ଭୁବନେଶ୍ବର: ଭୁବନେଶ୍ବର ମେୟର ସୁଲୋଚନା ଦାସ ହେଉଛନ୍ତି ବିଜେଡି, ଆଉ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ହେଉଛନ୍ତି ବିଜେପି। ହେଲେ ଏକ ସଭାରେ ସାଂସଦ ଅପରାଜିତା ମେୟର ସୁଲୋଚନାଙ୍କୁ ଯାହା କହିଲେ ତାହା ଶୁଣି ସମସ୍ତେ ଆଶ୍ଚର୍ଯ୍ୟ। ଅବଶ୍ୟ କଥାଟିକୁ ହସି ହସି କେହି ଗୁରୁତ୍ବ ଦେଲେ ନାହିଁ। ହେଲେ ରାଜ୍ୟ ରାଜନୀତିରେ ତାହା ବେଶ ଆଲୋଚନାର ବିଷୟ ପାଲଟିଛି। କାରଣ ଏହି ସଭାରେ ସାଂସଦ ଅପରାଜିତା ଭାଷଣ ଦେଉ ଦେଉ କହିଦେଲେ ଯେ ମେୟର ସୁଲୋଚନା ଦାସ ବାରମ୍ବାର ମେୟର ହୁଅନ୍ତୁ ମୁଁ ସମର୍ଥନ କରିବି।
ଏପରି କହିବା ପରେ ଖୋଦ ସାଂସଦ ଓ ମେୟର ସମେତ ସମସ୍ତେ ହସିଦେଲେ। ହେଲେ କଥାଟିକୁ ପରେ ସମସ୍ତେ ବେଶ ଗୁରୁତର ସହ ନେଲେ। ପ୍ରଶ୍ନ ଉଠିଲା ଯେ, ମେୟର ସୁଲୋଚନା ଦାସ କଣ ବିଜେପି କୁ ଯିବେ କି। କାରଣ ସେ ଯଦି ବିଜେପିରୁ ପ୍ରାର୍ଥୀ ହେବେ ତେବେ ଯାଇ ବିଜେପି ସାଂସଦ ଅପରାଜିତା ସମର୍ଥନ କରିବେ। ସୁଲୋଚନା ବିଜେଡିରୁ ପୁଣି ପ୍ରାର୍ଥୀ ହେଲେ ଅପରାଜିତା କେବେ ବି ତାଙ୍କୁ ସମର୍ଥନ କରିପାରିବେ ନାହିଁ। ସେହି ସଭାରେ ଏକାମ୍ର ବିଧାୟକ ବାବୁ ସିଂ ମଧ୍ୟ ଉପସ୍ଥିତ ଥିଲେ। ସେ କଥାଟିକୁ ହସ ହସରେ ନେଇଥିଲେ ମଧ୍ୟ ତାହାକୁ ଗମ୍ଭିରତାର ସହ ନେଇ ଥିବାର ଜଣାପଡିଛି।
ଅବସର ଥିଲା ଏକାମ୍ର ନିର୍ବାଚନ ମଣ୍ଡଳିର ମେଘେଶ୍ବର କଲୋନୀରେ ଏକ କମ୍ୟୁନିଟି ସେଣ୍ଟର ଉଦଘାଟନ। ଏହି ସଭାରେ ଖୋଦ ସାଂସଦଙ୍କ ସହିତ ମେୟର, ବିଧାୟକ ବାବୁ ସିଂ, ଚାରିଜଣ କର୍ରପୋରେଟର ସହ ବହୁ ନେତା ଉପସ୍ଥିତ ଥିଲେ।