ବ୍ରହ୍ମପୁର: କରୁଣାଶାନ୍ତି ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଉତ୍କଳମଣି ଗୋପବନ୍ଧୁ ଦାସଙ୍କ ଜନ୍ମ ଜୟନ୍ତୀ ପାଳନ କରାଯାଇଛି। ବ୍ରହ୍ମପୁର ସ୍ଥିତ ସ୍ୱେଚ୍ଛାସେବୀ ସଂଗଠନ ସଲିଡାରିଟି ଫର୍ ଡେଭଲପିଂ କମ୍ୟୁନିଟିଜ୍ (Solidarity) ର ସହଯୋଗରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା ଛାତ୍ରଛାତ୍ରୀ ଓ ଶିକ୍ଷକମାନଙ୍କ ମଧ୍ୟରେ ଉତ୍କଳମଣିଙ୍କ ନିଃସ୍ୱାର୍ଥ ସେବା, ଦୂରଦୃଷ୍ଟି ଏବଂ ସମାଜ ଓ ଦେଶ ପ୍ରତି ତାଙ୍କର ଅତୁଳନୀୟ ଅବଦାନ ବିଷୟରେ ସଚେତନତା ସୃଷ୍ଟି କରିବା।ଏହି ଅବସରରେ ମାନ୍ୟବର ଅଧ୍ୟକ୍ଷ ତାଙ୍କ ଅଭିଭାଷଣରେ ଗୋପବନ୍ଧୁ ଦାସଙ୍କ ଶିକ୍ଷା, ସମାଜ ସଂସ୍କାର ଓ ମାନବ ସେବା ପାଇଁ ସାରା ଜୀବନର ସମର୍ପଣ ବିଷୟରେ ଆଲୋକପାତ କରିଥିଲେ।
ଯୁବପିଢ଼ି ଉତ୍କଳମଣିଙ୍କ ସତ୍ୟନିଷ୍ଠା, କରୁଣା, ତ୍ୟାଗ ଏବଂ ଦେଶପ୍ରେମର ମୂଲ୍ୟବୋଧକୁ ନିଜ ଜୀବନରେ ଆପଣାଇବା ଉଚିତ୍ ବୋଲି ସେ ଆହ୍ୱାନ ଦେଇଥିଲେ।କାର୍ଯ୍ୟକ୍ରମର ଏକ ବିଶେଷ ଅଂଶ ଭାବେ ଗୋପବନ୍ଧୁ ଦାସଙ୍କ ଜୀବନୀ ଉପରେ ଆଧାରିତ ଏକ ଡକ୍ୟୁମେଣ୍ଟାରୀ ପ୍ରଦର୍ଶନ କରାଯାଇଥିଲା, ଯାହା ମାଧ୍ୟମରେ ଛାତ୍ରଛାତ୍ରୀମାନେ ତାଙ୍କ ଜୀବନର ମହତ୍ତ୍ୱ ଓ ସମାଜ ପ୍ରତି ତାଙ୍କର ଉତ୍ସର୍ଗୀକୃତ ଜୀବନ ବିଷୟରେ ଜାଣିବାର ସୁଯୋଗ ପାଇଥିଲେ।ଏହି କାର୍ଯ୍ୟକ୍ରମରେ ବାଳକ ଓ ବାଳିକା ଉଭୟ ଶାଖାର ଯୁକ୍ତ ଦୁଇ ପ୍ରଥମ ବର୍ଷ ଓ ଦ୍ୱିତୀୟ ବର୍ଷର ଛାତ୍ରଛାତ୍ରୀ ଏବଂ ସମସ୍ତ ଶିକ୍ଷକ ଶିକ୍ଷୟିତ୍ରୀ ଉତ୍ସାହର ସହ ଅଂଶଗ୍ରହଣ କରିଥିଲେ।ଓଡ଼ିଶାର ମହାନ୍ ପୁରୁଷଙ୍କ ଆଦର୍ଶରେ ଅନୁପ୍ରାଣିତ ହେବା ପାଇଁ ଛାତ୍ରଛାତ୍ରୀମାନଙ୍କୁ ପ୍ରେରଣା ଦେଇ ଏହି ସ୍ମରଣୋତ୍ସବ ସଫଳତାର ସହ ସମାପ୍ତ ହୋଇଥିଲା।