ନୂଆଦିଲ୍ଲୀ: ବିଦେଶ ଭ୍ରମଣ କରିବାକୁ ଇଚ୍ଛା ରଖୁଥିବା ପର୍ଯ୍ୟଟକଙ୍କ ପାଇଁ IRCTC ଆଣିଛି ଆକର୍ଷଣୀୟ ବାଲି ଟୁର୍ ପ୍ୟାକେଜ୍। ଏହି ପ୍ୟାକେଜ୍ରେ ବିମାନ ଯାତ୍ରାଠାରୁ ଆରମ୍ଭ କରି ହୋଟେଲ, ଖାଦ୍ୟ, ସ୍ଥାନୀୟ ଦର୍ଶନ ଓ ଯାତାୟାତ ଭଳି ଅନେକ ସୁବିଧା ସାମିଲ ରହିଛି।
ଏହି ୫ ଦିନିଆ ବାଲି ଟୁର୍ ପ୍ୟାକେଜ୍ ଅକ୍ଟୋବର ୨୪, ୨୦୨୬ରୁ ଆରମ୍ଭ ହେବ। ଯାତ୍ରାର ଆରମ୍ଭ ହାଇଦ୍ରାବାଦରୁ ହେବ। ପର୍ଯ୍ୟଟକମାନଙ୍କୁ ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ରାତି ୮ଟା ସୁଦ୍ଧା ରିପୋର୍ଟ କରିବାକୁ ପଡ଼ିବ। ବିମାନ ରାତି ୧୧ଟା ୩୫ ମିନିଟ୍ରେ ଛାଡ଼ିବ।
ପ୍ୟାକେଜ୍ରେ ହାଇଦ୍ରାବାଦରୁ ବାଲିର ଡେନପାସାର ପର୍ଯ୍ୟନ୍ତ ରାଉଣ୍ଡ ଟ୍ରିପ୍ ବିମାନ ଯାତ୍ରା ସାମିଲ ରହିଛି। ବାଲିରେ ପର୍ଯ୍ୟଟକଙ୍କ ପାଇଁ ୩ ଷ୍ଟାର୍ ହୋଟେଲରେ ରହିବାର ବ୍ୟବସ୍ଥା କରାଯିବ।
ଖାଦ୍ୟରେ ୪ଟି ବ୍ରେକଫାଷ୍ଟ, ୫ଟି ଲଞ୍ଚ ଓ ୪ଟି ଡିନର୍ ସାମିଲ ରହିଛି। ଏହାସହ ପ୍ରତିଦିନ ୫୦୦ ମିଲିଲିଟରର ଦୁଇଟି ପାଣି ବୋତଲ ମଧ୍ୟ ଯାତ୍ରୀଙ୍କୁ ଦିଆଯିବ।
ବାଲିର ବିଭିନ୍ନ ପର୍ଯ୍ୟଟନସ୍ଥଳୀ ବୁଲିବା ପାଇଁ ଏସି ଡିଲକ୍ସ ବସ୍ର ବ୍ୟବସ୍ଥା ରହିଛି। ସ୍ଥାନୀୟ ଦର୍ଶନୀୟ ସ୍ଥାନଗୁଡ଼ିକର ପ୍ରବେଶ ଟିକେଟ୍ ମଧ୍ୟ ପ୍ୟାକେଜ୍ରେ ସାମିଲ ଅଛି। ଏହାସହ ଇଂରାଜୀ ଭାଷାରେ କଥା ହୋଇପାରୁଥିବା ଗାଇଡ୍ଙ୍କ ସୁବିଧା ମଧ୍ୟ ମିଳିବ।
ଏହି ଟୁର୍ ପ୍ୟାକେଜ୍ରେ ୨ ପ୍ରତିଶତ TCS ଏବଂ ଟ୍ରାଭେଲ ଇନ୍ସ୍ୟୁରାନ୍ସ ମଧ୍ୟ ସାମିଲ ରହିଛି। ଆୟକର ନିୟମ ଅନୁସାରେ ଯୋଗ୍ୟ ପର୍ଯ୍ୟଟକମାନେ TCS ରିଫଣ୍ଡ ଦାବି କରିପାରିବେ।
କେଉଁଠି ବୁଲିବେ?
ଏହି ଟୁର୍ ପ୍ୟାକେଜ୍ରେ ବାଲିର ଅନେକ ପ୍ରମୁଖ ପର୍ଯ୍ୟଟନସ୍ଥଳୀ ବୁଲିବାର ସୁଯୋଗ ମିଳିବ। ଯାତ୍ରା ସମୟରେ ଜିମ୍ବାରାନ୍ ବିଚ୍, କିନ୍ତାମଣି, ଉବୁଦ୍, ସାକ୍ରେଡ୍ ମଙ୍କି ଫରେଷ୍ଟ ସାଙ୍କ୍ଚୁଆରୀ, ତିର୍ତା ଏମ୍ପୁଲ୍ ମନ୍ଦିର ଭଳି ସ୍ଥାନ ଦେଖିପାରିବେ ପର୍ଯ୍ୟଟକ।
ଏହାଛଡ଼ା ତାଞ୍ଜୁଙ୍ଗ ବେନୋଆ ବିଚ୍, ଟର୍ଟଲ ଆଇଲ୍ୟାଣ୍ଡ, ତାମନ ଆୟୁନ୍ ମନ୍ଦିର, ଉଲୁନ୍ ଡାନୁ ବ୍ରାଟନ୍ ମନ୍ଦିର ଓ ତାନାହ ଲଟ୍ ମନ୍ଦିର ମଧ୍ୟ ଏହି ଯାତ୍ରାର ଆକର୍ଷଣ ପାଲଟିବ।
କେତେ ଟଙ୍କା ଖର୍ଚ୍ଚ ହେବ?
