ନୂଆଦିଲ୍ଲୀ: ଦିଲ୍ଲୀ ବିଧାନସଭାକୁ ଲଗାତାର ତୃତୀୟ ଦିନ ପାଇଁ ବୋମା ଧମକ ମିଳିଛି ଏବଂ ପୋଲିସ କମିଶନରଙ୍କୁ ଏହା ଅବଗତ କରାଯାଇଛି। ବିଧାନସଭା ବାଚସ୍ପତି ବିଜେନ୍ଦର ଗୁପ୍ତା ଗୃହରେ ଏହା କହିଛନ୍ତି। ବାଚସ୍ପତି ଗୁପ୍ତା କହିଛନ୍ତି ଯେ, ବିଧାନସଭାକୁ ବୋମା ଧମକ ଦିଆଯାଇଥିବା ଇମେଲର ତଦନ୍ତ ପାଇଁ ପୋଲିସ ଅଧିକାରୀମାନେ ଆଜି ବିଧାନସଭାରେ ପହଞ୍ଚିଥିଲେ। ଏହି ଇମେଲଗୁଡ଼ିକ ମାର୍ଚ୍ଚ ୨୪ ରୁ ୨୬ ତାରିଖ ମଧ୍ୟରେ ପ୍ରାପ୍ତ ହୋଇଥିଲା।
ବାଚସ୍ପତି କହିଛନ୍ତି ଯେ, ତଦନ୍ତରେ ବିଳମ୍ବ ନକରିବାକୁ ପୋଲିସକୁ ଅନୁରୋଧ କରାଯାଇଛି। ଏହି ସମସ୍ୟା ଗମ୍ଭୀର ବୋଲି ପୋଲିସ କହିଛି। ବାଚସ୍ପତି କହିଛନ୍ତି ଯେ, ବିଭିନ୍ନ ସଂଗଠନ ଦ୍ୱାରା ତାଙ୍କୁ ବ୍ୟକ୍ତିଗତ ଭାବରେ କିଛି ଇମେଲ୍ ପଠାଯାଇଛି। ସେ କହିଛନ୍ତି ଯେ, ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆଶ୍ୱାସନା ଦେଇଛି ଏବଂ ସୁରକ୍ଷାକୁ ସୁଦୃଢ଼ କରିଛି।
ବିଧାନସଭା ସଚିବାଳୟକୁ ସିସି ଟିଭି କ୍ୟାମେରା ଏବଂ ରେକର୍ଡ ରଖିବା ପାଇଁ କମ୍ପ୍ୟୁଟରାଇଜଡ୍ ଏଣ୍ଟ୍ରି ସିଷ୍ଟମ ମାଧ୍ୟମରେ ପର୍ଯ୍ୟାପ୍ତ ନଜର ରଖିବା ପାଇଁ ନିର୍ଦ୍ଦେଶ ଦିଆଯାଇଛି।