ଲକ୍ଷ୍ନୌ: ସରକାରୀ ଚାକିରି ପାଇଁ ଚରିତ୍ର ଯାଞ୍ଚ ପ୍ରକ୍ରିୟାକୁ ଉତ୍ତର ପ୍ରଦେଶ ସରକାର ଅଧିକ କଡାକଡି କରିଛନ୍ତି। ଆନ୍ଦୋଳନ ସମୟରେ ହିଂସା କରୁଥିବା ବ୍ୟକ୍ତିଙ୍କୁ ଏଣିକି ସରକାରୀ ଚାକିରି ମିଳିବା କଷ୍ଟକର ହେବ।
ନିଯୁକ୍ତି ବିଭାଗର ପ୍ରମୁଖ ସଚିବ ଏମ୍. ଦେବରାଜଙ୍କ ପକ୍ଷରୁ ଜାରି ହୋଇଥିବା ନିର୍ଦ୍ଦେଶ ଅନୁସାରେ, ବିଭାଗ, ନିଗମ, ପରିଷଦ ଏବଂ ସ୍ଥାନୀୟ ସଂସ୍ଥାଗୁଡିକରେ ସିଧାସଳଖ ନିଯୁକ୍ତି ପାଇଁ ମନୋନୀତ ପ୍ରାର୍ଥୀଙ୍କ ଚରିତ୍ର ଯାଞ୍ଚ ବାଧ୍ୟତାମୂଳକ ହେବ।
ନିର୍ଦ୍ଦେଶରେ କ’ଣ ରହିଛି?
୧. କେବଳ ରାଜନୈତିକ ବିଚାରଧାରା ଆଧାରରେ କୌଣସି ପ୍ରାର୍ଥୀଙ୍କୁ ଅଯୋଗ୍ୟ ଘୋଷଣା କରାଯିବ ନାହିଁ।
୨. ଯଦି କୌଣସି ବ୍ୟକ୍ତି ଏପରି ସଂଗଠନର ସଦସ୍ୟ ଅଛନ୍ତି, ଯାହାର ଉଦ୍ଦେଶ୍ୟ ହିଂସାତ୍ମକ ଉପାୟରେ ସମାଜ ବ୍ୟବସ୍ଥାକୁ ବଦଳାଇବା, ତେବେ ସେ ଅଯୋଗ୍ୟ ବିବେଚିତ ହେବେ।
୩. କେବଳ FIR ରୁଜୁ ହେବା କିମ୍ବା ତଦନ୍ତ ଚାଲିଥିବାରୁ କୌଣସି ପ୍ରାର୍ଥୀଙ୍କୁ ସ୍ୱତଃ ଅଯୋଗ୍ୟ କରାଯିବ ନାହିଁ।
୪. ପୂର୍ବରୁ ସରକାରୀ ସେବାରେ ଥିବା କର୍ମଚାରୀଙ୍କ ପୁନଃ ଚରିତ୍ର ଯାଞ୍ଚ କରାଯିବ ନାହିଁ, ତେବେ ତାଙ୍କ ପୁରୁଣା ବିଭାଗରୁ ତଥ୍ୟ ନିଆଯାଇପାରେ।
୫. ଚରିତ୍ର ଯାଞ୍ଚ ପାଇଁ ପୋଲିସକୁ ୩୦ ଦିନ ଭିତରେ ରିପୋର୍ଟ ଦେବାକୁ ପଡିବ।
ସରକାରଙ୍କ ଏହି ନୂଆ ନିର୍ଦ୍ଦେଶ ପରେ ଆନ୍ଦୋଳନର ଆଡରେ ହିଂସା କରୁଥିବା ଯୁବକଙ୍କ ପାଇଁ ସରକାରୀ ଚାକିରି ବାଟ ବନ୍ଦ ହୋଇଯିବ ବୋଲି ଚର୍ଚ୍ଚା ହେଉଛି।