ଜାକର୍ତ୍ତା: ଇଣ୍ଡୋନେସିଆର ମାଉଣ୍ଟ ଅନାକ କ୍ରାକାଟୋଆରେ ଏକ ଭୟଙ୍କର ଆଗ୍ନେୟଗିରି ବିସ୍ଫୋରଣ ଘଟିଛି। ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଆଗ୍ନେୟଗିରିରୁ ନିର୍ଗତ ଧୂଆଁ ଓ ପାଉଁଶ ଆକାଶରେ ପ୍ରାୟ ୫୦,୦୦୦ ଫୁଟ ଉଚ୍ଚତା ପର୍ଯ୍ୟନ୍ତ ଛାଇ ଯାଇଛି। ତେବେ ଏହି ଘଟଣାରେ ବର୍ତ୍ତମାନ ସୁଦ୍ଧା କୌଣସି ଧନଜୀବନ କ୍ଷୟକ୍ଷତିର ସୂଚନା ମିଳିନଥିବା ବେଳେ ବାୟୁମଣ୍ଡଳରେ ପାଉଁଶ ବ୍ୟାପିବା ଯୋଗୁଁ ବିମାନ ଚଳାଚଳ ଗୁରୁତର ଭାବେ ପ୍ରଭାବିତ ହୋଇଛି। ଆଗ୍ନେୟଗିରିରୁ ବାହାରିଥିବା ପାଉଁଶ ଯୋଗୁଁ ତାଙ୍ଗେରାଙ୍ଗସ୍ଥିତ ସୋଏକାର୍ଣ୍ଣୋ-ହାଟା ଆନ୍ତର୍ଜାତୀୟ ବିମାନବନ୍ଦରକୁ ଅସ୍ଥାୟୀ ଭାବେ ବନ୍ଦ କରିବାକୁ ପଡ଼ିଛି। ଯାତ୍ରୀଙ୍କ ସୁରକ୍ଷା ଦୃଷ୍ଟିରୁ ୫୮ଟି ଆନ୍ତର୍ଜାତୀୟ ଉଡ଼ାଣ ସମେତ ୩୦୦ରୁ ଅଧିକ ବିମାନ ସେବା ବାଧାପ୍ରାପ୍ତ ହୋଇଛି। ସିଙ୍ଗାପୁର ଏୟାରଲାଇନ୍ସ, ଏୟାର ଏସିଆ ଓ ଗରୁଡ଼ ଇଣ୍ଡୋନେସିଆ ପକ୍ଷରୁ ଅନେକ ବିମାନ ବାତିଲ ସହ ସମୟ ପରିବର୍ତ୍ତନ କରାଯାଇଛି।
ଇଣ୍ଡୋନେସିଆ ବିପର୍ଯ୍ୟୟ ପରିଚାଳନା ଏଜେନ୍ସି ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହି ବିସ୍ଫୋରଣରୁ ବର୍ତ୍ତମାନ ସୁନାମିର କୌଣସି ଆଶଙ୍କା ନାହିଁ। ମାତ୍ର ବାୟୁ ପ୍ରଦୂଷଣକୁ ଦୃଷ୍ଟିରେ ରଖି ସ୍ଥାନୀୟ ଲୋକଙ୍କୁ ମାସ୍କ ଓ ଚଷମା ପିନ୍ଧିବାକୁ ପରାମର୍ଶ ଦିଆଯାଇଛି। ଇଣ୍ଡୋନେସିଆର ଭୂବିଜ୍ଞାନ ଏଜେନ୍ସି ଅନୁଯାୟୀ, ଅନାକ କ୍ରାକାଟୋଆ ଗତ ଜୁଲାଇ ୨ରୁ ଦ୍ୱିତୀୟ ସର୍ବୋଚ୍ଚ ସ୍ତର ‘ଆଲର୍ଟ ଲେଭଲ୍-୩’ରେ ରହିଛି। ଏହା ବ୍ୟତୀତ ମାଉଣ୍ଟ ସେମେରୁ, ମାଉଣ୍ଟ ମେରାପି, ଲେଭୋଟୋବି ଲାକି-ଲାକି ଏବଂ ସିନାବୁଙ୍ଗ ପରି ଅନ୍ୟ ୪ଟି ଆଗ୍ନେୟଗିରି ମଧ୍ୟ ଆଲର୍ଟ ଲେଭଲ୍-୩ରେ ଅଛନ୍ତି। ରବିବାର ମାଉଣ୍ଟ ସେମେରୁରେ ମଧ୍ୟ ବିସ୍ଫୋରଣ ଘଟି ୧ କିଲୋମିଟର ଉଚ୍ଚ ପର୍ଯ୍ୟନ୍ତ ପାଉଁଶ ବାଦଲ ସୃଷ୍ଟି ହୋଇଥିଲା।