ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର ଲିଗ୍ ଏକ ନୂତନ ଯୁଗରେ ପ୍ରବେଶ କରିବାକୁ ଯାଉଛି। ଗତ କିଛି ମାସ ଧରି ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ବିକ୍ରି କରିବାର ଖବର ଫ୍ରାଞ୍ଚାଇଜ୍ କ୍ରିକେଟରେ ଏକ ଚାଞ୍ଚଲ୍ୟ ସୃଷ୍ଟି କରିଛି। ଏବେ, ଏକ ସାମ୍ପ୍ରତିକ ରିପୋର୍ଟ ପ୍ରକାଶ ପାଇଛି ଯେ, କେବଳ RCB ନୁହେଁ ବରଂ ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜ୍ ମଧ୍ୟ ଖୁବ୍ ଶୀଘ୍ର ଏକ ନୂତନ ମାଲିକ ପାଇପାରେ।
ପ୍ରକୃତରେ ଭାରତୀୟ ବ୍ୟବସାୟୀ ହର୍ଷ ଗୋଏଙ୍କାଙ୍କ ଏକ ନୂତନ ସୋସିଆଲ ମିଡିଆ ପୋଷ୍ଟ ହଇଚଇ ସୃଷ୍ଟି କରିଛି। X ରେ ପୋଷ୍ଟ କରି ସେ ଲେଖିଛନ୍ତି ଯେ, “ମୁଁ ଶୁଣିଲି ଯେ ଗୋଟିଏ ନୁହେଁ, ଦୁଇଟି IPL ଦଳ ବିକ୍ରୟ ପାଇଁ ପ୍ରସ୍ତୁତ, ସେମାନେ ହେଲେ RCB ଏବଂ RR। ଏହା ସ୍ପଷ୍ଟ ଭାବରେ ଦର୍ଶାଉଛି ଯେ, ଆଜି ଲୋକମାନେ ବର୍ଦ୍ଧିତ ବ୍ରାଣ୍ଡ ମୂଲ୍ୟରୁ ଲାଭ ପାଇବାକୁ ଚାହୁଁଛନ୍ତି। ଦୁଇଟି ଦଳ ବିକ୍ରୟ ପାଇଁ ପ୍ରସ୍ତୁତ, ଏବଂ ଚାରି କିମ୍ବା ପାଞ୍ଚ ଜଣ ସମ୍ଭାବ୍ୟ କ୍ରେତା ଥାଇପାରନ୍ତି। ତେବେ ଏହି ଦଳଗୁଡ଼ିକୁ କିଏ କିଣିବ? ପୁଣେ, ଅହମ୍ମଦାବାଦ, ମୁମ୍ବାଇ, ବେଙ୍ଗାଲୁରୁ, କିମ୍ବା ଆମେରିକାରୁ କେହି ଜଣେ ହେବେ କି?”
RCB ମାଲିକ ପୂର୍ବରୁ ନିଶ୍ଚିତ କରିସାରିଛନ୍ତି ଯେ, ସେ ଦଳକୁ ବିକ୍ରୟ କରିବାକୁ ଯାଉଛନ୍ତି। ଅନ୍ୟପକ୍ଷରେ, RR ଫ୍ରାଞ୍ଚାଇଜ୍ ଏପର୍ଯ୍ୟନ୍ତ ଦଳକୁ ବିକ୍ରୟ କରିବାର ଉଦ୍ଦେଶ୍ୟ ଘୋଷଣା କରିନାହିଁ। ତଥାପି, ଏହା ନିଶ୍ଚିତ ଭାବରେ ଗୁଜବକୁ ଆଗକୁ ବଢାଉଛି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିକ୍ରୟ ପ୍ରକ୍ରିୟା ଆରମ୍ଭ କରିସାରିଛି, କିନ୍ତୁ ରାଜସ୍ଥାନ ରୟାଲ୍ସ ସମ୍ପର୍କରେ ପରିସ୍ଥିତି ଅସ୍ପଷ୍ଟ ରହିଛି।
ରାଜସ୍ଥାନ ରୟାଲ୍ସ ଦଳ ବର୍ତ୍ତମାନ ରୟାଲ ମଲ୍ଟି ସ୍ପୋର୍ଟସ୍ ପ୍ରାଇଭେଟ୍ ଲିମିଟେଡ୍ ମାଲିକାନାରେ ଅଛି। ମନୋଜ ବଡାଲେ ଆମେରିକୀୟ ନିବେଶ ସଂସ୍ଥା ରେଡବର୍ଡ କ୍ୟାପିଟାଲ ପାର୍ଟନର୍ସ ଦ୍ୱାରା ସମର୍ଥିତ RR ଫ୍ରାଞ୍ଚାଇଜ୍ରେ ଅଧିକାଂଶ ଅଂଶଧନ ରଖିଛନ୍ତି। ବିକ୍ରୟ ସମ୍ପର୍କରେ ରାଜସ୍ଥାନ ରୟାଲ୍ସ ପରିଚାଳନା ପକ୍ଷରୁ ଏପର୍ଯ୍ୟନ୍ତ କୌଣସି ବିବୃତ୍ତି ଦିଆଯାଇ ନାହିଁ।
IPL-୨୦୨୬ ପୂର୍ବରୁ ରାଜସ୍ଥାନ ରୟାଲ୍ସ ସେମାନଙ୍କ ଦଳରେ ଅନେକ ବଡ଼ ପରିବର୍ତ୍ତନ କରିଛି। ରାହୁଲ ଦ୍ରାବିଡ ଆଉ RR ଦଳର ପ୍ରଶିକ୍ଷକ ହେବେ ନାହିଁ; କୁମାର ସାଙ୍ଗାକାରା ୨୦୨୬ ସିଜିନ୍ ପାଇଁ ଏହି ଦାୟିତ୍ୱ ଗ୍ରହଣ କରିବେ। ଦଳ ପୂର୍ବତନ ଅଧିନାୟକ ସଞ୍ଜୁ ସାମସନଙ୍କୁ ମଧ୍ୟ ରବିନ୍ଦ୍ର ଜାଡେଜା ଏବଂ ସାମ କରନଙ୍କ ସ୍ଥାନରେ CSKକୁ ଟ୍ରେଡ କରିଛି। ନିଲାମ ପୂର୍ବରୁ ରାଜସ୍ଥାନ ରୟାଲ୍ସ ମୋଟ ୧୬ ଜଣ ଖେଳାଳିଙ୍କୁ ପାଖରେ ରଖିଛି।
