ଭୁବନେଶ୍ୱର: ଭାରତ ସରକାରଙ୍କ କେନ୍ଦ୍ରୀକୃତ ସାଧାରଣ ଅଭିଯୋଗ ସମାଧାନ ଏବଂ ଅନୁଧ୍ୟାନ ପ୍ରଣାଳୀ (ସିପିଗ୍ରାମ୍ସ) ପୋର୍ଟାଲ୍ ସାଧାରଣ ଲୋକଙ୍କ ଅଭିଯୋଗ ସମାଧାନରେ ବିଶେଷ ଭାବେ ସହାୟକ ହେଉଛି। ଏହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ଓଡ଼ିଶାର ବାଲେଶ୍ୱର ଏବଂ ଯାଜପୁର ଜିଲ୍ଲାରେ।
ବାଲେଶ୍ୱର ଜିଲ୍ଲା ବାଲିକୁଟି ଗ୍ରାମ ପଞ୍ଚାୟତ ଅଧୀନ ବାଲିକୁଟି ସରକାରୀ ହାଇସ୍କୁଲ ନିକଟରେ ଦୀର୍ଘ ଦିନ ଧରି ଷ୍ଟ୍ରିଟ୍ ଲାଇଟ୍ ଅଚଳ ହୋଇଯାଇଥିଲା। ସୂର୍ଯ୍ୟାସ୍ତ ପରେ ସେହି ଅଞ୍ଚଳ ଦେଇ ଯାତାୟାତ କରିବା ସ୍ଥାନୀୟ ଲୋକଙ୍କ ପାଇଁ ଅସୁରକ୍ଷିତ ହୋଇପଡ଼ୁଥିଲା। ଏପରିକି ରାତିରେ ଅନ୍ଧକାରର ସୁଯୋଗ ନେଇ ସେଠାରେ ଅସାମାଜିକ ତତ୍ତ୍ୱଙ୍କ ଉପଦ୍ରବ ଆଶଙ୍କା ରହୁଥିଲା। ଏ ସମ୍ପର୍କରେ ବାରମ୍ବାର ଅଭିଯୋଗ ସତ୍ତ୍ୱେ ସ୍ଥାନୀୟ ପ୍ରଶାସନ ସେଥିପ୍ରତି କର୍ଣ୍ଣପାତ କରିନଥିଲା। ଫଳରେ ସ୍ଥାନୀୟ ଅଞ୍ଚଳର ବାସିନ୍ଦା ଜଗଦୀଶ ଗିରି ଏ ସମ୍ପର୍କରେ ସିପିଗ୍ରାମ୍ସ ପୋର୍ଟାଲରେ ଅଭିଯୋଗ କରିଥିଲେ।
କେନ୍ଦ୍ର ପଞ୍ଚାୟତିରାଜ ମନ୍ତ୍ରଣାଳୟ ଅଭିଯୋଗକୁ ଅନୁଧ୍ୟାନ କରି ରାଜ୍ୟ ସରକାରଙ୍କୁ ଏହାର ସମାଧାନ ପାଇଁ ନିର୍ଦ୍ଦେଶ ଦେଇଥିଲା। ସ୍ଥାନୀୟ ବିଡିଓ ଏବଂ ବୈଷୟିକ କର୍ମଚାରୀମାନେ ସେହି ସ୍ଥାନରେ ସ୍ଥିତି ଅନୁଧ୍ୟାନ କରିବା ପରେ ସମସ୍ୟାର ତୁରନ୍ତ ସମାଧାନ ହୋଇଥିଲା। ବର୍ତ୍ତମାନ ସେଠାରେ ପୁଣିଥରେ ଷ୍ଟ୍ରିଟ୍ ଲାଇଟ୍ ଜଳିବା ଆରମ୍ଭ ହୋଇଛି।
ଅନୁରୂପ ଭାବେ, ସିପିଗ୍ରାମ୍ସ ପୋର୍ଟାଲରେ ଅଭିଯୋଗ ପରେ ଯାଜପୁର ଜିଲ୍ଲା ଧର୍ମଶାଳା ବ୍ଲକ କାଇମାଟିଆ ଗ୍ରାମପଞ୍ଚାୟତରେ ରାସ୍ତା ମରାମତି କରାଯାଇଛି। କାଇମାଟିଆ ଗାଁରେ ତିଆରି ହୋଇଥିବା ପକ୍କା ସଡ଼କ ନିର୍ମାଣର ମାତ୍ର ଦୁଇ ମାସ ମଧ୍ୟରେ ଭାଙ୍ଗି ଯାଇଥିଲା। ରାସ୍ତାର କିଛି ସ୍ଥାନରେ ଫାଟ ସୃଷ୍ଟି ହେବା ପରେ ରାସ୍ତାର ଗୁଣବତ୍ତାକୁ ନେଇ ସାଧାରଣରେ ପ୍ରଶ୍ନ ଉଠିଥିଲା ଯାହାକି ସ୍ଥାନୀୟ ଲୋକଙ୍କ ଭିତରେ ଅସନ୍ତୋଷ ସୃଷ୍ଟି କରିଥିଲା। ଏ ସମ୍ପର୍କରେ ସ୍ଥାନୀୟ ବାସିନ୍ଦା ମନୋଜ କୁମାର ବେହେରା ସିପିଗ୍ରାମ୍ସ ପୋର୍ଟାଲରେ ଅଭିଯୋଗ କରିଥିଲେ। କେନ୍ଦ୍ର ପଞ୍ଚାୟତିରାଜ ମନ୍ତ୍ରଣାଳୟ ତାଙ୍କର ଏହି ଅଭିଯୋଗ ଆଧାରରେ ହସ୍ତକ୍ଷେପ କରି ତୁରନ୍ତ ରାସ୍ତା ମରାମତି ଲାଗି ବିଭାଗୀୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲା। ଏହାପରେ ନିର୍ଦ୍ଧାରିତ ନିର୍ମାଣ ମାନ ମୁତାବକ ସେହି ରାସ୍ତାର ମରାମତି କରାଯାଇଛି।