କୋହିମା: ମଦ ବିକ୍ରି ଓ ସେବନ ଉପରେ କଡ଼ା କଟକଣା ସତ୍ତ୍ୱେ ନାଗାଲାଣ୍ଡରେ ଏକ ଭୟଙ୍କର ଅଘଟଣ ଘଟିଯାଇଛି। ରାଜ୍ୟରେ ବିଷାକ୍ତ ମଦ ପିଇ ୧୯ ଜଣଙ୍କର ମୃତ୍ୟୁ ଘଟିଥିବା ବେଳେ ବହୁ ଲୋକ ଅସୁସ୍ଥ ହୋଇପଡ଼ିଛନ୍ତି। ପୋଲିସର ସୂଚନା ଅନୁଯାୟୀ, ଗତ ଦୁଇ ଦିନ ମଧ୍ୟରେ ମୋକୋକଚୁଙ୍ଗ ଜିଲ୍ଲାରୁ ୮ ଜଣ ଏବଂ ତୁଏନସାଙ୍ଗ ଜିଲ୍ଲାରୁ ୧୧ ଜଣଙ୍କର ମୃତ୍ୟୁ ଘଟିଛି। ଏହି ସମ୍ବେଦନଶୀଳ ଘଟଣା ପରେ ପୋଲିସ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମୃତ୍ୟୁର ସଠିକ୍ କାରଣ, ନକଲି ମଦର ପ୍ରସ୍ତୁତି ଉତ୍ସ ଏବଂ ଏହାର ଯୋଗାଣ ଶୃଙ୍ଖଳାର ପର୍ଦ୍ଦାଫାଶ କରିବା ପାଇଁ ଅତିରିକ୍ତ ପୋଲିସ ଅଧୀକ୍ଷକ ଆଇ. ବୁଙ୍ଗଲାଙ୍ଗ ଚାଙ୍ଗଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (ଏସଆଇଟି) ଗଠନ କରାଯାଇଛି। ଏ ସମ୍ପର୍କରେ ବରିଷ୍ଠ ପୋଲିସ ଅଧୀକ୍ଷକ ଭେସୁପ୍ର କେଜୋ ସୂଚନା ଦେଇଛନ୍ତି।
