ଭୁବନେଶ୍ୱର: ଗୁରୁବାର ଭୁବନେଶ୍ୱର ସ୍ଥିତ ସିପିଆଇ ରାଜ୍ୟ କାର୍ଯ୍ୟାଳୟ ଭଗବତୀ ଭବନଠାରେ ୪ ଟି ବାମପନ୍ଥୀ ଦଳଙ୍କ ମିଳିତ ବୈଠକ ଅନୁଷ୍ଠିତ ହୋଇଯାଇଛି। ରାଜ୍ୟରେ ନାରୀ ନିର୍ଯାତନା ଏବଂ ଆଇନ ଶୃଙ୍ଖଳାକୁ ନେଇ ବିଧାନସଭାରେ ଆସିଥିବା ଶ୍ୱେତପତ୍ରରେ ଯାହା ଦର୍ଶାଇଛି ତାହା ଅତ୍ୟନ୍ତ ଚିନ୍ତାଜନକ ଓ ଉଦ୍ବେଗଜନକ ବୋଲି ବାମପନ୍ଥୀ ଦଳ ସିପିଆଇ, ସିପିଆଇ (ଏମ୍), ସିପିଆଇ (ଏମ୍-ଏଲ) ଲିବରେସନ ଓ ଫରୱାର୍ଡବ୍ଲକ ତରଫରୁ ଏହି ମିଳିତ ବୈଠକରେ ଉଦ୍ବେଗ ପ୍ରକାଶ ପାଇଛି। ସରକାର ଏହି ସ୍ଥିତିକୁ ନିୟନ୍ତ୍ରଣ କରିବାଲାଗି ତୁରନ୍ତ ଗୃହକମିଟି ଗଠନ କରିବାକୁ ବାମପନ୍ଥୀ ଦଳମାନେ ଦାବି କରିଛନ୍ତି।
ଏଠାରେ ଉଲ୍ଲେଖଥାଉ କି, ରାଜ୍ୟରେ ବିଜେପି ସରକାରକୁ ଆସିବାର ୯ ମାସ ହୋଇଥିଲାବେଳେ ରାଜ୍ୟରେ ଦୁଷ୍କର୍ମ, ହତ୍ୟା, ଦଙ୍ଗା, ଚୋରି, ନାରୀ ନିର୍ଯାତନା ବୃଦ୍ଧି ପାଇ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଛି। ମାତ୍ର ସରକାର ଏହାକୁ ନିୟନ୍ତ୍ରଣ କରିବାରେ ବ୍ୟର୍ଥ ହୋଇଛନ୍ତି। ରାଜ୍ୟର ମୁଖ୍ୟମନ୍ତ୍ରୀ ଗୃହକମିଟି ଗଠନ କରିବା ଦରକାର ନାହିଁ ବୋଲି କହିବା ହାସ୍ୟାସ୍ପଦ ବୋଲି କୁହାଯାଇ ମୁଖ୍ୟମନ୍ତ୍ରୀଙ୍କ ଏତାଦୃଶ ମନ୍ତବ୍ୟକୁ ପ୍ରତିବାଦ କରାଯାଇଛି।
ଏ ସମ୍ପର୍କରେ ୪ଟି ବାମପନ୍ଥୀ ଦଳ ପକ୍ଷରୁ ରାଷ୍ଟ୍ରପତି ଏବଂ ରାଜ୍ୟପାଳଙ୍କୁ ସ୍ମାରକପତ୍ର ଦେବାକୁ ସ୍ଥିର କରାଯାଇଛି। ଯେଉଁଭଳି ଭାବରେ ବିଧାନସଭାରେ ୧୪ଜଣ କଂଗ୍ରେସ ବିଧାୟକଙ୍କୁ ନିଲମ୍ବନ କରାଗଲା ତାହା ଅସାମ୍ବିଧାନିକ ବୋଲି ବିବେଚନା କରିବା ସହିତ ତୁରନ୍ତ ନିଲମ୍ବନ ଆଦେଶ ପ୍ରତ୍ୟାହାର କରିବାକୁ ଦାବି କରାଯାଇଛି। ଗଣତନ୍ତ୍ରର ସୁରକ୍ଷାଲାଗି ବାମପନ୍ଥୀ ଦଳମାନଙ୍କ ପକ୍ଷରୁ ରାଜ୍ୟସାରାଏପ୍ରିଲ ପ୍ରଥମ ସପ୍ତାହରେ ଗଣ ଅଭିଯାନ ଚଳାଇବାଲାଗି ଆଜିର ବୈଠକରେ ନିଷ୍ପତ୍ତି ନିଆଯାଇଛି।
କଂଗ୍ରେସ ଦଳ ପକ୍ଷରୁ ବିଧାନସଭା ସମ୍ମୁଖରେ ହୋଇଥିବା ପ୍ରତିବାଦ ସମାବେଶ ଉପରେ ପୋଲିସର ବର୍ବର ଲାଠିଚାଳନା, ଆକ୍ରମଣ, ପାଣିମାଡ଼, ଲୁହବୁହାଗ୍ୟାସ୍ ପ୍ରୟୋଗ ଓ ଅନ୍ୟାୟ ଗିରଫଦାରୀକୁ ବାମପନ୍ଥୀ ଦଳମାନଙ୍କ ପକ୍ଷରୁ ଦୃଢ଼ ନିନ୍ଦାକରାଯାଉଛି। ବିଜେପି ଶାସନର ଏକଛତ୍ରବାଦୀ ଆକ୍ରମଣ ବିରୋଧରେ ରାଜ୍ୟବ୍ୟାପୀ ସମ୍ମିଳିତ ପ୍ରତିରୋଧ କରିବା ପାଇଁ ଆହ୍ୱାନ ଦିଆଯାଇଛି।
ଉକ୍ତ ବୈଠକରେ ସିପିଆଇ ରାଜ୍ୟ ସମ୍ପାଦକ ଆଶିଷକାନୁନ୍ଗୋ, ପୂର୍ବତନ ବିଧାୟକ ଏନ. ନାରାୟଣ ରେଡ୍ଡି, ରାଜ୍ୟ ସମ୍ପାଦକମଣ୍ଡଳୀ ସଭ୍ୟ ଜୟନ୍ତ ଦାସ, ସିପିଆଇ (ଏମ୍)ର ରାଜ୍ୟ ସମ୍ପାଦକ ସୁରେଶ ପାଣିଗ୍ରାହୀ, ରାଜ୍ୟ ସଂପାଦକ ମଣ୍ଡଳୀ ସଦସ୍ୟ ଦୁଷ୍ମନ୍ତ ଦାସ, ବଦ୍ରିନାରାୟଣ ଦାସ, ସିପିଆଇ-ଏମ.ଏଲ.(ଲିବରେସନର) ରାଜ୍ୟ ନେତା ମହେନ୍ଦ୍ର ପରିଡ଼ା, ବଂଶୀଧର ପରିଡ଼ା ଏବଂ ଫରୱାର୍ଡବ୍ଲକର ରାଜ୍ୟ ସାଧାରଣ ସମ୍ପାଦକ ଜ୍ୟୋତିରଞ୍ଜନ ମହାପାତ୍ର ପ୍ରମୁଖ ନେତୃବୃନ୍ଦ ଯୋଗ ଦେଇଥିଲେ।