ଭୁବନେଶ୍ୱର: ରାଜ୍ୟର ବିଭିନ୍ନ ସ୍ଥାନନାମର ଓଡ଼ିଆ ଉଚ୍ଚାରଣ ଅନୁସାରେ ସଂଶୋଧିତ ଇଂରାଜୀ ବନାନକୁ ସବୁ ସରକାରୀ କାର୍ଯ୍ୟାଳୟରେ ତୁରନ୍ତ ଲାଗୁ କରିବାକୁ ସରକାର ପୁଣି ଥରେ ତତ୍ପରତା ପ୍ରକାଶ କରିଛନ୍ତି। କ୍ୟାବିନେଟ୍ ନିଷ୍ପତ୍ତି ଅନୁଯାୟୀ ସମସ୍ତ ସାଇନ୍ବୋର୍ଡରେ ଏହି ନୂତନ ବନାନ ବ୍ୟବହାର ସୁନିଶ୍ଚିତ କରିବା ପାଇଁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଡ. ଅରବିନ୍ଦ କୁମାର ପାଢ଼ୀ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖି କଡ଼ା ନିର୍ଦ୍ଦେଶ ଦେଇଛନ୍ତି। ଯେଉଁ କାର୍ଯ୍ୟାଳୟଗୁଡ଼ିକରେ ଏପର୍ଯ୍ୟନ୍ତ ଏହା ବଦଳିନାହିଁ, ଆସନ୍ତା ୭ ଦିନ ମଧ୍ୟରେ ତାହା ଶେଷ କରିବାକୁ କୁହାଯାଇଛି।
ଗତ ଜୁନ୍ ୨୨, ୨୦୨୬ରେ ପ୍ରକାଶିତ ଗେଜେଟ୍ ବିଜ୍ଞପ୍ତି ଅନୁଯାୟୀ, ସରକାରୀ ସାଇନ୍ବୋର୍ଡଗୁଡ଼ିକରେ ସଂଶୋଧିତ ବନାନ ଲାଗୁ କରିବା ପାଇଁ ମାସକର ସମୟସୀମା ଦିଆଯାଇଥିଲା। ସେହିପରି ବେସରକାରୀ ଓ ଅଣ-ସରକାରୀ ପ୍ରତିଷ୍ଠାନଗୁଡ଼ିକୁ ଏଥିପାଇଁ ୬ ମାସ ସମୟ ମିଳିଛି। ତେବେ ଅନେକ ଜିଲ୍ଲାରେ ଏହା କାର୍ଯ୍ୟକାରୀ ହୋଇଥିଲେ ସୁଦ୍ଧା କେତେକ ସରକାରୀ କାର୍ଯ୍ୟାଳୟରେ ଏବେ ବି ପୁରୁଣା ଇଂରାଜୀ ବନାନ ବ୍ୟବହାର ହେଉଥିବା ସରକାରଙ୍କ ଦୃଷ୍ଟିଗୋଚର ହୋଇଛି। ଏହାଦ୍ୱାରା ନାମକରଣରେ ଅସଙ୍ଗତି ଦେଖାଦେବା ସହ କ୍ୟାବିନେଟ୍ ନିଷ୍ପତ୍ତିର ମୂଳ ଉଦ୍ଦେଶ୍ୟ ବାହତ ହେଉଥିବା କୁହାଯାଇଛି।
ଏହାକୁ ଗୁରୁତ୍ୱର ସହ ନେଇ ଜିଲ୍ଲାପାଳମାନେ ନିଜ ନିଜ ଏରିଆର ସରକାରୀ କାର୍ଯ୍ୟାଳୟ ଓ ସାଇନ୍ବୋର୍ଡ ସମୀକ୍ଷା କରିବାକୁ କୁହାଯାଇଛି। ବେସରକାରୀ ପ୍ରତିଷ୍ଠାନଗୁଡ଼ିକୁ ମଧ୍ୟ ଏହି ନୂତନ ବନାନ ଆପଣାଇବାକୁ ପରାମର୍ଶ ଦିଆଯାଇଛି। ଏହି ସଂଶୋଧନ କାର୍ଯ୍ୟକୁ ସର୍ବୋଚ୍ଚ ପ୍ରାଥମିକତା ଦେଇ ଗୋଟିଏ ସପ୍ତାହ ମଧ୍ୟରେ ଅନୁପାଳନ ରିପୋର୍ଟ ଦାଖଲ କରିବାକୁ ଜିଲ୍ଲାପାଳମାନଙ୍କୁ ସ୍ପଷ୍ଟ ନିର୍ଦ୍ଦେଶ ରହିଛି।