ଇରାନ ଉପରେ ସମ୍ଭାବ୍ୟ ଆମେରିକୀୟ ଆକ୍ରମଣକୁ ନେଇ ଉତ୍ତେଜନା ମଧ୍ୟରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ ଇରାନ ବିରୋଧରେ ଆଜି ରାତିରେ ଯୋଜନା କରାଯାଇଥିବା ସାମରିକ ଆକ୍ରମଣ ଓ ବୋମାବର୍ଷଣକୁ ସେ ବାତିଲ କରିଦେଇଛନ୍ତି। ଟ୍ରମ୍ପଙ୍କ ଅନୁସାରେ, ଇରାନ ସହ ଚାଲିଥିବା ଆଲୋଚନା ଇରାନର ସର୍ବୋଚ୍ଚ ନେତୃତ୍ୱ ସ୍ତରକୁ ପହଞ୍ଚିଛି ଏବଂ ତାହାକୁ ଅନୁମୋଦନ ମିଳିଛି । ଏନେଇ ସେ ସୋସିଆଲ ମିଡିଆରେ ମଧ୍ୟ ପୋଷ୍ଟ କରିଛନ୍ତି ।
ଟ୍ରମ୍ପ ତାଙ୍କର ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଏହି ବିବୃତ୍ତି ଜାରି କରିଛନ୍ତି, “ଇରାନ ସହିତ ଆଲୋଚନା ଏକ ଉଚ୍ଚ ସ୍ତରରେ ପହଞ୍ଚିଛି” । ପୂର୍ବରୁ, ସେ ଇରାନ ଉପରେ ଆକ୍ରମଣ କରିବା ବିଷୟରେ କଥା ହୋଇଥିଲେ।
ଟ୍ରମ୍ପଙ୍କ କହିବା ଅନୁସାରେ, ଆଲୋଚନାର ମୁଖ୍ୟ ବିଷୟଗୁଡ଼ିକୁ ଆମେରିକା, ଇସ୍ରାଏଲ, ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ, କତାର, ତୁର୍କୀ, ପାକିସ୍ତାନ, ବାହାରିନ, କୁଏତ, ଜୋର୍ଡାନ ଏବଂ ଇଜିପ୍ଟ ସହିତ ଅନେକ ଦେଶ ଅନୁମୋଦନ କରିଛନ୍ତି। ତେବେ ଚୁକ୍ତି ଚୂଡ଼ାନ୍ତ ହେବା ପର୍ଯ୍ୟନ୍ତ ନୌସେନା ଅବରୋଧ (Naval Blockade) ଜାରି ରହିବ ବୋଲି ସେ କହିଛନ୍ତି।
ଏହାର କିଛି ଘଣ୍ଟା ପୂର୍ବରୁ ଟ୍ରମ୍ପ ଇରାନ ବିରୋଧରେ କଠୋର ମନୋଭାବ ଦେଖାଇଥିଲେ ଏବଂ ବଡ଼ ଧରଣର ଆକ୍ରମଣର ସତର୍କବାଣୀ ଦେଇଥିଲେ। ସେ ଇରାନର ତୈଳ ରପ୍ତାନି କେନ୍ଦ୍ର ଖାର୍ଗ ଦ୍ୱୀପ ଏବଂ ଅନ୍ୟାନ୍ୟ ତୈଳ-ସମ୍ବନ୍ଧୀୟ ଭିତ୍ତିଭୂମିକୁ କବଜା କରିବା ଏବଂ ସେମାନଙ୍କର ତୈଳ ଏବଂ ଗ୍ୟାସ ବଜାରର ସମ୍ପୂର୍ଣ୍ଣ ନିୟନ୍ତ୍ରଣ ଆଦି ବିଷୟରେ ନିଷ୍ପତ୍ତି ନେବେ ବୋଲି କହିଛନ୍ତି । ଯେମିତିକି ଭେନେଜୁଏଲା କ୍ଷେତ୍ରରେ ହୋଇଛି, ଯାହା ଭେନେଜୁଏଲା ଏବଂ ଆମେରିକା ଉଭୟ ପାଇଁ ବହୁତ ଲାଭଦାୟକ ପ୍ରମାଣିତ ହେଉଛି।