର ଅଟନ୍ତି। ବାସୁଦେବ ଯାଦବ ମୁଲାୟମ ସିଂ ଯାଦବ ଏବଂ ଅଖିଳେଶ ଯାଦବଙ୍କ ଅତି ଘନିଷ୍ଠ ବୋଲି କୁହାଯାଏ। ଅଭିଯୋଗ ହେଉଛି ଯେ, ଯାଦବ ପରିବାର ସହିତ ତାଙ୍କର ଘନିଷ୍ଠତା ହେତୁ ତାଙ୍କୁ ସମାଜବାଦୀ ପାର୍ଟି ସରକାରରେ ବହୁତ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଥିଲା। ବାସୁଦେବ ଯାଦବଙ୍କ ମାମଲା ମଧ୍ୟ ଆହ୍ଲାବାଦ ହାଇକୋର୍ଟରେ ଚାଲିଥିଲା।
