ଏବେ ଦେଶରେ ଅଳିଆ ବଦଳରେ ମିଳିବ ଖାଇବା । ଏହି କଥାଟି ଆଶ୍ଚର୍ଯ୍ୟ ଲାଗୁଥାଇପାରେ କିନ୍ତୁ ଏହା ପୂରା ସତ । ଦେଶରେ ଅଳିଆ ପରିଚାଳନାକୁ ନେଇ ଏକ ଭିନ୍ନ ପ୍ରୟାସ ଆରମ୍ଭ କରାଯାଉଛି । ପ୍ରଗତିଶୀଳ ଦେଶ ଭାରତ ପାଇଁ ସ୍ବଚ୍ଛତା ଓ ଅନାହାର ଏକ ଚ୍ୟାଲେଞ୍ଜ ପାଲଟିଛି । ଏହି ଦୁଇ ସମସ୍ୟାର ମୂଳୋତ୍ପାଟନ କରିବାକୁ ଛତିଶଗଡ ନଗର ନିଗମ ଏକ ଅଭିନବ ଉପାୟ ଅବଲମ୍ବନ କରୁଛନ୍ତି । ଛତିଶଗଡ଼ର ଅବନ୍ତିପୁରା ସହରରେ ଏବେ ‘ଗାର୍ବେଜ୍ କାଫେ’ ଲଞ୍ଚ କରୁଛନ୍ତି । ଏଠାରେ ଅଳିଆ ବଦଳରେ ପେଟପୂରା ଖାଇବାକୁ ମିଳିବ । ଏହା ଦେଶର ପ୍ରଥମ ଗାର୍ବେଜ୍ କାଫେ ହେବ। ଯେଉଁଠାରେ ନଗର ନିଗମର ଗରିବ ଓ ଅନାହାରୀଙ୍କୁ ପ୍ଲାଷ୍ଟିକ୍ ତଥା ଅଳିଆ ବଦଳରେ ଖାଦ୍ୟ ଖାଇବାକୁ ମିଳିବ। ଏହି କାଫେରେ ଏକ କିଲୋ ପ୍ଲାଷ୍ଟିକ୍ ବଦଳରେ ଗୋଟେ ପ୍ଲେଟ ଭରପୂର ଖାଦ୍ୟ ମିଳିବ। ସେହିପରି ୫୦୦ ଗ୍ରାମ ପ୍ଲାଷ୍ଟିକ୍ ଅଳିଆ ପାଇଁ ସୁନ୍ଦର ଜଳଖିଆ ଖାଇବାକୁ ମିଳିବ । ଏହା ଗାର୍ବେଜ୍ କାଫେ ଅବନ୍ତିପୁରାର ମୁଖ୍ୟ ବସ୍ ଷ୍ଟାଣ୍ଡ୍ ପାଖରେ ହେବାର ନିଷ୍ପତ୍ତି ନିଆଯାଇଛି । ପ୍ରାଥମିକ ସ୍ତରରେ ଏହି ପ୍ରୋଜେକ୍ଟ ପାଇଁ ପାଞ୍ଚ ଲକ୍ଷ ଟଙ୍କାର ବଜେଟ୍ ପ୍ରସ୍ତୁତ କରାଯାଇଛି । ରାସ୍ତାରୁ ପ୍ଲାଷ୍ଟିକ ତଥା ଅଳିଆ ଆଣୁଥିବା ଲୋକଙ୍କୁ ଏଠାରେ ଖାଦ୍ୟ ଯୋଗାଇ ଦିଆଯିବ । ଏହି ଅଭିନବ ପ୍ରକ୍ରିୟାକୁ ସ୍ବଚ୍ଛଭାରତର ଅଂଶରୂପେ ଗ୍ରହଣ କରାଯାଇଛି ।
