ଭୁବନେଶ୍ୱର: ୟୁନିଭର୍ସାଲ ଡ୍ରଗ୍ ସସେପ୍ଟିବିଲିଟି ଟେଷ୍ଟିଂ (ୟୁଡିଏସ୍ଟି) କୁ ସୁଦୃଢ଼ କରିବା, ଡ୍ରଗ୍ ରେଜିଷ୍ଟାଣ୍ଟ୍ ଟିବି ର ପ୍ରାରମ୍ଭିକ ଚିହ୍ନଟରେ ଉନ୍ନତି ଆଣିବା, ଏବଂ ମଲିକୁଲାର ଡାଇଗ୍ନୋଷ୍ଟିକ୍ସ, ଜିନୋଟାଇପିକ୍ ପରୀକ୍ଷା, ଲକ୍ଷ୍ୟଭେଦୀ ପରବର୍ତ୍ତୀ ପିଢ଼ିର ଅନୁକ୍ରମଣ (ଟିଏନ୍ଜିଏସ), ଡିଜିଟାଲ୍ ସ୍ୱାସ୍ଥ୍ୟ ବ୍ୟବସ୍ଥା, କୃତ୍ରିମ ବୁଦ୍ଧିମତ୍ତା (ଏଆଇ) ଏବଂ ରିୟଲ୍ ଟାଇମ୍ ମନିଟରିଂରେ ନବସୃଜନର ଉପଯୋଗ, ଭାରତରେ ଟିବି ନିରାରକଣ ଅଭିଯାନକୁ ତ୍ବରାନ୍ବିତ କରିବା ନେଇ ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି। ଏମ୍ସ ଭୁବନେଶ୍ବର ଏବଂ ପଲିସି ରେଜିଲିଏନ୍ସ ଫାଉଣ୍ଡେସନ୍ (ପିଆର୍ଏଫ୍) ସହଯୋଗରେ ଏଠାରେ ଆୟୋଜିତ ଦୁଇଦିନିଆ ଜାତୀୟ କନକ୍ଲେଭ୍ ଏବଂ ଯକ୍ଷ୍ମା ଉପରେ ନୀତି ନିର୍ଦ୍ଧାରଣ ଆଲୋଚନାରେ ଅଂଶଗ୍ରହଣ କରି ଯକ୍ଷ୍ମା ବିଶେଷଜ୍ଞମାନେ ଏପରି ମତ ରଖିଛନ୍ତି।
ଆଜିର ଉଦ୍ଘାଟନ ସମ୍ମିଳନୀରେ ଜାତୀୟ ଯକ୍ଷ୍ମା-ମୁକ୍ତ ଭାରତ ମିଶନରେ ଅବଦାନ ରଖିବା ସହିତ ଓଡ଼ିଶାରେ ଯକ୍ଷ୍ମା ନିବାରଣ, ଚିହ୍ନଟ, ଚିକିତ୍ସା ଏବଂ କାର୍ଯ୍ୟକ୍ରମ କାର୍ଯ୍ୟାନ୍ୱୟନକୁ ସୁଦୃଢ଼ କରିବା ପାଇଁ କାର୍ଯ୍ୟକ୍ଷମ ରଣନୀତି ଉପରେ ବିଚାରବିମର୍ଶ କରିବା ପାଇଁ ନୀତି ନିର୍ଦ୍ଧାରକ, ବୈଜ୍ଞାନିକ, ଚିକିତ୍ସକ, କାର୍ଯ୍ୟକ୍ରମ ଅଧିକାରୀ, ଗବେଷକ, ବିକାଶ ଅଂଶୀଦାର ଏବଂ ଜନସ୍ୱାସ୍ଥ୍ୟ ନିଷ୍ପତ୍ତିକାରମାନେ ଏକତ୍ରିତ ହୋଇଥିଲେ।
ଏହି ଅବସରରେ ଜାତୀୟ ଚିକିତ୍ସା ବିଜ୍ଞାନ ଏକାଡେମୀ (ନାମ୍ସ)ର ଅଧ୍ୟକ୍ଷ ଏବଂ ଖ୍ୟାତାନାମା ପଲ୍ମୋନୋଲୋଜିଷ୍ଟ୍ ଡ. ଦିଗମ୍ବର ବେହେରା, ଯକ୍ଷ୍ମା ଏବଂ ଔଷଧ-ପ୍ରତିରୋଧୀ ଯକ୍ଷ୍ମା ରୋଗର ପ୍ରାରମ୍ଭିକ ଚିହ୍ନଟ ସହିତ ଜଡିତ ଆହ୍ବାନଗୁଡ଼ିକ ଉପରେ ଆଲୋକପାତ କରିଥିଲେ। ଭାରତରେ ବିଶ୍ବର ସର୍ବାଧିକ ଯକ୍ଷ୍ମା ରୋଗୀ ବସବାସ କରୁଛନ୍ତି। ମାତ୍ର, ଔଷଧ-ପ୍ରତିରୋଧୀ ଯକ୍ଷ୍ମାକୁ ସଠିକ୍ ଭାବରେ ଚିହ୍ନଟ କରିବା ଏବଂ ସବୁଠାରୁ ପ୍ରଭାବଶାଳୀ ଔଷଧ ବ୍ୟବସ୍ଥା ନିର୍ଣ୍ଣୟ କରିବା ବର୍ତ୍ତମାନ ମଧ୍ୟ ଏକ ଆହ୍ବାନଭରା ବିଷୟ ହୋଇ ରହିଛି। ଟିବି ରୋଗର ତ୍ବରିତ ଏବଂ ସଠିକ୍ ଚିହ୍ନଟ ପାଇଁ ବର୍ତ୍ତମାନ ପ୍ରଚଳିତ ପ୍ରଯୁକ୍ତିବିଦ୍ୟା ପ୍ରାୟତଃ ପର୍ଯ୍ୟାପ୍ତ ନୁହେଁ। ଚିକିତ୍ସା ଆରମ୍ଭ କରିବା ପୂର୍ବରୁ ଉନ୍ନତ ରୋଗ ନିର୍ଣ୍ଣୟ ପ୍ରଯୁକ୍ତିର ସଫଳ ପ୍ରୟୋଗ ଚିକିତ୍ସକମାନଙ୍କୁ ଉପଯୁକ୍ତ ଔଷଧ ପ୍ରଦାନ, ଚିକିତ୍ସା ଫଳାଫଳକୁ ଉନ୍ନତ କରିବା ଏବଂ ଯକ୍ଷ୍ମା ନିୟନ୍ତ୍ରଣ ପ୍ରୟାସକୁ ଉଲ୍ଲେଖନୀୟ ଭାବରେ ଦୃଢ଼ କରିବା ପାଇଁ ସକ୍ଷମ ହେବ ବୋଲି ଡ. ବେହେରା ପ୍ରକାଶ କରିଛନ୍ତି।
ସମାବେଶକୁ ସମ୍ବୋଧିତ କରି, ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଏବଂ ସିଇଓ ଡ. ଆଶୁତୋଷ ବିଶ୍ୱାସ ଯକ୍ଷ୍ମା ନିରାକରଣରେ ସହଯୋଗମୂଳକ ପ୍ରୟାସର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ। ଏମ୍ସ ଭୁବନେଶ୍ୱର ଗବେଷଣା, ନବସୃଜନ, ଦକ୍ଷତା ବିକାଶ, ଏବଂ ନୀତିଗତ ସମର୍ଥନ ମାଧ୍ୟମରେ ଟିବି ନିରାକରଣ ପ୍ରୟାସକୁ ସମର୍ଥନ କରିଆସୁଛି। ଏହି ସମ୍ମିଳନୀ ତୃଣମୂଳସ୍ତରରେ ଥିବା ଚ୍ୟାଲେଞ୍ଜଗୁଡ଼ିକୁ ଚିହ୍ନଟ କରିବା ଏବଂ ରୋଗ ନିର୍ଣ୍ଣୟ, ଚିକିତ୍ସା ପ୍ରଦାନ ଏବଂ ରୋଗୀ ଫଳାଫଳକୁ ସୁଦୃଢ଼ କରିବା ପାଇଁ ବ୍ୟବହାରିକ ସମାଧାନ ଅନୁସନ୍ଧାନ କରିବାରେ ସାହାଯ୍ୟ କରିବା ନେଇ ଡ. ବିଶ୍ୱାସ ମତବ୍ୟକ୍ତ କରିଛନ୍ତି।
ଏହି ସମ୍ମିଳନୀରେ ଓଡ଼ିଶାର ଉପାନ୍ତ ଅଞ୍ଚଳ, ଆଦିବାସୀ, ଦୁର୍ବଳ ଏବଂ କଷ୍ଟକର ସମ୍ପ୍ରଦାୟରେ ଯକ୍ଷ୍ମା ନିର୍ଣ୍ଣୟକୁ ପ୍ରଭାବିତ କରୁଥିବା କ୍ଷେତ୍ରସ୍ତରୀୟ ଚ୍ୟାଲେଞ୍ଜଗୁଡ଼ିକୁ ଚିହ୍ନଟ କରିବା ଉପରେ ବିଶେଷ ଆଲୋଚନା ହେବ। ରୋଗୀ ଚିହ୍ନଟ, ନମୁନା ସଂଗ୍ରହ, ପରୀକ୍ଷା, ରିପୋର୍ଟିଂ, ଚିକିତ୍ସା ଆରମ୍ଭ, ଅନୁସରଣ ଏବଂ ଫଳାଫଳ ମନିଟରିଂରେ ଥିବା ତ୍ରୁଟିଗୁଡ଼ିକ ସମ୍ପର୍କରେ ବ୍ୟାପକ ଆଲୋଚନା ହେବ।
