ମୁମ୍ବାଇ: ମହାରାଷ୍ଟ୍ର ସରକାରଙ୍କ ‘ଲାଡ଼କି ବହିନ ଯୋଜନା’, ଯାହାର ଲକ୍ଷ୍ୟ ଥିଲା ପ୍ରତି ମାସରେ ଆର୍ଥିକ ଦୁର୍ବଳ ମହିଳାଙ୍କୁ ୧୫୦୦ ଟଙ୍କା ଆର୍ଥିକ ସହାୟତା ପ୍ରଦାନ କରିବା, ଏବେ ଏହା ଠକେଇ ଯୋଗୁଁ ଚର୍ଚ୍ଚାକୁ ଆସିଛି।
ତଦନ୍ତରୁ ଜଣାପଡିଛି ଯେ, ପ୍ରାୟ ୧୪,୨୯୮ ପୁରୁଷ ଜାଲ୍ ଡକ୍ୟୁମେଣ୍ଟ ସାହାଯ୍ୟରେ ଏହି ଯୋଜନାର ଲାଭ ଉଠାଇ ସରକାରୀ ରାଜକୋଷକୁ ପ୍ରାୟ ୨୧.୪୪ କୋଟି ଟଙ୍କା କ୍ଷତି ପହଞ୍ଚାଇଛନ୍ତି। ପ୍ରକାଶ ଯେ, ଏହି ଯୋଜନା ଅଗଷ୍ଟ ୨୦୨୪ ରେ ଆରମ୍ଭ ହୋଇଥିଲା।
ଏହି ଯୋଜନାର ଅଡିଟ୍ ସମୟରେ ଜଣାପଡିଥିଲା ଯେ ଅନେକ ପୁରୁଷ ଜାଲ୍ ଆଧାର କିମ୍ବା ଡକ୍ୟୁମେଣ୍ଟ ମାଧ୍ୟମରେ ନିଜକୁ ମହିଳା ବୋଲି ଦାବି କରି ଯୋଜନାରେ ପଞ୍ଜୀକୃତ କରିଥିଲେ ଏବଂ ପ୍ରତି ମାସରେ ଆର୍ଥିକ ଲାଭ ନେଉଥିଲେ।
ଏହାର ଖୁଲାସା ହେବା ପରେ ଲୋକମାନେ ପ୍ରଶ୍ନ କରିବା ଆରମ୍ଭ କରିଛନ୍ତି ଯେ, ଆବେଦନ ଯାଞ୍ଚ ପ୍ରକ୍ରିୟା ଏତେ ଦୁର୍ବଳ କିପରି ଥିଲା ଏବଂ ସମଗ୍ର ବ୍ୟବସ୍ଥା ତଦାରଖ କରିବାରେ କିପରି ବିଫଳ ହେଲା?
ଉପମୁଖ୍ୟମନ୍ତ୍ରୀ ଅଜିତ ପାୱାର ସ୍ପଷ୍ଟ ଭାବରେ କହିଥିଲେ ଯେ, ଠକେଇ କରି ଲାଭ ନେଇଥିବା ପୁରୁଷଙ୍କଠାରୁ ଟଙ୍କା ଆଦାୟ କରାଯିବ ଏବଂ ଯଦି ସେମାନେ ସହଯୋଗ ନ କରନ୍ତି, ତେବେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏହା ସହିତ ସରକାରୀ ଚାକିରିରେ ଥିବା ଏବଂ ଯୋଜନାର ସର୍ତ୍ତାବଳୀ ଅନୁଯାୟୀ ଯୋଗ୍ୟ ନଥିବା ହିତାଧିକାରୀଙ୍କ ତାଲିକାରେ କିଛି ମହିଳା ଥିଲେ; ସେମାନଙ୍କ ନାମ ପୂର୍ବରୁ ହଟାଇ ଦିଆଯାଇଛି। ପୂର୍ବରୁ ମହାରାଷ୍ଟ୍ରରେ ସାନିଟାରୀ ନାପକିନ ସବସିଡି ଏବଂ ଶିବ ଭୋଜନ ଥାଳି ଭଳି ଯୋଜନାରେ ଅଯୋଗ୍ୟ ଲୋକଙ୍କ ନାମରେ ଟଙ୍କା ନେବା ଘଟଣା ମଧ୍ୟ ସାମ୍ନାକୁ ଆସିଥିଲା।