ଭୁବନେଶ୍ୱର: ସାଇବର ଅପରାଧୀଙ୍କ ପାଇଁ ଆଉ ସହଜ ହେବନି ଠକେଇ କରି ଖସିଯିବା! ଅନଲାଇନ୍ ଠକେଇଠାରୁ ଆରମ୍ଭ କରି ବ୍ୟାଙ୍କ ଆକାଉଣ୍ଟରୁ ଟଙ୍କା ଲୁଟ୍, ମହିଳା ଓ ଶିଶୁଙ୍କ ବିରୋଧରେ ସାଇବର ଅପରାଧ ପର୍ଯ୍ୟନ୍ତ ସବୁକିଛି ଉପରେ ରହିବ କଡ଼ା ନଜର। ରାଜ୍ୟରେ ବଢ଼ୁଥିବା ସାଇବର ଅପରାଧ ଓ ଆର୍ଥିକ ଠକେଇକୁ ରୋକିବା ପାଇଁ ମୋହନ ମାଝୀ ସରକାର ନେଇଛନ୍ତି ଏକ ବଡ଼ ପଦକ୍ଷେପ। ଏଥିପାଇଁ ଗଠନ ହେବ ‘ଓଡ଼ିଶା ସାଇବର କମାଣ୍ଡ ସେଣ୍ଟର’। ଏହି ଅତ୍ୟାଧୁନିକ ବ୍ୟବସ୍ଥା ପାଇଁ ମୁଖ୍ୟମନ୍ତ୍ରୀ ୨୪୯.୩୯ କୋଟି ଟଙ୍କା ମଞ୍ଜୁର କରିଛନ୍ତି।
ସାଇବର ଅପରାଧର ନୂଆ ନୂଆ କୌଶଳ ଅପରାଧୀମାନେ ଆପଣାଉଥିବା ବେଳେ ପୁଲିସ ପାଇଁ ଏହାର ମୁକାବିଲା ଏକ ବଡ଼ ଆହ୍ୱାନ ପାଲଟିଛି। ଅନଲାଇନ୍ ଠକେଇ, ଡିଜିଟାଲ୍ ଆର୍ଥିକ ଅପରାଧ, ତଥ୍ୟ ଚୋରି ଏବଂ ସୋସିଆଲ ମିଡିଆରେ ମହିଳା ଓ ଶିଶୁଙ୍କୁ ଟାର୍ଗେଟ୍ କରି ହେଉଥିବା ଅପରାଧ ଦିନକୁ ଦିନ ଚିନ୍ତା ବଢ଼ାଉଛି। ଏଭଳି ସ୍ଥିତିରେ ସାଇବର ଅପରାଧକୁ ଚିହ୍ନଟ, ନିୟନ୍ତ୍ରଣ ଓ ତଦନ୍ତ ପାଇଁ ଏକ ସ୍ୱତନ୍ତ୍ର ବିଶେଷଜ୍ଞ ସଂସ୍ଥା ଭାବେ କାର୍ଯ୍ୟ କରିବ ଏହି କମାଣ୍ଡ ସେଣ୍ଟର।
୪ଟି ଶାଖାରେ ଚାଲିବ ସାଇବର ଅପରାଧ ବିରୋଧୀ ଲଢ଼େଇ
ଓଡ଼ିଶା ସାଇବର କମାଣ୍ଡ ସେଣ୍ଟରରେ ୪ଟି ପ୍ରମୁଖ ଶାଖା କାର୍ଯ୍ୟ କରିବ। ଏଥିମଧ୍ୟରେ ରହିଛି ସାଇବର କ୍ରାଇମ୍ ହେଡକ୍ୱାର୍ଟର୍ସ, ଷ୍ଟେଟ୍ ସାଇବର କ୍ରାଇମ୍ ପୁଲିସ ଷ୍ଟେସନ, ସାଇବର ରିସୋର୍ସ ସେଣ୍ଟର ଏବଂ ଏଆଇ ପ୍ରେଡିକ୍ଟିଭ୍ ପୁଲିସିଂ ଆଣ୍ଡ ଡାଟା ଆନାଲିଟିକ୍ସ ସେଣ୍ଟର। ସାଇବର କ୍ରାଇମ୍ ହେଡକ୍ୱାର୍ଟର୍ସ ରାଜ୍ୟରେ ସାଇବର ଅପରାଧ ନିୟନ୍ତ୍ରଣ ଓ ତଦନ୍ତ କାର୍ଯ୍ୟର ସମନ୍ୱୟ ରକ୍ଷା କରିବ। ସେହିପରି ଷ୍ଟେଟ୍ ସାଇବର କ୍ରାଇମ୍ ପୁଲିସ ଷ୍ଟେସନ ସାଇବର ଅପରାଧ ସମ୍ପର୍କିତ ମାମଲାର ତଦନ୍ତ ଓ ଆଇନଗତ କାର୍ଯ୍ୟାନୁଷ୍ଠାନ ଦାୟିତ୍ୱ ତୁଲାଇବ। ଅନ୍ୟପକ୍ଷରେ, ସାଇବର ରିସୋର୍ସ ସେଣ୍ଟର ଏହି ଅପରାଧର ମୁକାବିଲା ପାଇଁ ଆବଶ୍ୟକ ବିଶେଷଜ୍ଞ ସହାୟତା ଓ ସମ୍ବଳ ଯୋଗାଇବ। ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ଏଆଇ ପ୍ରେଡିକ୍ଟିଭ୍ ପୁଲିସିଂ ଆଣ୍ଡ ଡାଟା ଆନାଲିଟିକ୍ସ ସେଣ୍ଟର। ଏହା ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଓ ଡାଟା ଆନାଲିଟିକ୍ସର ସହାୟତାରେ ସାଇବର ଅପରାଧର ଧାରା, ଅପରାଧୀଙ୍କ କାର୍ଯ୍ୟଶୈଳୀ ଏବଂ ସମ୍ଭାବ୍ୟ ବିପଦକୁ ବିଶ୍ଳେଷଣ କରିବ। ଏହାଦ୍ୱାରା ସାଇବର ଅପରାଧର ଆଗୁଆ ଚିହ୍ନଟ ଓ ନିୟନ୍ତ୍ରଣ ଦିଗରେ ପୁଲିସକୁ ସହାୟତା ମିଳିପାରିବ।
AI ଟେକ୍ନୋଲୋଜିରେ ଅପରାଧୀଙ୍କୁ ଧରିବାକୁ ଯୋଜନା
ଏହି ପ୍ରକଳ୍ପର ସବୁଠାରୁ ଆକର୍ଷଣୀୟ ଦିଗ ହେଉଛି ଏଆଇ ପ୍ରେଡିକ୍ଟିଭ୍ ପୁଲିସିଂ ଓ ଡାଟା ଆନାଲିଟିକ୍ସର ବ୍ୟବହାର। ଆଧୁନିକ ଟେକ୍ନୋଲୋଜିର ସହାୟତାରେ ସାଇବର ଅପରାଧର ଢାଞ୍ଚାକୁ ବିଶ୍ଳେଷଣ କରିବା ସହ ସମ୍ଭାବ୍ୟ ବିପଦକୁ ଆଗୁଆ ଚିହ୍ନଟ କରିବା ଏହାର ଲକ୍ଷ୍ୟ। ଫଳରେ ସାଇବର ଅପରାଧ ଘଟିବା ପରେ ତଦନ୍ତ କରିବା ସହ ଅପରାଧ ରୋକିବା ଦିଗରେ ମଧ୍ୟ ପୁଲିସକୁ ସହାୟତା ମିଳିପାରିବ।
ମୋଟାମୋଟି ଭାବେ, ୨୪୯.୩୯ କୋଟି ଟଙ୍କାର ଏହି ପ୍ରକଳ୍ପ ଓଡ଼ିଶାର ସାଇବର ସୁରକ୍ଷା ବ୍ୟବସ୍ଥାକୁ ନୂଆ ଦିଗ ଦେବାର ଆଶା ସୃଷ୍ଟି କରିଛି। ବିଶେଷକରି ଡିଜିଟାଲ୍ ଠକେଇର ଶିକାର ହେଉଥିବା ସାଧାରଣ ଲୋକ, ମହିଳା ଓ ଶିଶୁଙ୍କ ସୁରକ୍ଷା କ୍ଷେତ୍ରରେ ଏହା କେତେ ପ୍ରଭାବଶାଳୀ ହେବ, ତାହା ଆଗାମୀ ଦିନରେ ଦେଖିବାକୁ ମିଳିବ।


