ନୂଆଦିଲ୍ଲୀ: ବିଶ୍ୱ ଡ୍ରୋନ୍ ବଜାରରେ ଚୀନ୍ର ପ୍ରଭାବ କମାଇବା ଏବଂ ନିଜର ଘରୋଇ ଉତ୍ପାଦନକୁ ସୁଦୃଢ଼ କରିବା ଲକ୍ଷ୍ୟରେ ଆମେରିକା ସରକାର ଏକ ବଡ଼ ନିଷ୍ପତ୍ତି ଗ୍ରହଣ କରିଛନ୍ତି। ବିଦେଶରୁ ଆମଦାନି ହେଉଥିବା ଡ୍ରୋନ୍ ଏବଂ ଏହାର ନିର୍ଦ୍ଦିଷ୍ଟ ଯନ୍ତ୍ରାଂଶ ଉପରେ ଆମେରିକା ପ୍ରଶାସନ ୧୦୦ ପ୍ରତିଶତ ଯାଏଁ କଡ଼ା ଆମଦାନି ଶୁଳ୍କ ଲାଗୁ କରିଛି, ଯାହା ଗୁରୁବାରଠାରୁ ଆନୁଷ୍ଠାନିକ ଭାବେ କାର୍ଯ୍ୟକାରୀ ହୋଇଛି। ବିଦେଶୀ ଡ୍ରୋନ୍ ଓ ଏହାର ବିଭିନ୍ନ ଉପକରଣ ଉପରେ ଅତ୍ୟଧିକ ନିର୍ଭରଶୀଳତା ଦେଶର ଜାତୀୟ ସୁରକ୍ଷା ପ୍ରତି ଏକ ଗମ୍ଭୀର ବିପଦ ସୃଷ୍ଟି କରୁଛି ବୋଲି ହ୍ୱାଇଟ୍ ହାଉସ୍ ପକ୍ଷରୁ ସ୍ପଷ୍ଟ କରାଯାଇଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗତ ଅଗଷ୍ଟ ମାସରେ ଏହି ଗୁରୁତ୍ୱପୂର୍ଣ୍ଣ ସ୍ୱାକ୍ଷରିତ ନିର୍ଦ୍ଦେଶନାମା ଜାରି କରିଥିଲେ। ନୂତନ ନିୟମ ଅନୁଯାୟୀ, ୨୫ କିଲୋଗ୍ରାମରୁ ଅଧିକ ଓଜନ ବିଶିଷ୍ଟ ଡ୍ରୋନ୍, ଥର୍ମାଲ ଇମେଜିଂ ସୁବିଧା ଥିବା ଆଧୁନିକ ଡ୍ରୋନ୍, ଡ୍ରୋନ୍ ଡକିଂ ଷ୍ଟେସନ୍ ଏବଂ ଏହାର ଗୁରୁତ୍ୱପୂର୍ଣ୍ଣ ଯନ୍ତ୍ରାଂଶ ଉପରେ ସର୍ବାଧିକ ୧୦୦ ପ୍ରତିଶତ ଶୁଳ୍କ ଲାଗୁ ହୋଇଛି। ସେହିପରି ଅପେକ୍ଷାକୃତ ହାଲୁକା ଓ ସାଧାରଣ ଡ୍ରୋନ୍ ଏବଂ ଏହାର ଯନ୍ତ୍ରାଂଶ ଉପରେ ୨୫ ପ୍ରତିଶତ ଶୁଳ୍କ ଧାର୍ଯ୍ୟ କରାଯାଇଛି। ତେବେ ଜାତୀୟ ସୁରକ୍ଷା ଦୃଷ୍ଟିରୁ କମ୍ ସଂବେଦନଶୀଳ ଯନ୍ତ୍ରାଂଶଗୁଡ଼ିକ ଉପରେ ଏହି ଶୁଳ୍କ ଆସନ୍ତା ବର୍ଷ ଫେବୃଆରୀ ମାସରୁ ଲାଗୁ ହେବ।
ଅନ୍ୟପକ୍ଷରେ, ଆମେରିକାର ମିତ୍ର ରାଷ୍ଟ୍ରଗୁଡ଼ିକୁ ଏହି କଡ଼ା ନିୟମରୁ କିଛିଟା କୋହଳ ସୁବିଧା ପ୍ରଦାନ କରାଯାଇଛି। ୟୁରୋପୀୟ ୟୁନିଅନ୍, ଜାପାନ, ଲିଚଟେନଷ୍ଟାଇନ୍, ଦକ୍ଷିଣ କୋରିଆ, ସ୍ୱିଜରଲ୍ୟାଣ୍ଡ ଏବଂ ତାଇୱାନରୁ ଆସୁଥିବା ଡ୍ରୋନ୍ ଓ ଉପକରଣ ଉପରେ ୧୫ ପ୍ରତିଶତ ଶୁଳ୍କ ରଖାଯାଇଥିବା ବେଳେ ବ୍ରିଟେନ୍ରୁ ଆମଦାନି ହେଉଥିବା ଡ୍ରୋନ୍ ଉପରେ ୧୦ ପ୍ରତିଶତ ଶୁଳ୍କ ଲାଗୁ କରାଯାଇଛି। ତେବେ ଏହିସବୁ ଡ୍ରୋନ୍ର ହାର୍ଡୱେର୍, ସଫ୍ଟୱେର୍ ଓ ଆନୁଷଙ୍ଗିକ ପ୍ରଯୁକ୍ତିବିଦ୍ୟା ମୁଖ୍ୟତଃ ସମ୍ପୃକ୍ତ ଦେଶ କିମ୍ବା ଆମେରିକାରେ ନିର୍ମିତ ହୋଇଥିବା ବାଧ୍ୟତାମୂଳକ କରାଯାଇଛି। ବିଶ୍ୱ ଡ୍ରୋନ୍ ବଜାରରେ ଚୀନ୍ର ପ୍ରଭାବ ଅତ୍ୟନ୍ତ ବ୍ୟାପକ ରହିଛି। ସେଥିମଧ୍ୟରୁ ଚୀନ୍ର ପ୍ରମୁଖ ଡ୍ରୋନ୍ ନିର୍ମାତା କମ୍ପାନି ‘ଡିଜେଆଇ’ ଏକାକୀ ବିଶ୍ୱ ବଜାରର ଦୁଇ-ତୃତୀୟାଂଶରୁ ଅଧିକ ଅଂଶ ଦଖଲ କରି ରଖିଛି। ଆମେରିକାର ଏହି ବଡ଼ ନିଷ୍ପତ୍ତି ଚୀନ୍ର ଏହି କାଟ୍ତିକୁ ହ୍ରାସ କରିବା ସହ ଆମେରିକା ଭିତରେ ସ୍ୱଦେଶୀ ଡ୍ରୋନ୍ ନିର୍ମାଣ ଓ ଏହାର ଯୋଗାଣ ଶୃଙ୍ଖଳକୁ ମଜବୁତ କରିବାରେ ବେଶ୍ ସହାୟକ ହେବ ବୋଲି ଆଶା କରାଯାଉଛି।