ଭୁବନେଶ୍ବର: ଗାଁକୁ ସହର ଭଳି ସୁବିଧାସମ୍ପନ୍ନ କରିବା ଲକ୍ଷ୍ୟରେ ରାଜ୍ୟ ସରକାର ‘ଗ୍ରାମ ସମ୍ପଦ’ କାର୍ଯ୍ୟକ୍ରମ ଆରମ୍ଭ କରିବେ। ଆସନ୍ତାବର୍ଷ ଏପ୍ରିଲ-ମେ’ରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପୂର୍ବରୁ ଏହି ଯୋଜନାକୁ ଗୁରୁତ୍ବ ଦିଆଯାଉଛି।
ପଞ୍ଚାୟତର ଜନସଂଖ୍ୟା ଆଧାରରେ ପ୍ରତିବର୍ଷ ୧.୫ରୁ ୩ କୋଟି ଟଙ୍କା ପର୍ଯ୍ୟନ୍ତ ଅନୁଦାନ ଦିଆଯିବ। ପାଞ୍ଚବର୍ଷ ଧରି ଏହି ଯୋଜନା ଚାଲିବ। ଗ୍ରାମସଭାରେ ଲୋକଙ୍କ ଆବଶ୍ୟକତା ଅନୁଯାୟୀ ପ୍ରକଳ୍ପ ଚୟନ କରାଯିବ। ବିଭିନ୍ନ କେନ୍ଦ୍ର ଓ ରାଜ୍ୟ ଯୋଜନାର ପାଣ୍ଠିକୁ ସମନ୍ବିତ କରି ଏହା କାର୍ଯ୍ୟକାରୀ ହେବ।
ଯୋଜନାରେ ପ୍ରତି ପଞ୍ଚାୟତରେ ଆଦର୍ଶ ଖେଳପଡ଼ିଆ, କଲ୍ୟାଣ ମଣ୍ଡପ, ପୋଖରୀ, ଶ୍ମଶାନ, ଗ୍ରାମୀଣ ପାର୍କ, ହାଟ ଓ ପାଠାଗାର ନିର୍ମାଣ ହେବ। ପୋଖରୀ ଚାରିପଟେ ଚଲାପଥ ଓ ମୁକ୍ତାକାଶ ବ୍ୟାୟାମଶାଳା, ପାର୍କରେ ଜିମ୍ ଓ ଆଲୋକୀକରଣ ଏବଂ ଶ୍ମଶାନରେ ଆବଶ୍ୟକ ସୁବିଧା ରହିବ।
ଏହାସହ ପ୍ରତି ଗ୍ରାମପଞ୍ଚାୟତରେ ୭୦୦ଟି ଗଛ ଲଗାଯିବ। ପାଠାଗାରରେ ଛାତ୍ରଛାତ୍ରୀ ଓ ସାଧାରଣ ପାଠକଙ୍କ ପାଇଁ ବିଭିନ୍ନ ବହି ଉପଲବ୍ଧ ହେବ। ପ୍ରକଳ୍ପଗୁଡ଼ିକର ରକ୍ଷଣାବେକ୍ଷଣ ପାଇଁ ମଧ୍ୟ ସରକାରୀ ସହାୟତା ଦିଆଯିବ।
ପଞ୍ଚାୟତିରାଜ ମନ୍ତ୍ରୀ ରବିନାରାୟଣ ନାଏକଙ୍କ କହିବାନୁସାରେ, ଗାଁରେ ସହରାଞ୍ଚଳ ଭଳି ସୁବିଧା ଓ ଭିତ୍ତିଭୂମି ଉପଲବ୍ଧ କରାଇବା ହେଉଛି ‘ଗ୍ରାମ ସମ୍ପଦ’ର ମୁଖ୍ୟ ଲକ୍ଷ୍ୟ।