ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା “ପ୍ରଧାନମନ୍ତ୍ରୀ ଧନ ଧାନ୍ୟ କୃଷି ଯୋଜନା (ପିଏମ- ଡିଡିକେୱାଇ)” ଏବଂ “ଡାଲିରେ ଆତ୍ମନିର୍ଭରତା ପାଇଁ ମିଶନ” ର ଜାତୀୟ ଶୁଭାରମ୍ଭ ଅବସରରେ, ଆଇସିଏଆର– ସେଣ୍ଟ୍ରାଲ ଇନଷ୍ଟିଚ୍ୟୁଟ୍ ଫର୍ ଓମେନ୍ ଇନ୍ ଏଗ୍ରିକଲ୍ଚର (ଆଇସିଏଆର- ସିଆଇଡବ୍ଲୁଏ), ଭୁବନେଶ୍ୱର ଦ୍ୱାରା ଏକ ବିଶେଷ ଲାଇଭ୍ ୱେବକାଷ୍ଟ ଆୟୋଜିତ ହୋଇଥିଲା।
ଏହି ଅବସରରେ ପ୍ରତିଷ୍ଠାନର କର୍ମଚାରୀ ଓ ଜନପ୍ରତିନିଧିଙ୍କ ସମେତ ପ୍ରାୟ ୬୦୦ରୁ ଅଧିକ ମହିଳା କୃଷକ ଅଂଶଗ୍ରହଣ କରିଥିଲେ। ସମସ୍ତେ ପ୍ରଧାନମନ୍ତ୍ରୀଙ୍କ ଭାଷଣ ମାଧ୍ୟମରେ ଭାରତ ସରକାରଙ୍କ ନୂତନ କୃଷି ଯୋଜନା, ଆତ୍ମନିର୍ଭର ଭାରତ ଲକ୍ଷ୍ୟ ଏବଂ ଚାଷୀ ଉନ୍ନୟନ ପ୍ରୟାସ ବିଷୟରେ ଜାଣି ଲାଭାନ୍ବିତ ହୋଇଥିଲେ।
କାର୍ଯ୍ୟକ୍ରମର ଆରମ୍ଭରେ ଆଇସିଏଆର- ସିଆଇଡବ୍ଲୁଏ ର ନିର୍ଦ୍ଦେଶିକା ଡା. ମୃଦୁଲା ଦେବୀ, ପିଏମ- ଡିଡିକେୱାଇ ଯୋଜନାର ଉଦ୍ଦେଶ୍ୟ ଓ ଗୁରୁତ୍ୱ ବିଷୟରେ ଆଲୋକପାତ କରିଥିଲେ। ସେ କହିଥିଲେ ଯେ, ଏହି ଯୋଜନା ମାଧ୍ୟମରେ କୃଷି ଉତ୍ପାଦନ ବୃଦ୍ଧି, ଫସଲ ବିବିଧତା, ସ୍ଥାୟୀ କୃଷି ପ୍ରଣାଳୀ, ଜଳସେଚନ ସୁବିଧା ଏବଂ ଋଣ ସୁଲଭତାରେ ଉନ୍ନତି ଆଣାଯିବ।
ପିଏମ- ଡିଡିକେୱାଇ ର ମୂଖ୍ୟ ଲକ୍ଷ୍ୟ ହେଉଛି- ଡିଏ ଆଣ୍ଡ ଏଫଡବ୍ଲୁ, ସହଯୋଗୀ ମନ୍ତ୍ରଣାଳୟ ଏବଂ ରାଜ୍ୟ ସରକାରଙ୍କ ବିଦ୍ୟମାନ ଯୋଜନାଗୁଡ଼ିକୁ ସମନ୍ୱୟ କରି ୧୦୦ଟି ଜିଲ୍ଲାରେ କୃଷି ମାନଚିତ୍ର ଉନ୍ନତ କରିବା।
ପ୍ରଧାନମନ୍ତ୍ରୀଙ୍କ ଦ୍ୱାରା ଶୁଭାରମ୍ଭ ହୋଇଥିବା “ଡାଲିରେ ଆତ୍ମନିର୍ଭରତା ପାଇଁ ମିଶନ” ଦେଶରେ ଡାଲି ଉତ୍ପାଦନ ବୃଦ୍ଧି, ଚାଷ କ୍ଷେତ୍ର ବିସ୍ତାର, କ୍ରୟ, ସଂରକ୍ଷଣ ଓ ପ୍ରକ୍ରିୟାକରଣ ସୁଦୃଢ଼ କରିବା ଉପରେ ଗୁରୁତ୍ୱ ଦେବ।
ୱେବକାଷ୍ଟ ସମାପ୍ତି ପରେ, ମହିଳା କୃଷକମାନଙ୍କ ପାଇଁ ବିଶେଷ ଆଲୋଚନା ସଭା ମଧ୍ୟ ଆୟୋଜିତ ହୋଇଥିଲା, ଯେଉଁଠାରେ ପିଏମ- ଡିଡିକେୱାଇ ଯୋଜନାର ପ୍ରଭାବ, ରବି ଫସଲର ଉନ୍ନତ ଚାଷ ଅଭ୍ୟାସ, ପ୍ରାକୃତିକ କୃଷି, ଜାତୀୟ କୀଟପତଙ୍ଗ ନିରୀକ୍ଷଣ ପ୍ରଣାଳୀ (ଏନପିଏସଏସ), କୃଷକ ଅଭିଯୋଗ ସମାଧାନ ପୋର୍ଟାଲ ଏବଂ ଜିଏସଟି ହ୍ରାସ ଲାଭ ବିଷୟରେ ସଚେତନତା ଆଲୋଚନା ହୋଇଥିଲା।
ଶେଷରେ ଧନ୍ୟବାଦ ଅର୍ପଣ ସହିତ କାର୍ଯ୍ୟକ୍ରମ ଶେଷ ହୋଇଥିଲା। ସମସ୍ତ ଅଂଶଗ୍ରହଣକାରୀ ମାନ୍ୟବର ପ୍ରଧାନମନ୍ତ୍ରୀଙ୍କୁ ଭାରତୀୟ ଲକୃଷିକୁ ଆଧୁନିକ ଓ ସୁସ୍ଥାୟୀ ଦିଗକୁ ନେବା ଲକ୍ଷ୍ୟରେ ଏପରି ଐତିହାସିକ ପଦକ୍ଷେପ ଗ୍ରହଣ ପାଇଁ କୃତଜ୍ଞତା ଜଣାଇଥିଲେ।
