ତାଇପେଇ: ପ୍ରଶାନ୍ତ ମହାସାଗରରେ ସୃଷ୍ଟି ହୋଇଥିବା ଅତ୍ୟନ୍ତ ଭୟାବହ ତଥା ଶକ୍ତିଶାଳୀ ବାତ୍ୟା ‘ଚାମ୍ପି’ ତାଇୱାନ ଆଡ଼କୁ ମାଡ଼ିଆସିବାଫଳରେ ସମଗ୍ର ଦ୍ୱୀପପୁଞ୍ଜରେ ଏକପ୍ରକାର ବିପର୍ଯ୍ୟସ୍ତ ସ୍ଥିତି ସୃଷ୍ଟି ହୋଇଛି। ପ୍ରଚଣ୍ଡ ପବନ ଏବଂ ମୂଷଳଧାରାରେ ଲାଗି ରହିଥିବା ବର୍ଷା ଯୋଗୁଁ ଉପକୂଳବର୍ତ୍ତୀ ଏବଂ ପାର୍ବତ୍ୟାଞ୍ଚଳଗୁଡ଼ିକ ଅତି ବିପଦପୂର୍ଣ୍ଣ ସ୍ଥିତିରେ ପହଞ୍ଚିଛି। ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ପ୍ରଶାସନ ସୁରକ୍ଷାମୂଳକ ପଦକ୍ଷେପ ସ୍ୱରୂପ ପ୍ରାୟ ୧,୦୦୦ଟି ଘରୋଇ ଏବଂ ଅନ୍ତର୍ଜାତୀୟ ବିମାନ ଉଡ଼ାଣ ବାତିଲ କରିଛି।
ସୂଚନାଯୋଗ୍ୟ ଯେ, ସୁପର ସାଇକ୍ଲୋନ୍ର ରୂପ ନେଇ ଏହି ଝଡ଼ ସ୍ଥଳଭାଗ ଛୁଇଁବା ଫଳରେ ଏହାର କେନ୍ଦ୍ରସ୍ଥଳରେ ପବନର ବେଗ ଘଣ୍ଟାପ୍ରତି ପ୍ରାୟ ୧୯୧ କିଲୋମିଟର ରହିଥିଲା। ପରିବହନ ମନ୍ତ୍ରଣାଳୟର ସୂଚନା ମୁତାବକ, ସମସ୍ତ ୨୬୨ଟି ଘରୋଇ ଉଡ଼ାଣ ସହିତ ୬୬୯ଟି ଅନ୍ତର୍ଜାତୀୟ ଉଡ଼ାଣକୁ ବାତିଲ କରାଯାଇଛି। ଏହା ସହିତ ସୁରକ୍ଷା ଦୃଷ୍ଟିରୁ ଦେଶର ଆର୍ଥିକ ବଜାରଗୁଡ଼ିକୁ ମଧ୍ୟ ଦିନକ ପାଇଁ ସମ୍ପୂର୍ଣ୍ଣ ବନ୍ଦ ରଖାଯାଇଛି, ଯଦିଓ ଉତ୍ତର-ଦକ୍ଷିଣ ହାଇସ୍ପିଡ୍ ରେଳ ସେବାକୁ ସୀମିତ ଭାବେ ଚାଲୁ ରଖାଯାଇଛି।
ତାଇୱାନର କେନ୍ଦ୍ରୀୟ ପାଣିପାଗ ପ୍ରଶାସନର ଆକଳନ ଅନୁଯାୟୀ, ଦକ୍ଷିଣ ମୁଣ୍ଡରୁ ପ୍ରାୟ ୩୨୦ କିଲୋମିଟର ପୂର୍ବରେ କେନ୍ଦ୍ରଭୂତ ଥିବା ଏହି ଝଡ଼ଟି ଉତ୍ତର-ପୂର୍ବ ଉପକୂଳ ଦେଇ ଚୀନ୍ ଭୂଭାଗ ଆଡ଼କୁ ଏବଂ ପରବର୍ତ୍ତୀ ସମୟରେ ଦକ୍ଷିଣ ଜାପାନ ଆଡ଼କୁ ଗତି କରିବାର ସମ୍ଭାବନା ରହିଛି। ଏହି ବାତ୍ୟା ଯୋଗୁଁ ଏପର୍ଯ୍ୟନ୍ତ ଅତି କମରେ ଜଣଙ୍କର ମୃତ୍ୟୁ ହୋଇଛି ଏବଂ ୯୦ରୁ ଅଧିକ ଲୋକ ଆହତ ହୋଇଛନ୍ତି। ବଢ଼ୁଥିବା ବିପଦକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ସମ୍ବେଦନଶୀଳ ପାର୍ବତ୍ୟାଞ୍ଚଳରୁ ପ୍ରାୟ ୧,୩୦୦ ବାସିନ୍ଦାଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ପ୍ରାଥମିକ ଭାବେ ୭୭,୦୦୦ରୁ ଅଧିକ ଘରେ ବିଦ୍ୟୁତ୍ ସେବା ବାଧାପ୍ରାପ୍ତ ହୋଇଥିବା ବେଳେ, କର୍ମଚାରୀମାନେ ତୁରନ୍ତ ଅଧିକାଂଶ ଘରକୁ ବିଦ୍ୟୁତ୍ ସଂଯୋଗ ପୁନଃସ୍ଥାପନ କରିଛନ୍ତି। ରାଜଧାନୀ ସହରରେ ପ୍ରବଳ ବର୍ଷା ଲାଗିରହିଥିବା ବେଳେ ସାର୍ବଜନୀନ ପରିବହନ ଏବଂ ମେଟ୍ରୋ ବ୍ୟବସ୍ଥା ସୀମିତ ସମୟସୀମା ମଧ୍ୟରେ କାର୍ଯ୍ୟ କରୁଛି।