ଏହି ସମ୍ମିଳନୀର ଉଦ୍ଦେଶ୍ୟ ବିଷୟରେ କହି, ପଲିସି ରେଜିଲିଏନ୍ସ ଫାଉଣ୍ଡେସନ୍ର ପ୍ରତିଷ୍ଠାତା ଶ୍ରୀ ନନ୍ଦୀଶ ଆର. ପିଠାନୀ କହିଛନ୍ତି ଯେ କାର୍ଯ୍ୟକ୍ରମ କାର୍ଯ୍ୟାନ୍ୱୟନକୁ ସୁଦୃଢ଼ କରିବା ଏବଂ ସ୍ୱାସ୍ଥ୍ୟ ଫଳାଫଳକୁ ଉନ୍ନତ କରିବା ପାଇଁ ଆଲୋଚନା ବିଶେଷ ଭାବରେ ରୋଗ ନିର୍ଣ୍ଣୟ ବିଳମ୍ବ, ନମୁନା ପରିବହନ, ରିପୋର୍ଟିଂ ବ୍ୟବସ୍ଥା, ଚିକିତ୍ସା ଆରମ୍ଭରେ ବିଳମ୍ବ ଏବଂ ରୋଗୀ ଅନୁସରଣ ଚ୍ୟାଲେଞ୍ଜଗୁଡ଼ିକୁ ସମାଧାନ କରିବ।
ଏହି ଦୁଇଦିନିଆ ସମ୍ମିଳନୀ ଯକ୍ଷ୍ମା ନିୟନ୍ତ୍ରଣରେ ଭାରତର ଗୁରୁତ୍ୱପୂର୍ଣ୍ଣ ଅଗ୍ରଗତି ଉପରେ ଆଲୋକପାତ ହେବ। ଉଦ୍ଘାଟନୀ ଅଧିବେଶନରେ ଉପସ୍ଥାପିତ ତଥ୍ୟ ଅନୁଯାୟୀ, ୨୦୧୫ ରୁ ୨୦୨୪ ମଧ୍ୟରେ ବାର୍ଷିକ ଯକ୍ଷ୍ମା ମାମଲା ୨୧ ପ୍ରତିଶତ ହ୍ରାସ ପାଇଛି, ଯେତେବେଳେ ସେହି ସମୟ ମଧ୍ୟରେ ଯକ୍ଷ୍ମା ସମ୍ବନ୍ଧୀୟ ମୃତ୍ୟୁହାର ୨୮ ପ୍ରତିଶତ ହ୍ରାସ ପାଇଛି।
ଟିବି-ମୁକ୍ତ ଭାରତ ଅଭିଯାନ ଅଧୀନରେ, ଡିସେମ୍ବର ୭, ୨୦୨୪ ପରଠାରୁ ୨୦ କୋଟିରୁ ଅଧିକ ଦୁର୍ବଳ ବ୍ୟକ୍ତିଙ୍କୁ ଯକ୍ଷ୍ମା ପାଇଁ ସ୍କ୍ରିନିଂ କରାଯାଇଛି। ଭାରତର ଏଆଇ-ସକ୍ଷମ ଯକ୍ଷ୍ମା କାର୍ଯ୍ୟକ୍ରମ କାଶ ସ୍କ୍ରିନିଂ, ଛାତି ଏକ୍ସ-ରେର ଏଆଇ-ସହାୟିତ ବ୍ୟାଖ୍ୟା ଏବଂ ଉଚ୍ଚ-ବିପଦଗ୍ରସ୍ତ ବ୍ୟକ୍ତିମାନଙ୍କୁ ଚିହ୍ନଟ କରିବା ପାଇଁ ଭବିଷ୍ୟବାଣୀ ବିଶ୍ଳେଷଣ ପାଇଁ କୃତ୍ରିମ ବୁଦ୍ଧିମତ୍ତା ମଧ୍ୟ ବ୍ୟବହାର କରୁଛି, ଯାହା ଫଳରେ ଏହି ପଦକ୍ଷେପ ମାଧ୍ୟମରେ ୨୮ ଲକ୍ଷରୁ ଅଧିକ ଯକ୍ଷ୍ମା ରୋଗୀଙ୍କ ନିର୍ଣ୍ଣୟ ହୋଇପାରିଛି।
ଏମ୍ ଭୁବନେଶ୍ୱର ମେଡିକାଲ ଅଧୀକ୍ଷକ ଡ. ପ୍ରଭାସ ରଞ୍ଜନ ତ୍ରିପାଠୀ, ପଲ୍ମୋନାରୀ ମେଡିସିନ୍ ଏବଂ କ୍ରିଟିକାଲ୍ କେୟାର ବିଭାଗର ମୁଖ୍ୟ ତଥା କାର୍ଯ୍ୟକ୍ରମର ସାଂଗଠନିକ ଅଧ୍ୟକ୍ଷ ଡ. ପ୍ରଶାନ୍ତ ରାଘବ ମହାପାତ୍ର, ସଂଗଠନ ସଚିବ ଡ. ସୌରିନ ଭୁୟାଁ ପ୍ରମୁଖ ମଞ୍ଚାସୀନ ଥିଲେ।