IRCTCର ଏହି ବାଲି ଟୁର୍ ପ୍ୟାକେଜ୍ର ମୂଲ୍ୟ ରୁମ୍ରେ କେତେଜଣ ରହିବେ, ତାହା ଅନୁସାରେ ଭିନ୍ନ ରହିଛି। ସିଙ୍ଗଲ୍ ଅକ୍ୟୁପାନ୍ସି ପାଇଁ ପ୍ରତି ବ୍ୟକ୍ତିଙ୍କୁ ୧,୦୧,୬୦୦ ଟଙ୍କା ଦେବାକୁ ପଡ଼ିବ।
ଡବଲ୍ ଶେୟାରିଂ ପାଇଁ ପ୍ରତି ବ୍ୟକ୍ତିଙ୍କ ମୂଲ୍ୟ ୯୫,୯୦୦ ଟଙ୍କା ରହିଛି। ଟ୍ରିପଲ୍ ଶେୟାରିଂ ପାଇଁ ଏହା ୯୫,୫୦୦ ଟଙ୍କା। ଅର୍ଥାତ୍ ଏକାଠି ଯାତ୍ରା କରୁଥିବା ପରିବାର କିମ୍ବା ବନ୍ଧୁମାନଙ୍କ ପାଇଁ ଶେୟାରିଂ ଅପ୍ସନ୍ ନେଲେ ଖର୍ଚ୍ଚ ତୁଳନାମୂଳକ ଭାବେ କମ୍ ପଡ଼ିପାରେ।
୨ରୁ ୧୧ ବର୍ଷ ବୟସର ଶିଶୁଙ୍କ ପାଇଁ ଅଲଗା ବେଡ୍ ସହିତ ପ୍ୟାକେଜ୍ ମୂଲ୍ୟ ୮୯,୦୫୦ ଟଙ୍କା ରହିଛି। ଅଲଗା ବେଡ୍ ନନେଲେ ଶିଶୁଙ୍କ ପାଇଁ ମୂଲ୍ୟ ୮୫,୫୦୦ ଟଙ୍କା ରହିଛି।
କ’ଣ କ’ଣ ସାମିଲ ନାହିଁ?
ପ୍ୟାକେଜ୍ରେ ଅନେକ ସୁବିଧା ସାମିଲ ଥିଲେ ମଧ୍ୟ କିଛି ଖର୍ଚ୍ଚ ଯାତ୍ରୀଙ୍କୁ ନିଜେ ବହନ କରିବାକୁ ପଡ଼ିବ। ଭବିଷ୍ୟତରେ ବିମାନବନ୍ଦର ଟ୍ୟାକ୍ସ କିମ୍ବା ଫ୍ୟୁଏଲ୍ ସରଚାର୍ଜ ବୃଦ୍ଧି ହେଲେ ତାହା ଏହି ପ୍ୟାକେଜ୍ରେ ସାମିଲ ନୁହେଁ।
ଏହାସହ ଡ୍ରାଇଭର କିମ୍ବା ଗାଇଡ୍ଙ୍କ ଟିପ୍ସ, ଲଣ୍ଡ୍ରି, ପାନୀୟ, ବ୍ୟକ୍ତିଗତ ଖର୍ଚ୍ଚ ଏବଂ ପ୍ୟାକେଜ୍ ବାହାରର ଅନ୍ୟାନ୍ୟ ସେବା ପାଇଁ ଯାତ୍ରୀଙ୍କୁ ଅତିରିକ୍ତ ଟଙ୍କା ଦେବାକୁ ପଡ଼ିପାରେ। ଖାଦ୍ୟ ପାଇଁ ନିର୍ଦ୍ଧାରିତ ମେନୁ ରହିବ ଏବଂ ମନପସନ୍ଦ ଖାଦ୍ୟ ବାଛିବାର ସୁବିଧା ନଥାଇପାରେ।
ବାଲି ଯିବାକୁ ଚାହୁଁଥିଲେ ଜାଣନ୍ତୁ
ବାଲିର ପ୍ରାକୃତିକ ସୌନ୍ଦର୍ଯ୍ୟ, ସମୁଦ୍ରତଟ, ମନ୍ଦିର ଓ ସାଂସ୍କୃତିକ ଆକର୍ଷଣକୁ ଗୋଟିଏ ଟ୍ରିପ୍ରେ ଦେଖିବାକୁ ଚାହୁଁଥିବା ପର୍ଯ୍ୟଟକଙ୍କ ପାଇଁ ଏହି IRCTC ପ୍ୟାକେଜ୍ ଏକ ବିକଳ୍ପ ହୋଇପାରେ। ବିମାନ, ହୋଟେଲ, ଖାଦ୍ୟ, ଯାତାୟାତ ଓ ସାଇଟ୍ସିଇଂକୁ ଏକାଠି କରାଯାଇଥିବାରୁ ଯାତ୍ରା ପ୍ଲାନ୍ କରିବା ମଧ୍ୟ ସହଜ ହୋଇପାରେ।