ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗୋଳନ୍ଥରା ଥାନା ଅର୍ନ୍ତଗତ ହଳଦିଆପଦର ଗ୍ରାମର ରିତେଶ ପଟ୍ଟନାୟକ ନାମକ ଜଣେ ଯୁବକକୁ ବଡ଼ବଜାର ଥାନା ପୋଲିସ୍ ଗିରଫ କରି କୋର୍ଟ ଚାଲାଣ କରିଛି।
ସୁଚନା ଅନୁଯାୟୀ ଜଣାପଡିଛି ଯେ, ବଡ଼ବଜାର ଥାନା ଅଞ୍ଚଳର ଜନୈକା ନାବାଳିକାକୁ ଅଭିଯୁକ୍ତ ଯୁବକ ଇନିଷ୍ଟାଗ୍ରାମ୍ ସମ୍ପର୍କରେ ଆସି ପରବର୍ତ୍ତୀ ସମୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ଏହିଭଳି ପରିସ୍ଥିତିରେ ଯୁବକ ଜଣକ ନାବାଳିକା କୁ ବିଭିନ୍ନ ପ୍ରଲୋଭନ ଦେଖାଇ ରେଶମ ନଗରୀ ବ୍ରହ୍ମପୁର ସହରର ଏକ ପାର୍କକୁ ବୁଲିବାକୁ ନେଇ ଥିଲା। କୌଣସି ଏକ ଲଜ୍ ରେ ରଖି ଶାରୀରିକ ସମ୍ପର୍କ ରଖି ବିବାହର ପ୍ରସ୍ତାବ ଦେଇଥିଲା।
ପ୍ରଲୋଭନ ଓ ଶାରୀରିକ ସମ୍ପର୍କ ପରେ ନାବାଳିକା ଜଣକ ବିବାହ ଲୋଭରେ ନିଜ ଘରୁ ପ୍ରାୟ ଏକ ଲକ୍ଷ ଟଙ୍କା ଓ ୧୦ ଭରି ସ୍ବର୍ଣ୍ଣ ଅଳଙ୍କାର ଆଣି ରିତେଶ୍ କୁ ଦେଇଥିଲା। କିନ୍ତୁ ରିତେଶ ଉକ୍ତ ନଗଦ ଟଙ୍କା ସହ ନେଇଥିବା ସ୍ବର୍ଣ୍ଣ ଅଳଙ୍କାରକୁ ଗୋଟିଏ ବ୍ୟାଙ୍କରେ ବନ୍ଧା ପକାଇ କିଛି ଲକ୍ଷ ଟଙ୍କା ଉଠାଇ ଆଣି ଆଉ ଧରାଛୁଆଁ ଦେଇନଥିଲା। ଓଲଟି ଶାରୀରିକ ସମ୍ପର୍କ ରଖିଥିବା ଭିଡିଓ ପ୍ରଘଟ କରିବାର ଧମକ ଦେଇଥିଲା।
ପରିଶେଷରେ ନାବାଳିକା ଜଣକ ପ୍ରତାରଣାର ଶିକାର ହୋଇ ବଡ଼ବଜାର ଥାନାରେ ଅଭିଯୋଗ କରିଥିଲେ ଓ ପୋଲିସ ଅଭିଯୋଗ ଗ୍ରହଣ କରି ମାମଲା ରୁଜୁ କରି ଘଟଣାର ଅନୁଧ୍ୟାନ ପରେ ଅଭିଯୁକ୍ତ ଯୁବକକୁ କୋର୍ଟ ଚାଲାଣ କରିଛି।